Այսօր՝ դեկտեմբերի 13-ին հայտնի դարձավ, որ ՈւԵՖԱ-ն պատժամիջոցներ է կիրառել Հայաստանի ֆուտբոլի ֆեդերացիայի նկատմամբ։ Հետաքննության առիթ է հանդիսացել Ազգերի լիգայի խաղարկության 5-րդ տուրի Հայաստան — Ֆարերյան կղզիներ հանդիպումը (0:1)։
Հաղորդվում է, որ մարզադաշտում կիրառվել են պիրոտեխնիկա (ճայթուկներ), իսկ երկրպագուները բարձրացրել են արգելված բնույթի պաստառներ։ Ճայթուկների օգտագործման համար նշանակվել է 20․000 եվրո տուգանք, իսկ պաստառների համար՝ 17.500 եվրո։
Կառույցից հայտնել են, որ եթե սխալները կրկնվեն, ավելի խիստ պատժամիջոցներ կկիրառվեն։ Միևնույն ժամանակ, ՈւԵՖԱ-ն ՀՖՖ-ին հանձնարարել է հաջորդ խաղում, որը կայանալու է Հայաստանում, մարզադաշտի 500 նստատեղ դատարկ թողնել՝ հարավային և հարավ-արևելյան տրիբունաներում:
