«Ինտերի» գլխավոր մարզիչ Սիմոնե Ինձագին կարող է գլխավորել Սաուդյան Արաբիայի առաջնությունում հանդես եկող «Ալ-Հիլալ» ակումբը։ Այս մասին հայտնել է լրագրող Սաշա Տավոլիերին X (նախկինում՝ Twitter) սոցիալական ցանցում։
Աղբյուրի փոխանցմամբ՝ մասնագետը որոշել է նոր գլուխ սկսել իր կարիերայում։ Նշվում է, որ ՈՒԵՖԱ-ի Չեմպիոնների լիգայի եզրափակչում «Ինտերի» և «Պարի Սեն Ժերմենի» միջև խաղի արդյունքը չի ազդի մարզչի որոշման վրա։ Այս պահին մասնագետի համագործակցությունը իր նոր թիմի հետ համաձայնեցված չէ։ Կողմերը քննարկում են համաձայնագրի մանրամասները։ Իտալացին Սաուդյան Արաբիայի թիմի հետ նախատեսվող պայմանագրով տարեկան կստանա 25 միլիոն դոլար։
«Ալ-Հիլալը» կարծում է, որ այս գործարքը իրատեսական է, քանի որ Ինձագիի ընտանիքը նախկինում այցելել է Ռիադ և ակումբի մարզաբազա, որտեղ նրանց դիմավորել է թիմի կիսապաշտպան Սերգեյ Միլինկովիչ-Սավիչը։
2024/2025 մրցաշրջանի ավարտին «Ինտերը» զբաղեցրել է երկրորդ տեղն Ա Սերիայի մրցաշարային աղյուսակում։
