ՈւԵՖԱ Կոնֆերենցիաների լիգայի 2024/2025թթ․ խաղարկության Լիգայի փուլի 4-րդ տուրում «Նոան» կհանդիպի Ռեյկյավիկի «Վիկինգուրին»։ Հանդիպումը կկայանա Վազգեն Սարգսյանի անվան «Հանրապետական» մարզադաշտում, իսկ խաղի մեկնարկը կտրվի 21։45-ին։
Խաղից առաջ «Վիկինգուրի» գլխավոր մարզիչ Առնար Գունլաուգսոնը նշել է, որ իր թիմը չի կենտրոնանում «Նոայի»՝ «Չելսիից» կրած 0:8 հաշվով պարտության վրա։
«Հայաստանն ակնհայտորեն անչափ գեղեցիկ երկիր է, միաժամանակ դու քեզ այդքան էլ չես զգում 2024 թվականի Լոնդոնում։ Եվրոպական ճամփորդությունների հմայքը հենց դա է՝ ճանաչել տարբեր մայրցամաքներ, տարբեր մշակույթներ, տարբեր ուտեստներ և տարբեր պայմաններ: Սա պարզապես հրաշք է»,- ասել է Առնարը «Վիկինգուրի» Ֆեյսբուքյան էջին տված հարցազրույցում, որը տեղի է ունեցել թիմի մարզման ժամանակ Հայաստանում։
«Նոան», հավանաբար, որոշել էր ռոմանտիկ մոտեցում ցուցաբերել «Չելսիի» հետ խաղում՝ կարծելով, որ դա իրենց կյանքի եզակի հնարավորությունն է՝ փորձելով ցուցադրել իրենց լավագույնը։ Բայց նրանք հանդիպեցին բարձրակարգ ֆուտբոլիստների, որոնք պարզապես մեկ գլուխ բարձր էին նրանցից։
Սա չի արտացոլում այն, ինչին մենք պետք է պատրաստ լինենք։ Նրանք հաջող արդյունքներ են գրանցել Եվրոպայի մրցաշարում՝ դուրս թողնելով հունական ԱԵԿ-ին և ապահովելով մի շարք հաղթանակներ։ Դրսում խաղալը լրիվ այլ բան է, քան տանը։ Մենք պետք է պատրաստ լինենք նմանատիպ խաղի, ինչ Կիպրոսի «Օմոնիայի» դեմ էր»,- ասել է Առնարը՝ հիշեցնելով իր թիմի միակ պարտությունը մրցաշարում։
Մարզիչը նշել է, որ «Վիկինգուրի» ֆուտբոլիստների մի մասը պատրաստ է խաղին, սակայն բացակայելու են Գուննար Վաթնհամարը, Էրլինգ Ագնարսոնը և Պաբլո Պունյեդը։
«Այստեղ գտնվողները բավականին թարմ տեսք ունեն։ Ցավոք, Գուննարը բացակայում է, բայց լավ նորություններ ստացանք, որ նրա վնասվածքը լուրջ չէ։ Մենք կասկածում էինք, որ կարող է լինել խաչաձև կապանի պատռվածք, բայց բարեբախտաբար այդպես չէ։ Էրլինգը ևս մնաց տանը, քանի որ շուտով հայր է դառնալու։ Պաբլոն նույնպես չի կարող մասնակցել առաջիկա խաղին։ Մատի և Վալդի հետ լավ մարզումներ ենք ունեցել, որոնք վերականգնվում են»,- նշել է Առնարն ու ավելացրել, որ Հալդոր Սմարի Սիգուրդսոնն էլ շարք է վերադառնում վնասվածքից հետո։
Նշենք, որ Կոնֆերենցիաների լիգայում առաջին ութ թիմերն անցնում են 1/8 եզրափակիչ, իսկ 9-24-րդ տեղերը՝ փլեյ-օֆֆ փուլ։
