«Մանչեսթեր Յունայթեդի» գլխավոր մարզիչ Ռուբեն Ամորիմը համեմատել է իր կարիերայի սկիզբը «Օլդ Թրաֆորդում» «Սպորտինգում» ունեցած սկզբնական փորձի հետ։
Նախօրեին «Յունայթեդը» սեփական դաշտում 3:2 հաշվով պարտվեց «Նոթինգեմ Ֆորեսթին», ինչը դարձավ Ամորիմի գլխավորությամբ թիմի երկրորդ անընդմեջ պարտությունը՝ շաբաթվա սկզբին 2:0 հաշվով «Արսենալից» կրած պարտությունից հետո։
Այս իրավիճակը Ամորիմին հիշեցնում է իր մեկնարկը «Սպորտինգում», որտեղ նա նույնպես դժվարություններ ուներ, բայց ի վերջո թիմը հաղթեց 17 հանդիպումից 16-ը՝ նախքան Ռուբենի տեղափոխությունը «Յունայթեդ»։
«Սկզբում «Սպորտինգում» ինձ հետ նույնը տեղի ունեցավ՝ նույնիսկ ավելի վատ։ Ինձ համար սա նույն զգացողությունն է։ Համաշխարհային մակարդակում դա այլ կերպ է դիտվում, որովհետև դուք գիտեք Պորտուգալիայի «Սպորտինգը», բայց «Մանչեսթերի» վրա ավելի մեծ ուշադրություն է կենտրոնացված։ Սակայն ինձ համար սա նույնն է, նույն զգացողությունը։
Եթե դուք ֆուտբոլում փոքր-ինչ փորձ ունեք, գիտեք, որ նման բան տեղի է ունենում շատ ակումբներում։ Եվ մենք պետք է շարունակենք անել այն, ինչ անում ենք՝ բարելավելով թիմը, որովհետև ամեն ինչ կփոխվի։ Հետևաբար, մեզ ժամանակ է հարկավոր, և մենք պետք է ամեն օր աշխատենք նույն կերպ», — մեջբերում է Ամորիմին Sky Sports-ը։
