«Չելսիի» հետ խաղից առաջ բրիտանական BBC-ն ևս անդրադարձել է հայկական «Նոային», թիմի նախագահին, պատմությանը և մոտեցումներին:
«Նոր թիմը, որի նախագծում իր մասնակցությունն ունի նաև պորտուգալական ֆուտբոլի լեգենդ Լուիշ Ֆիգուն, անվանվել է աստվածաշնչյան կերպարի անունով, և կարելի է վստահորեն ասել, որ «Չելսին» այս մրցաշրջանում ավելի հետաքրքիր մրցակիցներ չի ունենա:
Հայկական «Նոա» ակումբը հինգշաբթի օրը կժամանի «Սթեմֆորդ Բրիջ»՝ Կոնֆերենցիաների Լիգայի հանդիպմանը մասնակցելու, և այստեղ գտնվելով՝ արդեն իսկ պատմություն է կերտում:
Որակավորման առաջին փուլի 50 ակումբներից միայն «Նոան» էր, որ դուրս եկավ փլեյ-օֆֆ փուլ, և նրանք ևս մեկ քայլ առաջ կատարեցին՝ նվաճելով հիմնական մրցաշարի ուղեգիր:
Նրանք 18 գոլ խփեցին որակավորման փուլում, այդ թվում՝ դարպասապահ Օգնյեն Չանչարևիչի հեռահար հարվածը ԱԷԿ-ի դեմ խաղում, և 88-րդ րոպեի հաղթական գոլը 10 հոգով այն բանից հետո, երբ ընդհանուր դիմակայությունում նրանք 3-0 հաշվով զիջում էին փլեյ-օֆֆի խաղում:
Լիգայի փուլում երևանյան թիմը 2:0 հաշվով հաղթեց չեխական «Մլադա Բոլեսլավին» և 1:0 հաշվով զիջեց Վիեննայի «Ռապիդին», ինչը նրանց թույլ է տալիս երազել փլեյ-օֆֆի մասին:
Պորտուգալացի մասնագետ Ռուի Մոտան BBC-ի հետ զրույցում նշել է՝ Կոնֆերենցիաների լիգայում հայտնվելը կարևոր իրադարձություն է ակումբի համար և հնարավորություն է եվրոպական ֆուտբոլում ներկայանալու, քանի որ այժմ բոլորն արդեն գիտեն, թե «Նոան» ինչ թիմ է:
«Չելսիի» դեմ խաղն առաձնահատուկ պահ է. սա նշանակում է խաղալ եվրոպական ֆուտբոլի լավագույն թիմերից մեկի դեմ: Մեզ համար սա մեծ պատիվ է: Մեր ակումբի, հայկական ֆուտբոլի և մեր երկրպագուների համար սա շատ առանձնահատուկ խաղ է»,- ասել է Մոտան:
Վարդգես Վարդանյանն ակումբի ղեկավարությունը ստանձնել է 2023 թվականի օգոստոսին և կարելի է ասել՝ ակնթարթորեն այն վերափոխել է:
«Ամառային տրանսֆերային պատուհանի ժամանակ մենք մարտավարական որոշում կայացրինք՝ վերակառուցելու թիմը՝ մեր ամբիցիոզ նպատակներին համապատասխան: Հունիսի 17-ին սկսելով ընդամենը 9 խաղացողով՝ մենք անտրտունջ աշխատել ենք կազմն ուժեղացնելու ուղղությամբ՝ երաշխավորելով, որ այն պատրաստ ու մրցունակ կլինի Կոնֆերենցիաների լիգային: Այս հաջողությունները մեզ «ստիպում են» ավելի բարձր նպատակներ սահմանել, շարունակել մեր զարգացումն ու ակումբը տեղակայել եվրոպական ֆուտբոլի առաջատար թիմերի շարքում: Եվրոպական մրցաշրջանի մեկնարկից առաջ ես խնդիր էի դրել դուրս գալ Կոնֆերենցիաների լիգայի խմբային փուլ: Շատերը դա անհավանական ու գրեթե անիրականանալի նպատակ էին համարում, բայց, ինչպես տեսնում ենք, չնայած բոլոր դժվարություններին ու խոչընդոտներին մենք հասանք դրան: Վերջնարդյունքում իմ նպատակը հայկական ֆուտոլի զարգացման գործում ներդրում ունենալն ու այնպիսի ժառանգություն թողնելն է, որը կծառայի ապագա սերունդներին»,- BBC Sport-ի հետ զրույցում ասել է Վարդանյանը:
Հիշեցնենք՝ «Չելսի»-«Նոա» հանդիպումը կկայանա այսօր կեսգիշերին:
