Ֆուտբոլային մեծ դադարից հետո հայկական թիմերը ապրիլ ամսվա վերջին շաբաթում վերսկսեցին մարզումները։ Օրերս հայտնի դարձավ, որ Հայաստանի Առաջին խմբի առաջնությունը կվերսկսվի մայիսի 30-ին։
Մրցաշարի վերսկսմանն ընդառաջ ArmSport-ը խոսել է «Ուրարտու-2»-ի գլխավոր մարզիչ Արամ Հակոբյանի հետ՝ պարզելու թիմի պատրաստվածությունն, ու քննարկելու սպասվող ստուգողական խաղերի վերաբերյալ որոշ հարցեր։
-Ինչպե՞ս են ընթանում մարզումները։
-Մարզումները վերսկսել ենք ապրիլի 24-ից, բայց դադարի ընթացքում տղաներին ամենօրյա մարզումային ծրագիր էինք տրամադրում անհատական մարզվելու համար։ Նրանք լիովին կատարել են առաջադրանքը, ինչը մարզումների ժամանակ երևաց։ Քանի որ տղաները ֆիզիկապես պատրաստ ներկայացան մարզումներին, հիմնական շեշտը դրեցինք խաղային պրակտիկայի բարելավման վրա։
-Այսինքն, բոլոր ֆուտբոլիստները հիմա իրենց օպտիմալ մարզավիճակո՞ւմ են․ դադարն իր ազդեցությունը չի՞ ունեցել։
-Ազդեցություն, իհարկե, ունեցավ։ Մենք կորցրեցինք խաղային ռիթմը, ինչը վերականգնելու համար ժամանակ կպահանջվի։ Դա հնարավոր է միայն շատ խաղեր անցկացնելու միջոցով։
-Վաղը ընկերական խաղ եք նախատեսում «Արարատ-Արմենիա-2»-ի հետ․ նախ, ի՞նչ եք անձամբ Դուք ու մարզչական շտաբն ուզում տեսնել այդ խաղով։
-Առաջին հերթին այն, թե խաղացողները որքանով են պատրաստ առաջնությանը, թե այս ընթացքում թիմային խաղում ինչն է բարելավվել կամ հակառակը: Ուզում ենք տեսնել թիմի ֆունկցիոնալ ու ֆիզիկական վիճակը, որպեսզի հասկանանք, թե ինչի վրա պետք է աշխատենք մինչև առաջնության վերսկսումը։ Դա նաև խաղային պրակտիկայի բարելավում կլինի։ Նախատեսում ենք ևս մի խաղ անցկացնել մինչև առաջնության վերսկսվելը։
-Մրցակցին ինչպե՞ս եք ընտրել։
-Դա, իրոք, պատահականություն չէ։ «Արարատ-Արմենիայի» նպատակներն ու խնդիրները շատ մոտ են մեր թիմին։ Երկու թիմերում էլ խաղում են տարբեր տարիքային հավաքականների խաղացողներ, ինչը նաև մեծ մոտիվացիա է տղաների համար միմյանց հետ մրցակցելու առումով։ Եվ որ ամենակարևորն է՝ երկու թիմերում էլ խաղում են հայ տաղանդավոր պատանիներ ու երիտասարդներ։
-Իսկ մյուս մրցակիցը հայտնի՞ է։
-Նախնական պայմանավորվածություն ունենք «Տորպեդոյի» հետ։
-Ըստ Ձեզ՝ երկու խաղը բավակա՞ն է ձեր ուզած հետևություններն անելու համար։
-Իհարկե, ցանկալի կլիներ գոնե 3-4 խաղ անցկացնեինք, բայց կարծում եմ՝ այս երկու խաղերի միջոցով էլ բավականաչափ պատկերացում կկազմենք թիմի պատրաստվածության վերաբերյալ։
-Իսկ այս, այսպես ասած, նախապատրաստական շրջանով, թիմի շանսերն ինչպե՞ս եք գնահատում առաջնությունում։
-Նախ, ասեմ, որ մեր առաջնային նպատակը առաջին թիմին ֆուտբոլիստներ մատակարարելն է, հետո նոր մրցաշարում հնարավորինս բարձր տեղ գրավելը: Մեզ համար շատ բարդ է մրցակցելն Առաջին խմբի այն թիմերի հետ, որոնք առաջին տեղը գրավելու ու Բարձրագույն խումբ տեղափոխվելու խնդիր ունեն։ Այնտեղ հիմնականում խաղում են լեգիոներներ ու ԲԽ-ում ինչ-ինչ պատճառներով տեղ չգտած փորձառու հայ ֆուտբոլիստներ։ Ինչ խոսք, դա մեծ փորձ է մեր երիտասարդների համար, բայց ոչ հավասար պայմաններ մրցակցության համար։
Բացի դրանից, մենք միշտ չէ, որ մարզվում ենք նույն ֆուտբոլիստներով, նույն կազմով, քանի որ շատերը մարզվում են առաջին թիմի հետ ու միայն խաղից մեկ օր առաջ են միանում մեզ։ Մենք սրանով ևս զիջում ենք վերը նշված թիմերին խաղակցվածության առումով։
-Ինչո՞ւ են խաղացողները մարզվում առաջին թիմի հետ, բայց խաղում ձեզ հետ։
-Երբ Գրիգորյանը գլխավորեց առաջին թիմը, նա մեծ ուշադրություն դարձրեց մեր երկրորդ թիմի տղաներին, ինչը նրանց մոտ մեծ մոտիվացիա առաջացրեց, ու ես դա տեսա բոլոր առումներով։ Այդ իսկ պատճառով նա լավ խաղ անցկացրած, աչքի ընկած ֆուտբոլիստներին հրավիրում է առաջին թիմի հետ մարզվելու, ինչպես նաև խաղերին մասնակցելու։
-Այսինքն, առաջին թիմ հրավիրվող խաղացողները պարբերաբար փոփոխվում են․․․
— Խաղացողները հաճախ փոխվում են նշածս պատճառով։ Բացի դրանից, կոնկրետ դիրքի խաղացողների էլ են հրավիրում, երբ այդ դիրքի խաղացողը վնասվածք է ունենում։ Սա լավ հնարավորություն է ընձեռում, որ ֆուտբոլիստն իրեն լավագույն կողմերով դրսևորի ու հետագայում հաճախակի հրավիրվի առաջին թիմի հետ մարզվելու։
Ստելլա Բաբլոյան
