Առաջարկում ենք ծանոթանալ օրերս կայացած մի շարք կարևոր տրանսֆերներին ձմեռային տրանսֆերային պատուհանի ընթացքում։
✅ Հայաստանի ազգային հավաքականի կիսապաշտպան Վահան Բիչախչյանը «Պոգոնից» տեղափոխվել է լեհական մեկ այլ ակումբ՝ «Լեգիա»: Հայ ֆուտբոլիստը պայմանագիր է կնքել նոր ակումբի հետ մինչև 2027 թվականի ավարտը։ Վարշավայի ակումբի կազմում նա հանդես կգա 21 համարի մարզաշապիկով։ Ֆուտբոլիստը միացել է թիմին, որը մարզվում է Իսպանիայում։
✅ Արթուր Սերոբյանն «Արարատ-Արմենիայից» տեղափոխվել է «Շերիֆ»։ Կողմերը անցել են բոլոր անհրաժեշտ գործընթացները և ստորագրել աշխատանքային պայմանագիրը, հայտնել է մոլդովական ակումբի պաշտոնական կայքը։ Սա Հայաստանի հավաքականի 21-ամյա ֆուտբոլիստի կարիերայի երկրորդ արտասահմանյան ակումբն է պորտուգալական «Կասա Պիայից» հետո։
✅ 29-ամյա ձախ պաշտպան Ջեյմս Սանթոսը, տեղափոխվել է «Նոա»։ Սանթոսը «Նոայում» հանդես կգա 5 համարի մարզաշապիկով: Բրազիլացի ֆուտբոլիստը Հայաստան է տեղափոխվել 2019 թվականին և հանդես է եկել «Արարատ», «Ուրարտու», «Ալաշկերտ» և «Փյունիկ» ակումբներում։ Նրա վերջին ակումբը «Փյունիկն» էր:
✅ «Արարատ-Արմենիա» է վերադարձել բրազիլացի պաշտպան Ռոմերսիոն։ Բրազիլացի ֆուտբոլիստը հայկական թիմի կազմում անցկացրած 2 մրցաշրջանների ընթացքում մասնակցել է 31 հանդիպման, դարձել 2 գոլի հեղինակ: 2023 թ-ի հունվարին Հայաստանից հեռանալուց հետո հանդես է եկել «Սան Բերնարդո», «Ժուվենտուդե» ու «Բոտաֆոգո ՊԲ» թիմերի կազմում: Կարիերայի ընթացքում Ռոմերսիոյի միակ արտասահմանյան ակումբը «Արարատ-Արմենիան» է:
✅ Տիգրան Ավանեսյանը փոխել է ակումբային գրանցումը։ 22-ամյա կիսապաշտպանը Կալինինգրադի «Բալթիկայից» տեղափոխվել է Ռուսաստանի երկրորդ դիվիզոնի մեկ այլ ակումբ՝ Տուլայի «Արսենալ»։ Կողմերի միջև կնքվել է 2 տարվա պայմանագիր՝ մինչև 2027 թվականը, տրանսֆերի արժեքը կազմել է 7 միլիոն 350 հազար ռուբլի։
✅ Չարենցավանի «Վան» է տեղափոխվել Նիգերիացի հարձակվող Մալիկ Օդեյինկան։ 18-ամյա ֆուտբոլիստը Գելենջիկի «Վիստայի» սան է, հանդես է եկել Տուլայի «Արսենալ» ֆուտբոլային ակումբում:
Օդեյինկան «Վան» է տեղափոխվել «Արսենալ» ֆուտբոլային ակումբից։
✅ «Բավարիայի» կիսապաշտպան Այրոն Իբրահիմովիչը մրցաշրջանի երկրորդ հատվածը կանցկացնի Ա Սերիայում։ Ֆուտբոլիստը վարձավճարով տեղափոխվել է «Լացիո»։ Գերմանական գրանդի կազմում այս մրցաշրջանում նա անցկացրել է 3 հանդիպում։ Իբրահիմովիչի տրանսֆերային արժեքը գնահատվում է 4 մլն եվրո։
✅ Նիդեռլանդացի հարձակվող Դոնել Մալենը պաշտոնապես միացել է Բիրմինգհեմի «Աստոն Վիլային»։ Անգլիական ակումբը ֆուտբոլիստի տրանսֆերի համար վճարել է 25 միլիոն եվրո Դորտմունդի «Բորուսիային»։ Մալենը 41 հանդիպում է անցկացրել Նիդեռլանդների հավաքականի կազմում և դարձել է 9 գոլի հեղինակ։
✅ Արգենտինայի հավաքականի կազմում աշխարհի չեմպիոն դարձած կիսապաշտպան Տյագու Ալմադան կարիերան կշարունակի Եվրոպայում։ «Բոթաֆոգոյի» ֆուտբոլիստը վարձավճարով տեղափոխվել է ֆրանսիական «Լիոն»։ 23-ամյա ֆուտբոլիստը մինչ այս հանդես է եկել նաև ամերիկյան «Ատլանտա Յունայթեդի» և արգենտինական «Վելես Սարսֆիլդի» կազմում։
✅ Պորտուգալական «Վիտորիա Գիմարաեշի» աջ պաշտպան Ալբերտո Կոստան տեղափոխվել է «Յուվենտուս»։ Պորտուգալիայի երիտասարդական հավաքականի ֆուտբոլիստը թուրինյան ակումբի հետ կնքել է 4,5 տարվա պայմանագիր։ «Յուվենտուսը» ֆուտբոլիստի տրանսֆերի դիմաց վճարել է 13,8 մլն եվրո (Transfermarkt):
✅ 33-ամյա կոլումբիացի կիսապաշտպան Խամես Ռոդրիգեսը տեղափոխվել է Մեքսիկական «Լեոն»։ Ֆուտբոլիստը խզել է պայմանագիրը «Ռայո Վալեկանոյի» հետ և թիմից հեռացել ազատ գործակալի կարգավիճակով։ Նա իսպանական ակումբ էր տեղափոխվել ընթացիկ մրցաշրջանի սկզբում։ Այս մրցաշրջանում Խամեսը մադրիդյան ակումբի կազմում մասնակցել է 7 հանդիպման և դարձել մեկ գոլային փոխանցման հեղինակ։
Շարքի նախորդ մասերը՝
➡️ Հայ ֆուտբոլիստների նոր թիմերը, անգլիական ակումբների նորեկները
➡️ Սելարայանի նոր թիմը, Ա Սերիայի ակումբի ռեկորդը, դարպասապահների տեղափոխություններ Եվրոպայում
➡️ Ադամյանը փոխել է ակումբային գրանցումը, Տոտենհեմի նոր դարպասապահը, Գաբիգոլը նոր ակումբ ունի
