«Միլանի» նախկին պաշտպան, իսկ այժմ Թբիլիսիի քաղաքապետ Կախա Կալաձեն մեկնաբանել է Վրաստանի հավաքականի՝ Եվրո-2024-ից դուրս մնալը։ Հիշեցնենք, որ Վրաստանի հավաքականը մրցաշարի 1/8 եզրափակչում ջախջախիչ 1:4 հաշվով պարտվել է Իսպանիային։
«Վրաստանը ևս մեկ անգամ ապացուցեց, որ արժանի մրցակից է, որը բարձր մակարդակի ֆուտբոլ է խաղում։ Շնորհակալություն տղաներին վրացի երկրպագուներին մատուցած ուրախության համար, նրանք հետաքրքիր խաղեր նվիրեցին բոլոր ֆուտբոլասերներին։
Այսօր ամբողջ աշխարհը գիտի, որ Վրաստանը հաղթանակի համար պայքարող երկիր է։ Առջևում շատ հաղթանակներ կան»,- գրել է Կալաձեն սոցցանցերից մեկի իր էջում։
Եվրո-2024-ի քառորդ եզրափակիչում Իսպանիայի հավաքականը կխաղա Գերմանիայի հետ։ Գերմանիայի հավաքականը 1/8 եզրափակչում հաղթեց դանիացիներին։