Զարգացման վեկտորի աստիճանական փոփոխությունը․ Նոան՝ մրցաշրջանի առաջին հատվածում

VBET Հայաստանի Պրեմիեր Լիգան ներկայացնող ակումբներն աստիճանաբար սկսում են նախապատրաստվել մրցաշրջանի երկրորդ հատվածին։

Թե՛ մարզումները վերսկսելու առումով, թե՛ տրանսֆերային շուկայում ամենաակտիվներից մեկը Երևանի «Նոան» է, այդ պատճառով էլ առաջինը կանդրադառնանք Վիկտոր Բուլատովի գլխավորած թիմին։

Ամառային սելեկցիան

Մինչև մրցաշրջանի մեկնարկն ակումբի ղեկավարությունը հայտարարեց, որ փոխվում է ակումբի զարգացման վեկտորը, և ավելի շատ «շեշտը» դրվելու է հեռանկարային ծրագրեր իրականացնելու և երիտասարդ ֆուտբոլիստներին շանս տալու վրա։ Արդյունքում թիմից հեռացան առանցքային մի շարք ֆուտբոլիստներ։ Ամենամեծ կորուստը թերևս կարելի է համարել դարպասապահ Վալերիո Վիմերկատիի հեռանալը, որը տեղափոխվեց «Արարատ-Արմենիա»։ Աչք «շոյող» կորուստների թվին կարելի է դասել նաև թիմի ավագ Վլադիսլավ Կրյուչկովի (տեղափոխվեց «Ալաշկերտ»), Վլադիմիր Ազարովի, Կիրիլ Բորի, Յուրի Գարեգինյանի և Հելիստանո Չիրո Մանգայի հեռանալը։

Փոխարենը թիմ վերադարձավ ներկայումս VBET ՀՊԼ-ում ակումբի պատմության լավագույն ռմբարկու Մաքսիմ Մայրովիչը, ինչպես նաև ակումբի շարքերը համալրեցին դարպասապահ Գրիգորի Մաթևոսյանը, պաշտպաններ Իգոր Սմիրնովը, Ալբերտ Գաբարաևը, կիսապաշտպան Սարգիս Շահինյանը և հարձակվող Չարլզ Մարկ Իկեչուկվուն։ Իհարկե, այլ համալրումներ ևս եղան, սակայն վերոնշյալ ֆուտբոլիստները հետագայում կազմեցին հիմնական կազմի «կորիզը», այդ պատճառով նշեցի միայն նրանց անունները։

Եվ վերջապես, գլխավոր մարզիչ Դմիտրի Գունկոյի՝ «Արարատ-Արմենիա» տեղափոխվելուց հետո «Նոայի» ղեկը ստանձնեց երիտասարդ ռուս մասնագետ Գրիգորի Միխալյուկը։ Դե յուրե գլխավոր մարզչի պաշտոնում նշանակվեց Միխալյուկը, սակայն հանդիպումների ընթացքում մարզչական բուն պարտականությունները կատարում էր նաև «Ուրարտուից» տեղափոխված Արամ  Հակոբյանը։

Գրանցած արդյունքը և ցուցադրած խաղը

Նախքան ակումբի ցուցադրած խաղին անդրադառնալը նշեմ, որ 15 խաղից հետո «Նոան» վաստակել է 22 միավոր (6 հաղթանակ, 4 ոչ-ոքի, 5 պարտություն, գոլերի հարաբերակցությունը՝ 23-23)։ Այս վիճակագրության մեջ ներառված չէ «Սևանի» դեմ չեղարկված հանդիպումը, որտեղ «Նոան» հաղթել էր 2-1 հաշվով։ Համեմատության համար նշեմ, որ անցած մրցաշրջանի առաջին կեսի ավարտից հետո ևս «Նոան» վաստակել էր 22 միավոր։

Մրցաշրջանի մեկնարկային հանդիպումը բավականին վատ դասավորվեց ակումբի համար, և վերջինս 1-7 հաշվով պարտվեց «Արարատին»։ Հաշվի առնելով այն փաստը, որ կազմը զգալի փոփոխությունների էր ենթարկվել և թիմը գլխավորում էր նոր մարզիչ, ինչ-որ տեղ հասկանալի է նման սցենարը։ Բացի այդ, հանդիպման 25-րդ րոպեին խաղադաշտից հեռացվեց թիմի կիսապաշտպան Միխայիլ Կովալենկոն, ինչից հետո «Արարատն» իրեն զգում էր, ինչպես ձուկը ջրում։

Հաջորդած չորս խաղերում ևս «Նոայի» համար ամեն բան շատ դժվար էր ստացվում։ Թիմն ունեցավ միայն մեկ հաղթանակ։ Առհասարակ, Միխալյուկի գլխավորությամբ «Նոան» անցկացրեց 11 հանդիպում՝ կարողանալով վաստակել հնարավոր միավորների 45,4%-ը՝ 15 միավոր։ Դրանից հետո ակումբի գլխավոր մարզչի պաշտոնում նշանակվեց մեկ այլ ռուս մասնագետ՝ Վիկտոր Բուլատովը, իսկ Միխալյուկը շարունակեց աշխատել ակումբի համակարգում, ինչպես նաև օգնել Բուլատովին։

Վերջինիս գլխավորությամբ թիմն անցկացրեց չորս հանդիպում և վաստակեց 7 միավոր, և դեռևս վաղ է գնահատական տալ Բուլատովի աշխատանքին՝ չնայած պետք է փաստել, որ որոշակի դրական տեղաշարժ նկատվում է։

Դավանած ֆուտբոլը և հիմնական դերակատարները 

Ինչպես նախորդ մրցաշրջանում Գունկոն էր կիրառում, այս մրցաշրջանում «Նոայի» երկու մարզիչները ևս հավատարիմ մնացին 4-2-3-1 տակտիկական դասավորությանը։ Վիմերկատիի հեռանալուց հետո թվում էր, թե թիմը լուրջ խնդիրների առաջ կկանգնի դարպասապահի հարցում։ Սակայն «Ուրարտուից» տեղափոխված Գրիգորի Մաթևոսյանը գրեթե բոլոր հանդիպումներում իրեն գերվստահ էր զգում և իրավամբ համարվում է ընթացիկ մրցաշրջանի բացահայտումներից մեկը։

«Նոայի» դարպասին նշանակված հինգ 11-մետրանոց հարվածներից երկուսը Մաթևոսյանը հետ է մղել, բացի այդ դարձել է մի շարք հիանալի սեյվերի հեղինակ։ Բնականաբար, դեռևս զարգանալու և աճ գրանցելու համար ժամանակ է հարկավոր, բայց առաջին մրցաշրջանը Բարձրագույն խմբում անցկացնող դարպասապահի համար վերջինս շատ լավ խաղ է ցուցադրում։

Պաշտպանության եզրերում ամեն ինչ հստակ է։ Ձախից իր հիմնական տեղն ունի Սանա Գոմեշը, իսկ աջ եզրում հիմնական խաղացողը Ժոաո Ժորդի Մոնրոյ Արարատն է։ Երկու ֆուտբոլիստներն էլ, պաշտպանությունից բացի, բավականին հաճախ են միանում հարձակմանը՝ սրություն հաղորդելով թիմի գրոհներին։

Պաշտպանության կենտրոնում ընդգծված զույգ չկա։ Տարբեր հանդիպումներում կենտրոնական պաշտպանի գոտին փակել են Դենիս Դեդեչկոն, Ալբերտ Գաբարաևը, Իգոր Սմիրնովը և Ջեֆերսոն Ֆորմիգաոն։ Այս ֆուտբոլիստները տարբեր խաղերում տարբեր զույգեր են կազմել։

Հենակետայինի գոտում իր հաստատված տեղն ունի Սարգիս Շահինյանը, որն առաջին շրջանում թիմի ամենաառանցքային խաղացողներից մեկն է համարվում։ Շահինյանը բավականին շատ «սևագործ» աշխատանք է կատարում, ինչպես նաև հարկ եղած դեպքում առաջին փոխանցմամբ ազդարարում է թիմի գրոհը։

Սարգսի կողքին պարբերաբար հանդես են եկել Էդուարդս Էմսիսը, Բենիկ Հովհաննիսյանը, երբեմն էլ Արտյոմ Ֆիլիպովը և Ալեշանդրե Օլիվեյրան։ Բենիկը և Օլիվեյրան ավելի շատ կատարել են «ջոկերի» պարտականություն՝ հաճախ երկրորդ խաղակեսում դուրս գալով փոխարինման։

Հարձակման ձախ եզրում չի քննարկվում Պավել Կիրեենկոյի հաստատված տեղը։ Վերջինս թիմի միակ ֆուտբոլիստն է, որը մասնակցել է առաջին կեսի բոլոր հանդիպումներին և խփած հինգ գոլով համարվում է «Նոայի» լավագույն ռմբարկուն։ Հակադարձ՝ աջ եզրում գործում են մի քանի խաղացողներ, մասնավորապես Մաքսիմ Մայրովիչը, Ռայմոնդ Գյասին, երբեմն նաև Ալեշանդրե Օլիվեյրան։ Մայրովիչը հավասարապես կարող է և հանդես է գալիս նաև կենտրոնական հարձակվողի գոտում։ Առաջին կեսի հանդիպումներում հիմնականում երեք ֆուտբոլիստ է հանդես եկել ինը համարի գոտում՝ Մայրովիչ, Ալեքսանդր Կարապետյան, Չարլզ Մարկ Իկեչուկվու։

Իսկ ահա ենթահարձակվողի գոտում հիմնական թեկնածուն Պետրոս Ավետիսյանն է։ Պետրոսն անցած մրցաշրջանում միացավ ակումբին և առաջնության վերջնամասում հիանալի ֆուտբոլ ցուցադրեց։ Ընթացիկ մրցաշրջանի մեկնարկում էլ ամեն բան հաջող էր դասավորվում, սակայն Ավետիսյանը ծանր վնասվածք ստացավ և ստիպված բաց թողեց գրեթե երկու ամիս։ Ի պատիվ իրեն, կիսապաշտպանը վերադարձավ շատ ավելի ուժեղ և կարողացավ դառնալ «Նոայի» շարժիչ ուժը՝ ընդհանուր առմամբ դառնալով չորս գոլի և երեք արդյունավետ փոխանցման հեղինակ։

VBET Հայաստանի գավաթ

«Նոայի» համար գավաթի ընթացիկ խաղարկությունը բավականին կարճ տևեց։ Հաշվի առնելով նախորդ մրցաշրջանում զբաղեցրած դիրքը՝ ակումբը մեկնարկեց քառորդ եզրափակչում և 0-1 հաշվով զիջելով «Արարատին»՝ լքեց հետագա պայքարը։

Տրանսֆերային ձմեռ

Ինչպես արդեն նշեցի, ակումբն ամենաակտիվներից է ձմեռային տրանսֆերային պատուհանի ընթացքում։

Թիմից հեռացել են «Նոայի» պատմության մեջ խաղերի քանակով ռեկորդակիր Բենիկ Հովհաննիսյանը, Դենիս Դեդեչկոն, Ջեֆերսոնը, Արտյոմ Ֆիլիպովը, Ալեքսանդր Գոլովնյան, Դոբրիվոյե Վելիմիրը, Նիկոլայ Նովիկովը, Պավել Օվչիննիկովը, Վադիմ Պաիրելին և Ալեքսանդր Կարապետյանը։

Փոխարենը «Նոան» ձեռք է բերել Գևորգ Տարախչյանին, Արթուր Քարտաշյանին, Ալեքսեյս Գրյազնովսին, Թարեք Աֆկիրին, Վարդան Շահատունուն և Ալեքսեյ Չիոպային։ Հրավիրված լեգեոներների անցած ճանապարհին նայելով՝ կարող եմ ասել, որ առաջին հայացքից մեծ տպավորություն չեն թողնում։ Պետք է սպասել և գործի մեջ տեսնել, թե ինչի են ընդունակ։

Կցանկանամ ձեր ուշադրությունը սևեռել Քարտաշյանի և Շահատունու տրանսֆերների վրա։ Արթուրը, «Փյունիկից» տեղափոխվելով «Սևան», բավականին վստահ տպավորություն էր թողնում, ընդհուպ դարձել էր թիմի ավագը։ Ինչ-որ տեղ զարմանալի էր այն փաստը, որ ազգային հավաքականի գլխավոր մարզիչ Խոակին Կապառոսը վերջինիս չհրավիրեց հավաքականի աշնանային հանդիպումներին, մանավանդ, որ այդ ընթացքում մենք կենտրոնական պաշտպանի դիրքում լուրջ խնդիրներ ունեինք։

Ինչ վերաբերում է Շահատունուն, 23-ամյա դարպասապահը վերջին մեկուկես մրցաշրջանն անցկացրեց «Արարատ-Արմենիայում»՝ ոչ մի հանդիպում չանցկացնելով գլխավոր թիմում։ Այժմ Շահատունին մրցակցելու է ոչ թե երկու լեգեոներ դարպասապահի, այլ իր նման երիտասարդ և հեռանկարային Գրիգորի Մաթևոսյանի հետ։ Հուսանք, որ այդ մրցակցության արդյունքում կշահեն թե՛ Գրիգորին, թե՛ Վարդանը։

Այսպիսով, եթե ամբողջացնենք առաջին շրջանում «Նոայի» ելույթները, կարող ենք փաստել, որ անկայուն մեկնարկից հետո՝ երկրորդ հատվածում բավականաչափ դրական տեղաշարժ կա։ Խոսքը վերաբերվում է ինչպես արդյունքներին, այնպես էլ ցուցադրած խաղի որակին։

Իսկ, թե ինչքանով է համապատասխանում ակումբի ղեկավարության հայտարարությունը (զարգացման վեկտորի փոփոխման հետ կապված) ներկայիս իրողության հետ, այս պահին դժվար է պատասխանել։ Մինչ այժմ իրականացրած սելեկցիոն աշխատանքը խոսում է այն մասին, որ փորձ է կատարվում կազմում ընդգրկել հնարավորինս շատ երիտասարդ հայ ֆուտբոլիստների։ Հաշվի առնելով նաև այն փաստը, որ «Նոան» երկարաժամկետ վարձակալությամբ տեղակայվել է Վաղարշապատի ֆուտբոլի ակադեմիայում, կարող ենք ակնկալել, որ առաջիկայում ակումբի գլխավոր թիմի շարքերը կհամալրեն ակադեմիայի առաջին սաները, և փուլ առ փուլ կյանքի կկոչվեն ղեկավարության կողմից նախատեսված բոլոր նպատակները։

Սուրեն Մելիքսեթյան