«Բարսելոնայի» նախագահ Ժոան Լապորտան հաստատել է, որ ակումբը կերկարաձգի հարձակվող Ռաֆինյայի հետ պայմանագիրը, որը լրանում է 2027 թվականի ամռանը։
«Ռաֆինյայի հետ նոր պայմանագիր կկնքվի։ Դեկուն («Բարսելոնայի» մարզական տնօրեն — խմբ․) լավ հարաբերություններ ունի Ռաֆայի հետ։ Խաղացողը իրեն շատ ներգրավված է զգում նախագծում։ Մենք համաձայնության կհասնենք, քանի որ ուզում ենք, որ նա մնա, ինչպես որ ֆուտբոլիստն ինքն է ուզում», — Լապորտայի խոսքերը X (նախկինում՝ Twitter) սոցիալական ցանցում մեջբերում է լրագրող Ֆաբրիցիո Ռոմանոն։
Ռաֆինյան այս մրցաշրջանում բոլոր մրցաշարերում անցկացրել է 56 խաղ, խփել 34 գոլ և կատարել 25 գոլային փոխանցում։ Շատ մարզական հրատարակություններ 28-ամյա հարձակվողին անվանում են «Ոսկե գնդակի» հիմնական հավակնորդներից մեկը։
