Օլիմպիական խաղերի մեկնարկը տրված է։ Աշխարհի ամենահայտնի և ուժեղ մարզիկները հավաքվել են Փարիզում ու փորձելու են նվաճել իրենց կարիերայի ամենագլխավոր մրցանակը՝ օլիմպիական ոսկին։ Իհարկե, քառամյակի գլխավոր ստուգատեսի ամենասպասված իրադարձությունները քիչ չեն՝ 100 մետր արագավազք, լողի մրցումներ, ծանրամարտի ու ըմբշամարտի գերծանր քաշայինների պայքար (որտեղ մենք ունենք ոսկու հավակնություններ)։ Թիմային սպորտաձևերն այս համատեքստում ևս ուշադրության կենտրոնում են։ Բասկետբոլում միշտ կա հավերժական հարց. «Որևէ մեկը կկարողանա՞ հաղթել «Դրիմ-թիմին»։
Շատերը մտածում են, երբեմն բարձրաձայնում են, որոշներն էլ նույնիսկ պնդում են, որ ֆուտբոլն Օլիմպիական խաղերում մղված է երկրորդ պլան։ Մենք շտապում ենք հերքել այս փաստը և ամրապնդել երկաթյա փաստարկներով։ Ստորև կներկայացնենք Օլիմպիական խաղերին մասնակցող անվանի ֆուտբոլիստների ու մարզիչների ցանկ, որը շատերի մոտ հիացմունք և խաղերը դիտելու մեծ ցանկություն կառաջացնի։
Նախ՝ փոքրիկ նկատառում. մրցաշարին մասնակցող հավաքականներում պետք է ընդգրկված լինեն մինչև 23 տարեկան ֆուտբոլիստներ։ Ըստ կանոնակարգի, յուրաքանչյուր թիմ իրավունք ունի հայտացուցակում ընդգրկել նաև 23-ից բարձր ֆուտբոլիստների (մինչև 3 հոգի թույլատրվում է յուրաքանչյուր թիմի համար)։ Որոշ թիմեր ունեն աստղերի, որոնք նույնիսկ 23 էլ չկան։ Ոմանց հաջողվել է համոզել որոշ փորձառու տղաների բաց թողնել նախամրցաշրջանային հավաքները և պայքարել ոսկե մեդալի համար։
Խուլիան Ալվարես — Արգենտինա
«Մանչեսթեր Սիթի» գալուց հետո Խուլիան Ալվարեսը երկու տարվա ընթացքում արդեն նվաճել է բոլոր հնարավոր տիտղոսները։ Մի րոպե…..բոլո՞ր։ ամենևին։ Արգենտինացի հարձակվողը դեռ կատարալեգործվելու տեղ ունի. նա դեռ չունի Օլիմպիական ոսկի։ Ուստի «Սիթիի» և Արգենտինայի հետ երկար մրցաշրջանից հետո Ալվարեսը մեկնել է Փարիզ։
Արգենտինայի հավաքականում ընդգրկվել է նաև Նիկոլաս Օտամենդին։ 36-ամյա պաշտպանը կլինի թիմի ավագը։ Հայտացուցակում աշխարհի ևս մեկ չեմպիոն կա՝ Տիագո Ալմադան «Ատլանտա Յունայթեդից»։ Նրան գումարում ենք արգենտինական լիգայի գլխավոր տաղանդին՝ Մադրիդի «Ատլետիկոյի» գլխավոր մարզիչ Դիեգո Սիմեոնեյի որդուն՝ Ջուլիանո Սիմեոնեին (Ջովանիի հետ չշփոթել): Լուրջ հայտ՝ ոսկի նվաճելու համար։
Պաու Կուբարսի – Իսպանիա
17 տարեկանում Պաուն հանկարծակիորեն դարձավ «Բարսելոնայի» պես ուժեղ ակումբի պաշտպանության գլխավոր գործող անձանցից մեկը։ Նա նույնիսկ ընդգրկվեց Իսպանիայի հավաքականի ընդլայնված կազմում՝ Եվրո 2024-ի համար: Սակայն Դե լա Ֆուենտեն Կուբարսիին չտարավ Գերմանիա, այդ իսկ պատճառով պաշտպանը խաղալու է Փարիզում։
Պաուից բացի, Օլիմպիական խաղերին կմասնակցեն Եվրոպայի գործող չեմպիոններ Ալեքս Բաենան «Վիլյառեալից» և Ֆերմին Լոպեսը դարձյալ «Բարսելոնայից», ինչպես նաև Մադրիդի «Ատլետիկոյի» հարձակվող Սամու Օմորոդիոնը։ Իսպանական ֆուտբոլի սիրահարները կփաստեն՝ նա Լա Լիգայի ամենաանսովոր կերպարներից մեկն է։ Խոշորամարմին կենտրոնական հարձակվողը նախորդ մրցաշրջանում խփել է 9 գոլ, այդ թվում երկուսը՝ «Բարսայի» դեմ խաղում։ Եվ դա՝ ընդամենը 20 տարեկանում։ Կան նաև ՊՍԺ-ի դարպասապահ Արնաու Տենասը, «Ժիրոնայի» կազմում փայլած պաշտպաններ Էրիկ Գարսիան և Միգել Գուտյերեսը, ինչպես նաև բազմակողմանի զարգացած խաղացող Սերխիո Գոմեսը։
Մայքլ Օլիսե — Ֆրանսիա
Ֆրանսիացիները, ինչպես միշտ, ֆավորիտ են ցանկացած մրցաշարում։ Հատկապես, երբ խոսվում է երիտասարդական մրցաշարերի մասին։ Թիմի մարզչական շտաբը (որին կանդրադառնանք ստորև) ցանկանում էին նույնիսկ Մբապեին բերել տնային Օլիմպիական խաղերին, բայց Կիլիանը մասնակցեց Եվրո 2024-ին, կոտրեց քիթը և տեղափոխվեց «Ռեալ»։ Համաձայնեք՝ հագեցած ամառ էր նրա համար։ «Ռեալը» իսկապես չէր ցանկանում իր աստղային նորեկին թույլ տալ գնալ ոչ այնքան կարևոր մրցաշարի:
Ուստի գլխավոր աստղը կլինի Մայքլ Օլիսեն, որը լավ մրցաշրջան անցկացրեց Պրեմիեր լիգայում, իսկ ամռանը «Քրիսթալ Փելասը» փոխեց «Բավարիայով»: Նրան կօգնի «Փելասի» մեկ այլ հարձակվող՝ Ժան Ֆիլիպ Մատետան, որը մեծ շուքով ավարտեց մրցաշրջանը։ Իսկ թիմի ավագը կլինի փորձառու Ալեքսանդր Լակազետը «Լիոնից»։
Էլի տաղանդներ կան, որոնց արժե ուշադրություն դարձնել՝ պաշտպան Կաստելո Լուկեբեն «Լայպցիգից», դրիբլինգի մեծ սիրահար Դեզիր Դուայը «Ռենից» և Ռայան Չերկին դարձյալ «Լիոնից»։ Ասում են՝ վերջինս ունի մի «վագոն» տաղանդ, բայց հաճախ կարգապահությունը, ավելի ճիշտ դրա բացակայությունը լրիվ համը հանում է։
Աշրաֆ Հակիմի – Մարոկկո
ՊՍԺ-ի պաշտպանը պարզապես չէր կարող բաց թողնել Փարիզի խաղերը։ Նախ նա ապրում է հենց Փարիզում։ Բացի դրանից՝ Հակիմին իր թիմի ամենափորձառու, տիտղոսակիր խաղացողն է, թիմի առաջատարը և ավագը։ Միաժամանակ, ըստ transfermarkt-ի, նա նաև մրցաշարի երկրորդ ամենաթանկ խաղացողն է՝ 60 միլիոն եվրո (միայն Ալվարեսն է ավելի թանկ)։
Հարձակման գծում կխաղան «Բարսելոնայի» սաներ Իլյաս Ահոմաշը և Աբդե Էզազուլին, իսկ Բիլալ Էլ-Հաննուսը «Գենկից» կաջակցի նրանց թիկունքից։ Այսպիսով, աֆրիկյան այս հավաքականը շատ տաղանդներ ունի։
Նաբի Կեյտա – Գվինեա
Գվինեացի կիսապաշտպանը այդպես էլ աստղ չդարձավ «Լիվերպուլում», թեպետ նրա մասին ձոնում էին անհավանական դիֆերամբներ։ Ի վերջո, նա վերադարձավ Բունդեսլիգա: Բայց այնտեղ էլ չստացվեց. վնասվածքների պատճառով մինչև ապրիլ նա ընդամենը 5 հանդիպում անցկացրեց «Վերդերի» կազմում, հետո վիճեց թիմակիցների հետ։ Գործը հասավ նրան, որ Կեյտան հեռացվեց հիմնական թիմից: Արդեն ամռանը, մրցաշրջանի արդյունքով, Նաբին ճանաչվել է Բունդեսլիգայի վատագույն կիսապաշտպան։
Բայց Կեյտան միշտ հավելյալ մոտիվացիայով է հանդես եկել ազգային հավաքականում և իսկապես իրեն դրսևորում է որպես առաջատար ու կիսապաշտպան, որի համար կարելի է վճարել 50 միլիոն եվրո։ Օլիմպիական խաղերը մեզ նրա մասին հիշելու հնարավորություն են։ Կիսապաշտպանությունում Նաբիին կօգնի Իլայշ Մորիբան, որին «Բարսելոնայի» երկրպագուները պետք է հիշեն։ Նրա տրանսֆերային իրավունքները պատկանում են «Լայպցիգին։
Մարզիչներ
Մարզչական ցանկը ևս աստղային է։ Բավական է նշել, թե ով է աշխատելու Ֆրանսիայի երիտասարդների հետ։ Թիմին կփորձի օգնել տիտղոս նվաճել աշխարհի ու Եվրոպայի չեմպիոն, անգերազանցելի Թիերի Անրին։
Արգենտինայի հավաքականի ղեկին կանգնած է լեգենդար Խավիեր Մասկերանոն, որն Օլիմպիական խաղերին մասնակցելու համար փորձում էր հրավիրել իր վաղեմի ընկերոջն ու թիմակցին՝ Լեո Մեսիին։ Բայց «Ինտեր Մայամիի» հարձակվողը Կոպայի վերջին խաղում ստացավ վնասվածք ու նրա մասնակցությունը ՕԽ բացառվեց։
Ուկրաինայի հավաքականը գլխավորում է աշխարհի ու Եվրոպայի առաջնությունների մասնակից Ռուսլան Ռոտանը։ Դոմենիկյան Հանրապետության հավաքականի երիտասարդ հարձակվող Ժունիոր Ֆիրպոյին կմարզի Լա Լիգայի արդեն նախկին վետերաններից մեկը՝ «Ատլետիկի» լեգենդ Յիբայ Գոմեսը։
