Անգլիայի Պրեմիեր լիգայի 2024/2025 մրցաշրջանի 29-րդ տուրում Լոնդոնի «Արսենալն» ընդունել է «Չելսիին»։Հանդիպումն ավարտվել է զինագործների՝ 1-0 հաշվով հաղթանակով։
Հանդիպման միակ գոլը 20-րդ րոպեին խփել է «Արսենալի» կիսապաշտպան Միկել Մերինոն: Գոլային փոխանցումը կատարել է կիսապաշտպան Մարտին Էդեգորը:
Անցկացրած 29 խաղից հետո «Արսենալը» Պրեմիեր լիգայի մրցաշարային աղյուսակի երկրորդ տեղում է՝ 58 միավորով։ Նույնքան խաղից հետո «Չելսին» 49 միավորով չորրորդն է։
«Լիվերպուլը» 29 խաղից հետո 70 միավորով գլխավորում է Անգլիայի Պրեմիեր լիգայի 2024/25 մրցաշրջանի մրցաշարային աղյուսակը։
Տուրի մյուս խաղում «Ֆուլհեմը» սեփական հարկի տակ ընդունել է «Տոտենհեմին» և երկու անպատասխան գնդակ է ուղարկել մրցակցի դարպասը:
Հանդիպման առաջին գոլը խփվել է 78-րդ րոպեին։ Գոլի հեղինակ է դարձել «Ֆուլհեմի» բրազիլացի հարձակվող Ռոդրիգո Մունիսը։ 88-րդ րոպեին «Տոտենհեմի» նախկին խաղացող Ռայան Սեսենյոնը կրկնապատկել է տանտերերի առավելությունը։
Այս հաղթանակից հետո «Ֆուլհեմն» այժմ ունի 45 միավոր և բարձրացել է Պրեմիեր լիգայի մրցաշարային աղյուսակի ութերորդ հորիզոնական։ «Տոտենհեմը» 29 խաղից հետո ունի 34 միավոր և 13-րդ տեղում է։
