Հայաստանի ֆուտզալի առաջնությունը մոտենում է եզրագծին. մայիսի 21-ին և 25-ին տեղի կունենան փլեյ-օֆֆի եզրափակիչ հանդիպումները, որտեղ միմյանց դեմ կմրցեն առաջնության երկու գլխավոր ֆավորիտները՝ «Յունիսպորտը» և «Երևանը»։ Եթե թիմերը մեկական հաղթանակ տանեն, ապա չեմպիոնին որոշելու համար կանցկացվի վճռորոշ երրորդ հանդիպումը:
Անկասկած այս հանդիպումները կլինեն մրցաշրջանի գագաթնակետը՝ նշանավորելով լարված պայքարի եզրափակիչ ակորդը:
«Յունիսպորտը», որն իր առաջին մրցաշրջանն է անցկացնում Բարձրագույն խմբում, անհավանական մրցաշրջան անցկացրեց՝ հաղթանակներ տանելով իր բոլոր 14 հանդիպումներում: Խփած և բաց թողած գոլերի տարբերությունը 114:24 է: Ազգային առաջնությունում թիմի ի հայտ գալն, անկասկած, նոր մրցակցություն հաղորդեց՝ էապես բարձրացնելով առաջնության նկատմամբ հետաքրքրությունը։
Ինչ վերաբերում է «Երևանին», ապա վերջինիս խփած և բաց թողած գոլերի տարբերությունը 132:32 է:
ՖՈՏՈՇԱՐՔ
Հատկանշական է, որ «Յունիսպորտի» և «Երևանի» խաղացողները կազմում են Հայաստանի ազգային հավաքականի առանցքը։ «Յունիսպորտից» հավաքական են հրավիրվել Համլետ Մանուկյանը, Սարգիս Մարգարյանը և Էմին Կարաբեկյանցը, իսկ «Երևանից»՝ Ռաֆիկ Մելիքյանը, Միհրան Դերմենջյանը, Գարեգին Մաշումյանը, Արթուր Պատաթյանը, Կարեն Խաթուևը։ Այս ֆուտզալիստները նշանակալի դեր են ունեցել հավաքականի պատմական հաջողությունում՝ դուրս գալով Եվրոպայի 2026 թվականի առաջնության եզրափակիչ փուլ։
Լարվածության լրացուցիչ շերտ է հաղորդում նաև ռմբարկուների մրցավազքը։ Միհրան Դերմենջյանը ներկայում առաջատարն է 33 գոլով, իսկ Համլետ Մանուկյանը 32 գոլ ունի իր ակտիվում:
