ՖԻՖԱ-ի Աշխարհի ակումբային առաջնության շրջանակում Մյունխենի «Բավարիան» այսօր 10։0 հաշվով ջախջախիչ հաղթանակ է տարել Նոր Զելանդիայի «Օքլենդ Սիթիի» նկատմամբ: Ընդ որում, սա դարձել է մրցաշարի պատմության ամենախոշոր հաշվով հաղթանակը։
Սակայն այս պարտությունը առանձնահատուկ համ էր ստացել՝ հաշվի առնելով «Օքլենդ Սիթիի» խաղացողների զբաղվածությունը ֆուտբոլային խաղադաշտից դուրս։ Թիմի անդամների մեծ մասը կիսապրոֆեսիոնալներ են, որոնք ֆուտբոլին զուգահեռ ունեն հիմնական աշխատանքներ։ Նրանք հանդիպմանը մասնակցելու համար ստիպված էին իրենց հաշվին արձակուրդ վերցնել աշխատավայրերից։
Մասնավորապես, թիմի կազմում խաղում են բեռնատարի վարորդ, պահեստի մենեջեր, գույքագետ, ըմպելիքների վաճառքի գործակալ, ֆիզկուլտուրայի ուսուցիչ, ներկանյութեր արտադրող ընկերության մենեջեր, ռեստորանային սպասարկող, լվացման ծառայության աշխատակից։ Թիմի դարպասապահն էլ՝ 28-ամյա Քոնոր Թրեյսին, վերահսկում է դեղագործական, սննդային և վերահսկվող դեղամիջոցների բաշխումը Նոր Զելանդիայի անասնաբույժներին՝ որպես անասնաբուժական պարագաների պահեստի վերահսկիչ։
Թիմի գլխավոր մարզչի ժամանակավոր պաշտոնակատարը՝ Պոլ Պոսան, նաև ատամնաբույժ է և ունի իր սեփական կլինիկան Ռանֆերլիում։
Միջազգային ԶԼՄ-ները «Բավարիայի» և «Օքլենդ Սիթիի» միջև այսօրվա խաղն անգամ համեմատում են Դավիթի և Գողիաթի միջև անհավասար մենամարտի հետ։
Թեև հաշիվն, իսկապես, խոշոր էր, «Օքլենդ Սիթիի» մարզիչներն ու խաղացողները նշել են, որ իրենց համար արդեն իսկ մեծ պատիվ էր խաղալ «Բավարիայի» դեմ՝ նմանօրինակ մրցաշարի շրջանակում։
