«Բարսելոնան» համաձայնության է եկել հարձակվող Ռաֆինյայի հետ՝ նրա պայմանագիրը երկարաձգելու վերաբերյալ, որը լրանում է 2027 թվականի ամռանը։ 28-ամյա ֆուտբոլիստի հետ նոր աշխատանքային պայմանագիրը կգործի մինչև 2028 թվականի հունիսը։ Այս մասին հայտնել է լրագրող Ֆաբրիցիո Ռոմանոն X (նախկինում՝ Twitter) սոցիալական ցանցում։
Աղբյուրի տվյալներով՝ բրազիլացի ֆուտբոլիստը պայմանագիր կկնքի կապտանռնագույնների գլխավոր մարզիչ Հանս-Դիտեր Ֆլիկից հետո, որը նոր աշխատանքային պայմանագիր կկնքի չորեքշաբթի՝ մայիսի 21-ին։
Ռաֆինյան կատալոնական ակումբում խաղում է 2022 թվականի ամռանից։ Այս մրցաշրջանում նա բոլոր մրցաշարերում անցկացրել է 56 խաղ, խփել 34 գոլ և կատարել 25 գոլային փոխանցում։ Transfermarkt պորտալում տրամադրված տեղեկատվության համաձայն՝ ֆուտբոլիստի շուկայական արժեքը կազմում է 80 միլիոն եվրո։
