«Բարսելոնայի» բժիշկ Կառլես Մինյարոն մահացել է «կապտանռնագույնների» մարզման ընթացքում, այս մասին տեղեկացնում է AS-ը։ Այդ պատճառով Լա Լիգայի 27-րդ տուրի՝ «Օսասունայի» հետ հանդիպումը հետաձգվեց։
Ակումբի նախագահ Ժոան Լապորտան հայտարարել է, որ Մինյարոն սիրված և հարգված մասնագետ էր, ով միշտ աջակցում էր բոլորին։
«Բոլորը շատ վշտացած են։ Սա մեծ կորուստ է մեզ համար։ Նա միշտ ներկա էր խաղերին, աջակցում էր բոլորին, ոչ միայն խաղացողներին։ Նա երբեք ոչ ոքի չէր մերժում և հիանալի բժիշկ էր։
Այսպիսի պահերը մեզ ավելի ուժեղ են դարձնում։ Խաղի հետաձգման հարցում մեր որոշումը լավագույնն էր։ Մենք անմիջապես կապվեցինք Լա Լիգայի նախագահի հետ՝ իրավիճակը ներկայացնելու համար։ Նա լիովին հասկացավ մեզ, և խաղի հետաձգման բոլոր գործընթացները մեկնարկեցին։
«Օսասունայի» նախագահն ու ակումբը մեծ ըմբռնումով մոտեցան այս խնդրին։ Նրանք անմիջապես հասկացան իրավիճակի լրջությունը և իրենց լավագույն կողմով դրսևորեցին։ Ցանկանում եմ շնորհակալություն հայտնել նաև մրցավարներին՝ իրենց աջակցության համար։
Սա շատ տխուր լուր է «Բարսելոնայի» համար։ Բոլորս շոկի մեջ ենք, սա անսպասելի կորուստ էր։ Խաղացողները խիստ հուզված էին։ Մենք կապ ենք հաստատել նրա մոր և կնոջ հետ՝ նրանց լիարժեք աջակցություն տրամադրելու համար։ Կառլեսն ունի երկու երեխա՝ Ժերարն ու Անան, և մենք նրանց կմատուցենք անհրաժեշտ աջակցությունը։
Մենք խնդրեցինք մեր երկրպագուներին ըմբռնումով մոտենալ խաղի հետաձգմանը։ Երբ բարձրախոսով հայտարարեցինք այդ մասին, երկրպագուները լիովին աջակցեցին մեզ։ Շնորհակալություն բոլորին», – ասել է «Բարսելոնայի» նախագահ Ժոան Լապորտան Barca One ալիքին։
