Միջազգային սպորտային հետազոտությունների կենտրոնը (CIES) հրապարակել է իր հոբելյանական 100-րդ զեկույցը, որն անդրադառնում է արտերկրում հանդես եկող ֆուտբոլիստների վիճակագրությանը: Զեկույցն ընդգրկում է 100 երկրների ֆուտբոլիստների, որոնք 2020–2025 թթ. ընթացքում առնվազն մեկ անգամ խաղացել են 135 արտասահմանյան լիգաներում:
Հայաստանը զբաղեցրել է 98-րդ հորիզոնականը՝ հայտնվելով ամենացածր ցուցանիշ ունեցող երկրների շարքում: Միայն Նիգերն ու Բուրունդին ունեն արտասահմանում ավելի քիչ խաղացող ֆուտբոլիստներ: Ըստ վերջին տվյալների՝ այժմ ընդամենը 8 հայաստանցի ֆուտբոլիստ է հանդես գալիս արտասահմանյան ակումբներում:
Արտասահմանում հանդես եկող հայ ֆուտբոլիստներ
Հենրիխ Մխիթարյան («Ինտեր», Իտալիա)
Տիգրան Բարսեղյան («Սլովան», Սլովակիա)
Վահան Բիչախչյան («Լեգիա», Լեհաստան)
Նարեկ Գրիգորյան («Ֆարուլ», Ռումինիա)
Էդգար Պիլոյան («Բոտև», Բուլղարիա)
Արթուր Սերոբյան («Շերիֆ», Մոլդովա)
Ստեփան Մկրտչյան («Օսիեկ», Խորվաթիա)
Ուգոչուկվու Իվու («Ռուբին», Ռուսաստան)
Զեկույցում բացառվել են այն ֆուտբոլիստները, որոնք չեն մարզվել Հայաստանում, նույնիսկ եթե հանդես են գալիս Հայաստանի ազգային հավաքականում (օրինակ՝ Էդուարդ Սպերցյան, Նաիր Տիկնիզյան):
Նշենք, որ հայաստանցի ֆուտբոլիստների արտահանումը վերջին տարիներին կայուն անկում է ապրում: Եթե 2020 թվականին արտերկրում խաղում էր 13 ֆուտբոլիստ, ապա 2025-ին այդ թիվը կրճատվել է մինչև 8: Վերջին վեց տարիներին արտասահմանում հանդես է եկել ընդամենը 27 հայաստանցի խաղացող:
