«Ինտերի» հայ կիսապաշտպան Հենրիխ Մխիթարյանը Իտալիայի Սուպերգավաթի խաղարկության կիսաեզրափակիչի «Ատալանտայի» դեմ կայանալիք խաղից առաջ խոսել է առաջիկա հանդիպման և իր մարզավիճակի մասին։
«Մրցաշրջանի սկզբում ես մարզավիճակիս գագաթնակետին չէի, բայց ժամանակի ընթացքում ես վերադարձա իմ լավագույն մարզավիճակին։ Ֆրատեզիի և Զիելինսկու հետ մրցակցությունը մղեց ինձ կատարելագործվելու:
Ես չեմ կենտրոնանում իմ տարիքի վրա. փոխարենը, ես երախտապարտ եմ, թե ինչպես են ինձ ամեն օր մարտահրավեր նետում, որպեսզի ցուցադրեմ իմ լավագույն որակները և վաստակեմ տեղս մեկնարկային կազմում։
Մենք բոլորս ցանկանում ենք խաղալ, բայց այստեղ ենք, որպեսզի աջակցենք միմյանց և տանք մեր լավագույնը հաղթանակի համար:
«Ինտերը» վերադարձել է Ռիադ, որտեղ երկու անգամ նվաճել է Սուպերգավաթի տիտղոսը: Մենք հույս ունենք կրկնել այդ հաջողությունը։
Գիտակցում ենք «Ատալանտայի» ուժը, բայց հուսով ենք, որ մեր երկրպագուները կօգնեն մեզ զգալ ինչպես տանը և հաղթանակ ապահովել»,- Մխիթարյանի խոսքերն է մեջբերում SempreInter-ը:
Իտալիայի Սուպերգավաթի խաղարկության կիսազերափակիչի «Ինտեր» — «Ատալանտա» հանդիպումը կկայանա վաղը՝ հունվարի 2-ին, ժամը 23։00-ին։ Կիսաեզրափակիչի մյուս խաղում միմյանց դեմ կմրցեն Թուրինի «Յուվենտուսն» ու «Միլանը»։
