«Նոթինգհեմ Ֆորեստը» հաստատել է, որ թիմի հարձակվող Թայվո Ավոնիին հաջողությամբ վերականգնվում է լուրջ վիրահատությունից հետո։ Նա վնասվածք է ստացել մայիսի 11-ին «Լեսթերի» դեմ խաղում՝ ուժեղ հարված ստանալով որովայնի հատվածում։
Ավոնիին շտապ վիրահատվել է, և ներկայում նրա կյանքին վտանգ չի սպառնում։
Ակումբը հայտարարությունում ընդգծել է, որ այս դեպքը հիշեցնում է ֆուտբոլիստների առողջության առաջնահերթության մասին։
«Մեր ակումբի սեփականատեր Էվանգելոս Մարինակիսն արձագանքել է միջադեպին ոչ թե որպես գործարար, այլ որպես ընտանիքի անդամ։ Նրա ներգրավվածությունը դաշտում զուտ մարդկային էր՝ տեսնելով մեր խաղացողի ծանր վիճակը»,- նշվում է հայտարարությունում։
Ակումբը հերքել է լուրերը, թե տեղի է ունեցել բախում գլխավոր մարզիչ Նունու Սանտուի հետ՝ պարզաբանելով, որ բոլորն ընդամենը խորը հիասթափություն են ապրել՝ տեսնելով, որ վնասվածք ստացած ֆուտբոլիստին թույլ են տվել շարունակել խաղը։
Ի վերջո, «Նոթինգհեմ Ֆորեստը» կոչ է արել չտարածել կեղծ տեղեկություններ և հորդորել ֆուտբոլում ներգրավված բոլոր կողմերին առաջնահերթություն տալ խաղացողների բարեկեցությանը՝ սոցիալական ցանցերի թրենդների կամ անձնական ճանաչման փոխարեն։
Ավելի վաղ լուրեր էին տարածվել, որ ֆուտբոլիստն արհեստական կոմայի մեջ է։
