Ֆուտբոլի Հայաստանի ազգային հավաքականն ազգերի լիգայի 5-րդ տուրում հաղթանակ տարավ՝ արտագնա խաղում առավելության հասնելով Վրաստանի ընտրանու նկատմամբ, ինչը հայ ազգի համար ծանր այս օրերին ուրախության ու սփոփանքի փոքր չափաբաժին էր:
Կապառոսը մեկ անգամ չէ, որ նշել է, որ խմբում բոլոր թիմերն ունեն հավասար հնարավորություններ և ըստ էության մարզչի խոսքերի վկայությունն էր մրցաշարային աղյուսակում թիմերի դասավորությունը խմբային փուլի ավարտից երկու տուր առաջ:
Խմբային փուլի նախավերջին տուրի խաղերից հետո Կապառոսի թիմը 1 միավոր է զիջում առաջատար Հյուսիսայի Մակեդոնիային և նոյեմբերի 18-ին կմրցի վերջինիս հետ և միայն հաղթանակի դեպքում իրավունք կստանա շարունակել պայքարը:
Կրկին՝ ամեն ինչ վերջին պահին
Հայաստանի հավաքականն ինքն իր ձեռքով դժվարացրեց իր գործը և կրկին ամեն ինչ թողեց վերջին պահին, ու Վրաստանի հետ խաղում հաղթանակի հասնելը հավաքականի վերջին հույսն էր: Հայ երկրպագուները սովոր են վճռական պահերին ափսոսանքի պահեր ապրել: Այդպիսի պահերը քիչ չէին նաև այս մրցափուլում:
Հիշենք հենց առաջին տուրում Հյուիսիսային Մակեդոնիայի հետ խաղը, որի հենց մեկնարկն անհաջող դասավորվեց Կապառոսի թիմի համար՝ 11 մետրանոց արդեն 5-րդ րոպեին, ևս մեկ 11 մետրանոց առաջին խաղակեսի վերջնամասում: Հայ ֆուտբոլիստները երկրորդ խաղակեսում ուշքի եկան, ունենալով դարպասը գրավելու հարյուր տոկոսանոց 1-2 հնարավորություն, սակայն 94-րդ րոպեին Տիգրան Բարսեղյանի գոլն արդեն ուշ էր այս խաղում գոնե մեկ միավոր վաստակելու համար:
Հաջորդ խաղում ազգային թիմը Երևանում 2:0 հաշվով հաղթեց Էստոնիայի ընտրանուն:
Հոկտեմբերի 11-ին Կապառոսի թիմը տանտիրոջ կարգավիճակում Լեհաստանի Տիխի քաղաքում ընդունեց Վրաստանի թիմին և ոչ-ոքի խաղաց՝ փոխանակելով 2-ական գնդակ:
Այդ խաղում Հայաստանի հավաքականն առաջինը բացեց հաշիվը, սակայն հիմնական ժամանակի ավարտից 16 րոպե առաջ արդեն պարտվողի դերում էր և միայն խաղավերջում կարողացավ կորզել մեկ միավոր՝ Հենրիխ Մխիթարյանի անվրեպ իրացրած 11 մետրանոցի շնորհիվ:
Վրաստանի հետ ոչ-ոքիից 3 օր անց ազգային թիմին սպասում էր Էստոնիայի ընտրանին, որին հաղթելու դեպքում Հայաստանի թիմը կդառնար խմբի միանձնյա առաջատար, սակայն այս անգամ նույնպես «բախտը երես էր թեքել մեզանից»: Իհարկե, պատերազմական թեժ օրերին դժվար էր կենտրոնակալ որևէ այլ բանի վրա, ինչը բնականաբար չէր կարող չանդրադառնալ նաև հավաքականի ֆուտբոլիստների վրա: Լինելով խաղում ֆավորիտի կարգավիճակում՝ հայ ֆուտբոլիստներն ընդամենը մեկ միավոր պոկեցին Էստոնիայի հետ խաղում, այդպիսով շանս տալով Հյուիսասյին Մակեդոնիայի ու Վրաստանի հավաքականներին պահպանել առաջատարի դիրքը:
Վերջին հույսի հաղթանակ
Երեկվա խաղում նույնիսկ ոչ-ոքին գործնականում մեզ կզրկեր Ազգերի լիգայի ընթացիկ մրցաշրջանում պայքարը շարունակելու հնարավորությունից, սակայն փառք ու պատիվ հայ ֆուտբոլիստներին և մարզչական շտաբին, որոնք կարողացան ջանք ու եռանդ չխնայել և հասնել հաղթանակի: ճիշտ է, այդ հաղթանակը շատ ծանր տրվեց, սակայն այս պահին ցանկություն չկա և ժամանակն էլ չէ վերլուծություն անելու համար: Դա կանի Կապառոսն իր մարզչական շտաբի հետ, իսկ արդյունքները կտեսնենք 2 օրից՝ Հյուսիսային Մակեդոնիայի հետ խմբային փուլի վերջին տուրի խաղում:
Երկրորդ անընդմեջ հաղթանակի սպասումով
Ազգերի լիգայի ընթացիկ մրցաշրջանի արդյունքներով ԱԱ-ի եզրափակիչ դուրս գալը փոքր-ինչ անիրատեսական է Հայաստանի հավաքականի համար (նոր ձևաչափով Ազգերի լիգայում խաղարկվում է Մունդիալի ընդամենը 2 ուղեգիր, եթե առաջին երկու դիվիզիոնների հաղթողներն ընտրական փուլի արդյունքներով ձեռք են բերել Մունդիալի ուղեգիր, ապա Ազգերի լիգայում այդ երկու ուղեգիրները բաժին են հասնում հաղթողներին հաջորդող թիմերին), սակայն խմբից դուրս գալու դեպքում և C դիվիզիոնում հաղթելու դեպքում Հայաստանի հավաքականը ազգերի լիգայի հաջորդ մրցաշրջանում հանդես կգա B դիվիզիոնում։
Անկախ Մունդիալի ուղեգիր ձեռք բերել-չբերելուց, Հյուսիային Մակեդոնիայի հետ խաղում հաղթանակի հասնելը ուղղակի անհրաժեշտություն է, հատկապես, որ հայ ազգի համար այս դժվարին օրերին ցանկացած հաղթանակ ունի բարոյահոգաբանական մեծ նշանակություն:
Հաղթանակի դեպքում Հայաստանի ազգային թիմը դուրս կգա C դիվիզիոնի փլեյ-օֆֆ և հնարավորություն կունենա պայքարել հաղթելու և B դիվիզիոն բարձրանալու համար, ինչը հաջորդ տարի մեկնարկելիք Մունդիալի ընտրական փուլից առաջ լրացուցիչ մոտիվացիա կհաղորդի:
