Դմիտրի Գունկոն 2020 թվականին հեռացավ «Խիմկիից» և ուղևորվեց Հայաստան։ Ներքին առաջնությունում հաջողության հասնել միանգամից չստացվեց։ «Նոայի» և «Արարատ-Արմենիայի» հետ աշխատելուց հետո միայն երրորդ փորձից (2022/23թթ․ մրցաշրջան) «Ուրարտուի» գլխավորությամբ նրան հաջողվեց «ոսկե դուբլ» ձևակերպել՝ դառնալով նաև առաջնության լավագույն մարզիչ։ Գունկոն, չնայած Հայաստանում իր գործունեությանը, չի մոռանում ՌՊԼ-ն ու «Սպարտակը»։
Metaratings.ru-ն զրուցել է «Ուրարտուի» գլխավոր մարզչի հետ հայկական և ռուսական ֆուտբոլի մասին։ Հարցազրույցում Գունկոն պատմել է, թե ինչպես է կարողացել հաստատվել Հայաստանում, ինչպես նաև գնահատել Իվան Իգնատևի կարգավիճակն «Ուրարտուում»։
– Հարցազրույցներից մեկում պատմել եք, որ սըր Ալեքս Ֆերգյուսոնի ինքնակենսագրությունը կարդալուց հետո սկսել եք գինի խմելու հրավիրել այլ ակումբների մարզիչներին՝ անկախ տվյալ խաղում գրանցած արդյունքից։ Այդ ավանդույթը շարունակվո՞ւմ է։
– Այո, ճիշտ է։ Արդեն երրորդ տարին է՝ փորձում եմ մարզչական ինչ-որ մշակույթ ավելացնել։ Ցավոք, հայկական էմոցիոնալ մենթալիտետը չի թողնում մարզիչներին հանդարտվել նույնիսկ խաղերից հետո։ Այս ավանդույթը շարունակվում է, բայց դժվարությամբ է արմատավորվում․ միայն մի քանիսն են խաղից հետո մտել իմ մարզչական սենյակ։ Այս պահին գինին կուտակվում է իմ սառնարանում։
– Դուք աշխատել եք «Նոայում», որն այս ամառ տեղ գտավ Կոնֆերենցիաների լիգայում։ Կարելի՞ է ասել, որ ակումբի հաջողության հիմքը դրվեց հենց ձեր օրոք։
– Իհարկե ոչ։ Այդ ժամանակ ակումբը պատկանում էր բոլորովին այլ մարդու և մեր բյուջեն անհամեմատելի էր ակումբի խնդիրների հետ։ Հեռանալուցս հետո ֆինանսավորումը բազմակի ավելացավ։ Հիմա «Նոան» բոլորովին այլ ակումբ է՝ նոր կառավարման կառուցվածքով։ Իմ սկսածը որևէ կապ չունի ներկա ակումբի հետ։
– Դուք Հայաստանի առաջնությունում հաղթել եք «Ուրարտուի» հետ։ Ինչպե՞ս են տոնում չեմպիոնությունը Հայաստանում։ Կայի՞ն ավանդույթներ, որոնք ձեզ զարմացրին։ Գուցե անվճար սնվե՞լ եք։
– Մենք մեկ տարվա ընթացքում հաղթեցինք և՛ առաջնությունը, և՛ Գավաթը։ Սա անկասկած մեծ հաջողություն էր։ Եթե չեմ սխալվում, դա «Ուրարտուի» պատմության մեջ առաջին դեպքն էր։ Հայերը շատ հյուրընկալ ժողովուրդ են, որոնք հաճույքով կնստեցնեն ձեզ սեղանի շուրջ և կհյուրասիրեն։ Բայց, իհարկե, ռեստորաններում մեզ անվճար չեն հյուրասիրում, քանի որ ֆուտբոլը Հայաստանում այնքան էլ հայտնի չէ, որքան ցանկալի կլիներ։ Երկրում ֆուտբոլի զարգացման հետ կապված շատ խնդիրներ կան, և երկրպագուները չեն գնում մարզադաշտեր։
