«Միլանի» 26-ամյա կիսապաշտպան Տեյանի Ռեյնդերսը իր ներկայացուցիչներին հստակեցրել է, որ իր համար առաջնահերթություն է «Մանչեսթեր Սիթի» տեղափոխությունն իրականացնելը՝ չնայած «Ռեալ Մադրիդի» հետաքրքրությանը։ Այս մասին հայտնել է Sky Sport France-ը։
Աղբյուրի փոխանցմամբ՝ խաղացողը երազում է խաղալ Խոսեպ Գվարդիոլայի գլխավորությամբ։ Նշվում է, որ լինելով «Բարսելոնայի» տիկի-տակայի մեծ երկրպագու, կիսապաշտպանը գիտի, որ կկարողանա աճել և զարգանալ իսպանացու գլխավորությամբ։ Հաղորդվում է նաև, որ անգլիացիներն արդեն հասել են ֆուտբոլիստի հետ անձնական պայմանների վերաբերյալ առաջին համաձայնություններին։
Այս մրցաշրջանում Ռեյնդերսը բոլոր մրցաշարերում անցկացրել է 53 խաղ, խփել 15 գոլ և կատարել հինգ գոլային փոխանցում։ Ֆուտբոլիստի ներկայիս աշխատանքային պայմանագիրը ակումբի հետ նախատեսված է մինչև 2030 թվականի ամառը։ Transfermarkt պորտալում տրամադրված տեղեկատվության համաձայն՝ ֆուտբոլիստի շուկայական արժեքը կազմում է 50 միլիոն եվրո։
