«Օլդ Թրաֆորդը» միշտ էլ համարվել է վայր, որտեղ ֆուտբոլիստները կարող էին հաղթել Պրեմիեր լիգան և իրականացնել իրենց երազանքները։ Սակայն Սըր Ալեքս Ֆերգյուսոնի հեռանալուց հետո (2013թ․) պատկերն էականորեն փոխվեց։
Վերջին տարիներին «Մանչեսթեր Յունայթեդից» հեռացած շատ խաղացողներ ավելի հաջող կարիերա են ունեցել նոր ակումբներում։ Թեև ակումբի երկրպագուները անհանգստանում են Մարկուս Ռեշֆորդի ապագայի համար, ով վարձակալությամբ տեղափոխվել է «Ասթոն Վիլա», GiveMeSport-ը կազմել է ֆուտբոլիստների ցանկ, որոնք հաջողության են հասել «կարմիր սատանաների» ճամբարը լքելուց հետո։
Ցանկում ընդգրկվել է նաև Հայաստանի ազգային հավաքականի նախկին ավագ, կիսապաշտպան Հենրիխ Մխիթարյանը։
«2016/17 մրցաշրջանում Ժոզե Մոուրինյոյի ղեկավարությամբ «Մանչեսթեր Յունայթեդը» հաղթեց Եվրոպա Լիգան, և այդ հաջողության կարևոր մասնիկներից մեկը Հենրիխ Մխիթարյանն էր։ Այնուամենայնիվ, նրա ելույթները Պրեմիեր լիգայում հաճախ գնահատվել են անհաջող՝ հաշվի առնելով, որ նա «Օլդ Թրաֆորդում» գրանցել էր ընդամենը 13 գոլ և 10 գոլային փոխանցում։
Անգլիայից հեռանալուց հետո Մխիթարյանը շարունակել է կարիերան Իտալիայում՝ սկզբում «Ռոմայում», իսկ 2022-ին տեղափոխվել «Ինտեր»։ Հենց այնտեղ էլ Հայաստանի հավաքականի նախկին ավագը հասել է իր ամենամեծ հաջողություններին՝ խաղալով Չեմպիոնների լիգայի եզրափակչում և 2023/24 մրցաշրջանում դառնալով Իտալիայի չեմպիոն»,- գրված է կայքում։
| Ֆուտբոլիստ | Տարիները «Յունայթեդում» | Նշանակալի ակումբներ հեռանալուց հետո | |
|---|---|---|---|
| 1. | Կրիշտիանու Ռոնալդու | 2003–2009 | «Ռեալ Մադրիդ», «Յուվենտուս», «Ալ-Նասր» |
| 2. | Ժերար Պիկե | 2007–2008 | «Բարսելոնա» |
| 3. | Դիեգո Ֆորլան | 2002–2004 | «Վիլյառեալ», «Ատլետիկո Մադրիդ», «Ինտեր», «Ինտերնասիոնալ» |
| 4. | Անխել Դի Մարիա | 2014–2015 | ՊՍԺ, «Յուվենտուս», «Բենֆիկա» |
| 5. | Սկոտ Մաքթոմինեյ | 2017–2024 | «Նապոլի» |
| 6. | Մեմֆիս Դեպայ | 2015–2017 | «Լիոն», «Բարսելոնա», «Ատլետիկո Մադրիդ», «Կորինտիանս» |
| 7. | Անխել Գոմես | 2019–2020 | «Լիլ», «Բոավիստա» |
| 8. | Էնթոնի Էլանգա | 2022–2023 | «Նոթինգհեմ Ֆորեստ» |
| 9. | Հենրիխ Մխիթարյան | 2016–2018 | «Արսենալ», «Ռոմա», «Ինտեր» |
| 10. | Թիմ Հովարդ | 2003–2007 | «Էվերթոն», «Կոլորադո Ռապիդս», «Մեմֆիս 901» |
