Ռոնալդուն հնարավոր է փոխի ակումբային գրանցումը, Ինտերի նոր տրանսֆերային նպատակը. Տրանսֆերային անցուդարձ

Ձեր ուշադրությանն ենք ներկայացնում միջազգային մամուլում վերջերս շրջանառվող գլխավոր ֆուտբոլային ինսայդները, տրանսֆերային շշուկները։

✅ Հաջորդ տարի Կրիշտիանու Ռոնալդուն կարող է փոխել ակումբային գրանցումը։ «Ալ-Նասրի» հարձակվողի նկատմամբ հետաքրքրություն է ցուցաբերում «Ալ-Հիլալը»։ Սաուդյան ակումբը ցանկանում է նրան տեսնել որպես Նեյմարին փոխարինող։ Բրազիլացին առաջիկա ձմռանը կարող է հեռանալ «Ալ-Հիլալից»՝ նրա պայմանագիրը կարող է խզվել: Այս ամենի մասին հայտնում է իսպանական Sport-ը։

✅ «Բարսելոնան» լուրջ ֆինանսական խնդիրներ ունի, բայց ինչ-որ կերպ շարունակում է փորձել նոր ֆուտբոլիստներ ձեռք բերել: Ինչպես հաղորդում է Transfer News Live-ը, ակումբի նոր տրանսֆերային նպատակը Դորտմունդի «Բորուսիայի» հարձակվող Կարիմ Ադեյեմին է։ Աղբյուրը նշում է, որ «Բարսելոնան» Ադեյեմիի տրանսֆերի գործարքի շրջանակում կարող է օգտագործել Ֆերան Տորեսին։ Transfermarkt-ը 22-ամյա Կարիմ Ադեյեմիի տրանսֆերային արժեքը գնահատում է 35 միլիոն եվրո, իսկ 24-ամյա Ֆերան Տորեսինը՝ 30 միլիոն եվրո։

✅ «Լիվերպուլը» պատրաստ է ձմռանը վաճառել թիմի աջ պաշտպան Տրենտ Ալեքսանդեր-Առնոլդի տրանսֆերային իրավունքները Մադրիդի «Ռեալին» 50 մլն եվրոյի դիմաց, այս մասին տեղեկացնում է Defensa Central-ը։ Ըստ աղբյուրի՝ «արքայական ակումբը» պատրաստ է վճարել այդ գումարը, չնայած, որ անգլիացու և «Լիվերպուլի» միջև կնքված պայմանագրի ժամկետի ավարտին շատ քիչ է մնացել (2025թ․ ամառ):

✅ Ֆրանկֆուրտի «Այնտրախտի» հարձակվող Օմար Մարմուշի ծառայություններով հետաքրքրված են եվրոպական թոփ ակումբները: Ըստ ինսայդեր Ֆլորիան Պլետենբերգի, «Բավարիան» ուշադիր հետևում է Մարմուշի առաջընթացին և դիտարկում է հաջորդ ամառ նրա տրանսֆերը ձեռք բերելու հնարավորությունը: Ֆուտբոլիստի ծառայություններով հետաքրքրված է նաև անգլիական «Լիվերպուլը», որը ևս պատրաստ է մասնակցել տրանսֆերային մրցավազքին։

✅ Ինսայդեր Քրիստիան Ֆալկը հայտնում է, որ «Մանչեսթեր Յունայդթեդը» և «Արսենալը» հետաքրքրված են «Բավարիայի» վինգեր Լերոյ Սանեի ծառայություններով։

✅ Ինչպես հայտնում է TEAMtalk-ը, «Բարսելոնայի» նախագահ Ժոան Լապորտան լրջորեն մտածում է «Լիվերպուլի» վինգեր Մոհամեդ Սալահի հետ պայմանագիր կնքելու մասին։ Միևնույն ժամանակ, աղբյուրը նշում է, որ Սալահի հետ գործարքը թանկ կարժենա կատալոնական ակումբին, թեև եգիպտոսցին կարող է ժամանել ազատ գործակալի կարգավիճակով։ Նշվում է, որ Սալահը նոր ակումբում ցանկանում է տարեկան վաստակել 15 միլիոն եվրո: Առաջիկա ամիսներին «Բարսելոնան» պետք է որոշում կայացնի Սալահի վերաբերյալ, ում պայմանագրի ժամկետը «Լիվերպուլի» հետ նախատեսված է մինչև 2025 թվականի ամառը։

✅ Ըստ The Sun-ի՝ «Չելսիի» 23-ամյա կիսապաշտպան Էնցո Ֆերնանդեսի նկատմամբ հետաքրքրություն են ցուցաբերում «Բարսելոնան» և «Ինտերը»:

✅ Ինչպես հաղորդում է Transfer News Live-ը՝ մեջբերելով Fichajes-ին, «Ալ-Հիլալը» ցանկանում է գնել Վինիսիուսի տրանսֆերը։ Սաուդյան Արաբիայի չեմպիոնները պատրաստ են մեծ գումար վճարել 24-ամյա բրազիլացու համար՝ 300 մլն եվրո։

✅ El Nacional-ը հայտնում է, որ «Արսենալը» պատրաստ է սահմանել իր տրանսֆերային նոր ռեկորդը՝ առաջարկելով 120 միլիոն եվրո Իսակի համար, ինչը կգերազանցի Ռայսի համար վճարված 116,6 միլիոն եվրոն: Եթե ​​գործարքը կայանա, ապա շվեդ ֆուտբոլիստը կդառնա «Արսենալի» պատմության ամենաթանկարժեք տրանսֆերը և ռեկորդային տրանսֆերի վաճառքը «Նյուքասլի» համար:

✅ «Բարսելոնան» հետաքրքրություն է ցուցաբերում «Լիլի» 22-ամյա դարպասապահ Լյուկ Շևալյեի նկատմամբ, ում կատալոնական ակումբը դիտարկում է որպես 32-ամյա դարպասապահ Մարկ-Անդրե տեր Շտեգենի երկարաժամկետ փոխարինող։ Այս մասին հաղորդում է Sport.es-ը։

✅ «Տոտենհեմը» հետևում է 24-ամյա վինգեր Անդրեաս Սկով Օլսենի ելույթներին «Բրյուգեի» կազմում։ Դանիացի հարձակվողի ծառայություններով հետաքրքրված են նաև ԱՊԼ-ի այլ ակումբներ, նշում է GiveMeSport-ը։

✅ «Բարսելոնայի» մարզական տնօրեն Դեկուն բանակցություններ է սկսել Լիսաբոնի «Սպորտինգի» հարձակվող Վիկտոր Գյոկերեշի՝ կատալոնական ակումբ հնարավոր տեղափոխության վերաբերյալ։ Այս մասին հայտնում է Transfer News Live-ը։ Աղբյուրի տեղեկություններով՝ պորտուգալական ակումբը դեմ չէ հարձակվողից բաժանվելուն, եթե նրա դիմաց ստանա 60-ից 70 միլիոն եվրո։