ՈւԵՖԱ Ազգերի լիգայի անցումային խաղերի շրջանակներում Հայաստանի ազգային հավաքականը Վազգեն Սարգսյանի անվան «Հանրապետական» մարզադաշտում պարտվեց Վրաստանի ընտրանուն 0:3 հաշվով: Այդ կապակցությամբ վրացական Sportall լրատվական պորտալը վերհիշել է Միկաուտաձե — Վան’տ Սխիպ հարաբերությունների մասին` բումերանգի օրենքն առաջ բերելով։
«ՈւԵՖԱ Ազգերի լիգայի փլեյ-օֆֆի առաջին խաղում Հայաստանի հավաքականը Երևանում 0:3 հաշվով պարտվեց Վրաստանին, ինչը մեծ քայլ էր Վիլի Սանյոլի թիմի համար B դիվիզիոնում տեղն ապահովելու ուղղությամբ։ Սակայն դեռ պատասխան հանդիպումն առջևում է, և մեր թիմը պետք է գործն ավարտին հասցնի, ինչը, հուսանք, հանգիստ կստացվի։
«Խաչակիրները» 2020 թվականի աշնանը երկու անգամ մրցեցին հարևանների հետ․ Կիպրոսում 2:2 խաղացին, իսկ Թբիլիսիում 1:2 պարտվեցին։ Երեկ հստակ երևաց, թե որքան մեծ առաջընթաց է գրանցել Վիլի Սանյոլի թիմն այս հինգ տարիների ընթացքում։ Մեր հավաքականը շարունակում է առաջ շարժվել, իսկ ֆրանսիացի մասնագետն էլ մեծ հաջողությունների է հասնում մարզչական կարիերայում։ Սակայն Աշխարհի առաջնության ընտրական փուլում մեզ շատ ծանր մարտեր են սպասվում ուժեղագույն մրցակիցների դեմ, և բոլորս մեծ հույսեր ունենք, որ մեր ֆուտբոլիստները նորից կուրախացնեն մեզ, թեև դա բավականին դժվար կլինի։
Երևանի Վազգեն Սարգսյանի անվան «Հանրապետական» ստադիոնում Գիորգի Միկաուտաձեն դուբլ ձևակերպեց և ցույց տվեց իր նախկին մարզիչ Ջոն վան’տ Սխիպին, թե որքան անարդար էին վերաբերվել իրեն «Այաքսում»։ Վրացին հոլանդական ակումբում ներքին ինտրիգների զոհ դարձավ։ Telegraaf-ը գրում էր, որ սպորտային տնօրեն Սվեն Միսլինթատը թիմի ուժեղացման համար ծախսել էր 100 միլիոն եվրոյից ավելի, ինչը գերազանցում էր այդ ֆուտբոլիստների (Յոսիպ Սուտալո, Գիորգի Միկաուտաձե, Կարլոս Ֆորբս, Գաստոն Ավիլա, Չուբա Ակպոմ) իրական արժեքը։ Հենց նա էլ նախաձեռնել էր Գիորգիի տրանսֆերը՝ առանց մարզչի համաձայնության։
Շուտով Միսլինթատին աշխատանքից ազատեցին՝ կասկածելով ֆինանսական մեքենայություններ իրականացնելու մեջ, սակայն ոչինչ չկարողացան ապացուցել։ Այնուհետև թիմի գլխավոր մարզիչ Մաուրիս Սթեյնը պաշտոնանկ արվեց, և նրա փոխարեն նշանակվեց Ջոն վան’տ Սխիպը, որը Միկաուտաձեին քիչ խաղաժամանակ տրամադրեց։ Ի վերջո, նա նույնպես ստիպված եղավ լքել «Այաքսը» և աշխատանքի անցավ Հայաստանի հավաքականում։ Վրաստանի դեմ խաղից առաջ նա հայտարարեց, որ Միկաուտաձեին չէր կարող շատ խաղաժամանակ տալ, քանի որ հարձակման գծում ուներ Բրոբիին և Ակպոմին։ Սակայն, վերջիվերջո, լավագույն տարբերակը գտնվեց, և նա ուրախ է, որ վրացու կարիերան հաջող զարգանում է «Լիոնում»։
Գիորգիին «Այաքսում» տեսնում էին որպես Դուշան Տադիչի իրավահաջորդ, սակայն նա հնարավորություն չստացավ։ Բայց նա իր որակները ապացուցեց ու դեռ շատ անգամներ կպացուցի։ Նա լավ ֆուտբոլիստ է, լավ մարդ, իսկական վրացի և արժանի է միայն լավագույնին։
Ինչ վերաբերում է Վան’տ Սխիպին, ապա նրա պայմանագիրը կնքված է 1+1 ձևաչափով, և, հավանաբար, նա արդեն հասկացել է, թե որքան ծանր իրավիճակում է հայտնվել։
Հնարավոր է, որ տարվա վերջում ստիպված լինի հեռանալ։ Նրա ներկայիս վիճակը հիշեցնում է «Միմինո» ֆիլմի հայտնի դրվագը. «Ձեր նմանները խայտառակություն են ռեսպուբլիկան»։
Վրացական պորտալը կցել է նաև ֆիլմի տվյալ հատվածի տեսանյութը.
