Սպորտային գործակալ Արի Զաքարյանը պատմել է, թե ինչպես է կորոնավիրուսի պանդեմիան ազդել գեղասահքի վրա:
«Ես բազմիցս ասել եմ. մեր սպորտը անցնում է բավականին բարդ ժամանակներ, նույնիսկ առանց կորոնավիրուսի, այն շարունակում է գոյատևել հիմնականում Ռուսաստանի և Ճապոնիայի հաշվին: Թե ինչպես գեղասահքը կդիմանա ներկայիս հարվածին, ինչ ձևով և ինչ հնարավորություններով այն կվերադառնա նորմալ կյանք, որքան ժամանակ կպահանջվի մարզիկներին վերականգնելու իրենց ֆիզիկական և հոգեբանական վիճակը, կարծում եմ, ոչ ոք չի կարող կանխատեսել:
Իրավիճակը հարվածեց ոչ միայն գեղասահորդներին, այլև մեր ամբողջ մարզաձևին, այն երկրների տնտեսությանը, որտեղ ցուցադրություններ պետք է անցկացվեին: Դա պարզապես փողի հսկայական կորուստ չէ: Ամենավատն այն է, որ նրանք, ովքեր զբաղվում են սպորտում շոու բիզնեսով, հայտնվել են ծայրաստիճան անորոշության մեջ:
Մենք պարզապես կորցրեցինք Աշխարհի գավաթը: Շատ գեղադահորդներ պատրաստ էին հաղթել այս մրցաշարում: Պրոդյուսերները, որոնք մրցաշրջանի ավարտից հետո նախատեսում էին սկսել ցուցադրություններ ամբողջ աշխարհում, պատրաստվում էին դրան երկար ամիսներ: Մշակեցինք լոգիստիկա, վճարեցինք հարթակների համար, վարձեցինք հյուրանոցներ, պայմանագրեր կնքեցինք շատ ընկերությունների հետ, նախապես վճարեցինք … Ի՞նչ անել հիմա:
Ես չեմ կարծում, որ աշխարհում այժմ կա գոնե մեկ բաց սահադաշտ: Միգուցե որոշ ժամանակ անց մարզումների հետ կապված իրավիճակը կսկսի կայունանալ Չինաստանում, բայց Ամերիկայում տեսանելի ապագայում դա հաստատ չի ստացվի:
Մարդկանց մտքով էլ չի անցնի նույնիսկ գնալ որևէ շոուի կամ ցուցադրության, չէ որ այն ամենը, ինչ տեղի է ունենում հիմա, դա միայն ճգնաժամի սկիզբն է։ Եթե դա շարունակվի, մարդիկ չեն մտածի մարզման և զվարճանքի մասին, այլ կմտածեն այն մասին, թե ինչպես կարող են գոյատևել և կերակրել ընտանիքներին: Այս առումով հոկեյը, բասկետբոլը և այլ հանրաճանաչ մարզաձևերը, ինչպես նաև ամբողջ շոու-բիզնեսը, որպես ամբողջություն, մեծ հարված են ստանում», — մեջբերում է Զաքարյանին RT-ն:
