«Լոկոմոտիվի» կիսապաշտպան Էդգար Սևիկյանը Матч ТВ-ի եթերում հայտարարել է, որ «երկաթգծայինները» լրջորեն են տրամադրվում Ռուսաստանի Գավաթի յուրաքանչյուր խաղի՝ չնայած թիմի մրցաշարային դիրքին։
Երեկ՝ հոկտեմբերի 1-ին, «Լոկոմոտիվը» խմբային փուլի 5-րդ տուրում 2։1 հաշվով տնային հաղթանակ է տարել «Օրենբուրգի» նկատմամբ։ «Կարմիր-կանաչները» 5-րդ անընդմեջ հաղթանակն են տարել և նախքան վերջին հանդիպում անցկացնելը՝ ապահովել են իրենց տեղը փլեյ-օֆում։
Հայաստանի ընտրանու ֆուտբոլիստը մասնակցել է հանդիպմանը մեկնարկային րոպեներից, աչքի ընկել գոլային փոխանցումով և փոխարինվել 79-րդ րոպեին։ Խաղին մասնակցել է նաև մեր ընտրանու մեկ այլ ֆուտբոլիստ՝ Նաիր Տիկնիզյանը, ով ապաքինվել է վնասվածքից։ Վերջինս խաղի ընթացքում զգուշացվել է։
1-0 Pinyaev pic.twitter.com/cRjohbn0qK
— RPL Sky (@RPLNews_eng) October 1, 2024
— Ունեինք լավ հնարավորություններ թե՛ առաջին, և թե՛ երկրորդ խաղակեսերում։ Կարող էի եզրից ստացած լավ փոխանցումից հետո գոլ խփել։ Պետք է աշխատել եզրափակումների վրա, դեռ աճելու շատ տեղ ունենք։ Ուրախ ենք, որ հաղթել ենք։ Կարծում եմ՝ լավ աշխատանք տանելու դեպքում կարող ենք խփած գոլերի քանակն ավելացնել։
— Պինյաևը շնորհակալություն հայտնե՞լ է գոլային փոխանցման համար։
— Շնորհակալության կարիք չկա, դա իմ աշխատանքն է։ Ես փոխանցում եմ կատարել, նա գոլ է խփել։ Ամենակարևորն այն է, որ թիմն է գոլ խփել և հաղթել։
— «Լոկոմոտիվն» ամենավերջում նախաձեռնությունը տվել էր մրցակցին։
— Խաղն առաջին րոպեներից բաց է եղել։ Բացթողումների պատճառով շատ էինք նահանջում, այդ պատճառով էլ շատ ուժ կորցրինք։ Բայց ֆուտբոլում խաղում են ոչ միայն հարձակման, այլ նաև պաշտպանության գծում։ Երկու դեպքում էլ լավ ենք խաղացել ու հաղթել ենք։ Չէի ասի, որ թուլացրել ու հաշիվ էինք պահում։ Պահերի իրացման հարցում մի փոքր թերանում էինք։
— Կա՞ իմաստ 6-րդ խաղում հաղթանակ տանելու։
— Բոլոր խաղերին էլ մենք տրամադրվում ենք հաղթանակի համար։ Կարևոր չէ՝ դուրս ենք եկել հաջորդ փուլ, թե ոչ։ Յուրաքանչյուր խաղում էլ ցանկանում ենք հաղթել՝ տրամադրվելով մարտի։
