Մադրիդի «Ռեալի» նախագահ Ֆլորենտինո Պերեսը ողջունել է Աշխարհի ակումբային առաջնության լայնածավալ ձևաչափով անցկացումը։ Նա ընդգծել է մրցաշարի նշանակությունը ֆուտբոլի համաշխարհային զարգացման և երկրպագուների համար։
«Ցանկանում եմ շնորհակալություն հայտնել ՖԻՖԱ-ին և DAZN-ին այն հնարավորության համար, որն ընձեռել են երկրպագուներին՝ դիտելու աշխարհի լավագույն ակումբները նման հրաշալի մրցաշարում։ Սա առաջին Աշխարհի ակումբային առաջնությունն է այս ձևաչափով, և ես վստահ եմ, որ այն հաջող կլինի։ Մենք մեծ ոգևորությամբ ենք մասնակցում։
Մենք վերջապես հասել ենք մի բանի, որի համար երկար ժամանակ պայքարել ենք։ Ֆուտբոլը աշխարհի ամենագլոբալ մարզաձևն է, և տեխնոլոգիաների շնորհիվ մենք կարող ենք այս մրցաշարն անվճար հասանելի դարձնել հեռուստադիտողներին։ Սա նշանակում է, որ ամբողջ աշխարհի երեխաները կարող են դիտել «Ռեալի» խաղերը։ Ֆուտբոլը կփոխվի՝ շնորհիվ խոշոր ակումբների և տեխնոլոգիաների համագործակցության։ Ես եղել եմ նրանցից մեկը, ով ամենաշատն է պայքարել այս երազանքն իրականություն դարձնելու համար», — Պերեսի խոսքերն է մեջբերում DAZN-ը։
Հիշեցնենք, որ Աշխարհի ակումբային առաջնությունն անցկացվում է ԱՄՆ-ում՝ 2025 թվականի հունիսի 14-ից հուլիսի 13-ը։ Առաջին անգամ մրցաշարին մասնակցում է 32 թիմ՝ վեց տարբեր կոնֆեդերացիաներից։
