Մադրիդի «Ատլետիկոյի» և Լոնդոնի «Չելսիի» նախկին հարձակվող Դիեգո Կոստան իրեն հավատարիմ է մնացել։ Նույնիսկ Բրազիլիայում, 35 տարեկանում, նա չի կարողանում հանգստանալ և շարունակում է գործել իր սիրելի ոճով:
Վնասվածք ստանալուց հետո Դիեգոն որոշել է վերականգնվել «Գրեմիոյի» երիտասարդական թիմի հետ, որտեղ հանդես են գալիս մինչև 20 տարեկան ֆուտբոլիստներ: Հերթական խաղի ավարտին Կոստան՝ չկարողանալով զսպվածություն ցուցաբերել, կռվել է մրցակցի ֆուտբոլիստի հետ։ Կռվի պատճառով նա հեռացվել է խաղադաշտից։
Հետաքրքիր է, որ նրան ստիպված են եղել հեռացնել անվտանգության աշխատակիցների օգնությամբ։
Դիեգո Կոստան «Գրեմիոյում» է հանդես գալիս փետրվարից: Իսպանացին միացել է ակումբին ազատ գործակալի կարգավիճակով և պայմանագիր կնքել մինչև տարվա վերջ: Ընթացիկ մրցաշրջանում 35-ամյա հարձակվողը 16 խաղում խփել է 7 գոլ և կատարել 3 գոլային փոխանցում:
Transfermarkt պորտալը ֆուտբոլիստի արժեքը գնահատում է 1,5 միլիոն եվրո։
