«Յուվենտուսի» երկրպագուները պատրաստվում են երկօրյա բողոքի ակցիա անցկացնել:
Թուրինյան ակումբի ուլտրասները հայտարարել են, որ կսուլեն ֆուտբոլիստներին, մարզչին և ղեկավարությանը «Վերոնայի» դեմ տնային խաղից առաջ և խաղի ժամանակ: Ա Սերիայի 27-րդ տուրի հանդիպումը կկայանա վաղը երեկոյան: Բացի այդ, երկրպագուները բողոքի ակցիա են նախատեսում այսօր՝ խաղի նախորդ օրը։
Տիագո Մոտտայի թիմն ավելի վաղ դուրս էր մնացել Իտալիայի գավաթից և Չեմպիոնների լիգայից և այժմ ելույթները շարունակում է միայն Ա Սերիայում: «Յուվենտուսը» ներկայում զբաղեցնում է 4-րդ տեղը՝ հինգերորդ տեղում ընթացող «Լացիոյին» գերազանցելով 2 միավորով:
«Ցավոք սրտի, այսօր մենք հասել ենք մի կետի, երբ այլևս չենք կարող հանդուրժել մի նախագիծ, որն ակնհայտորեն ձախողվել է, որտեղ ոչինչ տրամաբանական իմաստ և հստակ զարգացում չունի։
«Յուվենտուսի» երկրպագուները հոգնել են ձեզնից և, ցավոք, այժմ իրենց վրդովմունքն են արտահայտում խաղերի ժամանակ ձեզ սուլելով և վիրավորելով: Մենք միշտ ցանկացել ենք խուսափել նման արձագանքից, բայց ձեր վերաբերմունքն ու անտարբերությունն այնպիսի պատմական ակումբի նկատմամբ, ինչպիսին «Յուվենտուսն» է, այլևս անընդունելի է։
Դուք կհասկանաք, որ մենք այլևս չենք կարող դիմանալ սրան։ Դուք կզգաք մեր հիասթափությունը։ Հուսով ենք, որ դա ձեր՝ խաղացողների, մարզչի և ղեկավարության մեջ ինչ-որ բան կարթնացնի, որը գոնե մասամբ կարող է փրկել այս աղետալի մրցաշրջանը, որը չէր եղել արդեն 14 տարի:
Հրավիրում ենք «Յուվենտուսի» բոլոր երկրպագուներին արտահայտելու իրենց կարծիքը և միանալու մեր ակցիաներին կիրակի և երկուշաբթի մարզադաշտում», — ասվում է երկրպագուների տարածած հայտարարության մեջ, որը մեջբերում է TuttoJuve-ը:
