ՖԻՖԱ Աշխարհի 2025թ․ ակումբային առաջնության 32 մասնակիցները Մայամիում կայացած աստղային վիճակահանության ընթացքում իմացան իրենց մրցակիցներին։ Շքեղ միջոցառման արդյունքում ձևավորվեցին մի քանի աներևակայելի հանդիպումներ, որոնք մեծ հետաքրքրություն կառաջացնեն ֆուտբոլասերների մոտ։
Բավարիա — Բոկա Խունիորս
Խումբ C
Բավարիան և Բուենոս Այրեսը ներկայացնող այս թիմերն ունեն պատմական մրցակցություն։ Նրանք պայքարել են անգամ աշխարհի տիտղոսի համար 2001 թվականին, երբ Սամի Կուֆուրի 109-րդ րոպեին խփած գոլը կոտրեց «Բոկա Խունիորսի» երկրպագուների սրտերն ու «Բավարիային» պարգևեց Միջմայրցամաքային Գավաթը։
Աստղային ֆուտբոլիստներ․ Այս խաղում կարող ենք տեսնել վերջին տասնամյակների երկու հիանալի 9 համարներին՝ Հարի Քեյնին և Էդինսոն Կավանիին։ Երիտասարդների շարքում աչքի կընկնի նաև Ջամալ Մուսիալան, ով հաստատ կփորձի մեծացնել իր հեղինակությունն այդ մրցաշարում։
Ֆլամենգո — Չելսի
Խումբ D
Այս հանդիպումն իրար դեմ է դուրս բերում աշխարհի ամենաբազմամարդ երկրպագուներ ունեցող ակումբներից մեկին և աշխարհի ամենաթանկարժեք կազմով թիմին։ Կարո՞ղ է «Ֆլամենգոն», իր 50 միլիոնանոց երկրպագուների աջակցությամբ, սենսացիա ստեղծել լոնդոնյան աստղային կազմի դեմ։
Աստղային ֆուտբոլիստներ․ Քոուլ Փալմեր, Պեդրո՝ գոլահարներ, որոնք ապահովելու են այդ խաղի դիտարժանությունն ու գոլառատությունը։
Մանչեսթեր Սիթի — Յուվենտուս
Խումբ G
Ալեսանդրո Դել Պիերոն այդքան էլ ուրախ չէր վիճակահանության ժամանակ, երբ իր սիրելի «Յուվենտուսը» հայտնվեց Խոսեպ Գվարդիոլայի գլխավորած թիմի հետ նույն խմբում։ Ամեն դեպքում, պատմությունն իտալացիների կողմից է․ «Յուվենտուսն» այս թիմերի միջև կայացած երկու խաղերում էլ հաղթանակ է տարել։
Աստղային ֆուտբոլիստներ․ Կկարողանա՞ արդյոք Էրլինգ Հոլանդը նոր ռեկորդներ սահմանել, թե՞ այս հանդիպման աստղը կդառնա թուրինցիների հարձակվող Դուշան Վլահովիչը։
Պալմեյրաս — Ինտեր Մայամի
Խումբ A
Այս հանդիպումն աչքի է ընկնում, քանի որ բրազիլական ֆուտբոլի նշանավոր ակումբներից մեկը հանդիպում է ԱՄՆ-ի ամենաամբիցիոզ ակումբներից մեկին։ Լիոնել Մեսսիի ներկայությունն այս հանդիպմանը դարձնում է հետաքրքրաշարժ թե՛ Հյուսիսային, թե՛ Հարավային Ամերիկայի համար։
Աստղային ֆուտբոլիստներ․ Մեսսիի հանդիպումը 17-ամյա հրաշամանուկ Էստևաոյի հետ։ Վերջինս համարվում է բրազիլական ֆուտբոլի ծագող աստղը։ Մեսսի — Էստևաո՝ այս խմբային փուլի ամենահետաքրքիր անձնական մրցապայքարներից մեկն է։
ՊՍԺ — Բոտաֆոգո
Խումբ B
Լիբերտադորեսի գավաթակիրը հանդիպելու է եվրոպական հզոր ՊՍԺ-ի հետ։ Ֆրանսիական թիմի բրազիլացի ավագ Մարկինյոսը կփորձի խանգարել հայրենակիցների հաղթական քայլերին։
Աստղային ֆուտբոլիստներ․ Ուսման Դեմբելեն և Բրեդլի Բարկոլան կարող են դիտարժան դարձնել ցանկացած հանդիպում, իսկ Լուիս Էնրիկեն կփորձի պատմություն կերտել։
Ռեալ Մադրիդ — Ալ-Հիլալ
Խումբ G
Եվրոպայի ամենատիտղոսակիր ակումբներից մեկը՝ Մադրիդի «Ռեալը» հիմնականում ֆավորիտ է համարվում յուրաքանչյուր խաղում, և այս հանդիպումը բացառություն չէ։ «Ալ-Հիլալն» էլ, իր հերթին, կփորձի թիմի աստղային ֆուտբոլիստներով դիմադրել «արքայական ակումբին»։
Աստղային ֆուտբոլիստներ․ Ջուդ Բելինգեմը, Կիլիան Մբապեն և Վինիսիուս Ժունիորը կփայլեն այս խաղում, մինչդեռ Նեյմարը՝ «Ալ-Հիլալի» նորաստեղծ աստղը, կլինի ուշադրության կենտրոնում, եթե իհարկե մինչ մրցաշարի մեկնարկը չհայտնվի այլ ակումբում։
Ռիվեր Փլեյթ — Ինտեր
Խումբ E
Այս երկու հզոր թիմերի հանդիպումը պատմական նշանակություն ունի։ Տիտղոսակիր ակումբները կպայքարեն խմբից առաջին տեղով դուրս գալու համար։ Բացի այդ, հետաքրքիր կլինի հետևել հայ կիսապաշտպան Հենրիխ Մխիթարյանի գործողություններին այս մրցաշարում։
Աստղային ֆուտբոլիստներ․ Արգենտինական ակումբի հաջողությունը մեծապես կախված կլինի նրանից, թե ինչպես կկարողանան չեզոքացնել «Ինտերի» աստղային ավագ Լաուտարո Մարտինեսին։ Մյուս կողմում՝ կոլումբացի Միգել Բորխան կփորձի ճեղքել իտալական պաշտպանությունը։
