Երկօրյա դադարից հետո ԵՎՐՈ-ն վերադառնում է։ Խմբային փուլի թոհուբոհը, ձախողումները ու սխրանքները դեռևս լիովին «չմարսած» հավաքականները մոտենում են նոր՝ ավելի վճռական փուլի, որտեղ սխալները չեն ներվում։
Քառորդ եզրափակիչի ուղեգրի համար միմյանց դեմ կպայքարեն 16 թիմեր՝ տարբեր ոճի ու ճաշակի, բայց հանուն մեկ նպատակի։
Շվեյցարիա-Իտալիա (հունիսի 29-ին ժամը՝ 20։00-ին)
Խաղային առաջին օրը գործի մեջ կմտնի գործող չեմպիոնը՝ Իտալիան, որին բաժին է հասել հանդուգն Շվեյցարիան։ Ճիշտ է Շվեյցարիայի հավաքականում չկան հնչեղ անուններ, բայց կա թիմային գրագետ և համակարգված ֆուտբոլ։ Շվեյցարիան մեկ անգամ չէ, որ ապացուցել է, որ հեղինակություններ չի ճանաչում, ուստի «Սկուադրա աձուրայի» գործը հեշտերից չէ։ Իտալացիները լրջորեն պետք է պատրաստվեն այս խաղին, եթե ուզում են շարունակել հետագա պայքարը։
Գերմանիա-Դանիա (հունիսի 29-ին ժամը՝ 23։00-ին)
Պայքարը նաև վերսկսում են տանտերերը։ Վերջին մի քանի խոշոր մրցաշարերում մեղմ ասած՝ լավ տպավորություն չթողած Գերմանիան կարծես վերջապես հառնել է իր մոխրից։ «Բունդեսթիմի» կազմում ընթացիկ ԵՎՐՈ-ում աչքի են ընկնում մի շարք պատանիներ, որոնք դեռ երկար տարիներ կարող են օգուտ տալ թիմին և դառնալ նրա կորիզը։ Գերմանիան խմբային փուլի ամենակայուն թիմերից մեկն է։ «Մանշավտը» խաղում է բավականին նորարական և հետաքրքիր ֆուտբոլ։ Այս փուլում նրանց մրցակիցը Դանիան է, որը հավանաբար խնդիրներ չի առաջացնի։ Սկանդինավները խմբային փուլն ավարտել են 3 ոչ-ոքիով և մեկ խաղում չխփելով մեկ գոլից ավելի։ Դանիացիները կարող էին ավելի առաջ գնել, բայց ոչ Գերմանիայի հետ մրցելու պարագայում։
Անգլիա-Սլովակիա (հունիսի 30-ին ժամը՝ 20։00-ին)
Անգլիան փլեյ-օֆֆում է․ Առաջին հայացքից ամեն բան օրինաչափ է, և չկա որևէ արտասովոր բան՝ բայց դա միայն առաջին հայացքից։ Անգլիան վստահորեն չարդարացրեց սպասելիքները։ Շատ մասնագետների պնդմամբ անգլիացիների «աքիլեսյան գարշապարը» թիմի գլխավոր մարզիչն է՝ Գարեթ Սաութգեյթը, ու նրա ընտրած մարտավարությունը։ «Երեք առյուծների» կազմում հանդես եկող խաղացողների անունները միայն բավական են, որ նրանցից ակնկալես կրեատիվ, ագրեսիվ և հարձակողական ֆուտբոլ։ Իսկ ի՞նչ է անում Սաութգեյթը՝ անում է հակառակը՝ խաղում է անշուք ֆուտբոլ։ Ինչ վերաբերում է սլովակներին, ապա նրանք վատ տպավորություն չթողեցին խմբային փուլում և, եթե Անգլիան ուշքի չգա, կարող է լրջորեն պատժվել։
Իսպանիա-Վրաստան (հունիսի 30-ին ժամը՝ 23։00-ին)
Պատմություն կերտած Վրաստանին բաժին է հասել ընթացիկ ԵՎՐՈ-ի ամենաբարդ մրցակիցներից մեկը, եթե ոչ՝ ամենաբարդը։ Իսպանիան միակ թիմն է, որը դեռևս գոլ չի ընդունել սեփական դարպասը և հաղթել խմբային փուլի բոլոր խաղերում։ Հարկ է նշել, որ այս երկուսը ավելի վաղ հանդիպել էին Եվրոպայի առաջնության որակավորման փուլում և «Ֆուրիա ռոխան» 2 խաղերի արդյունքում 10։2 հաշվով ջախջախել էր վրացիներին (3:1, 7:1)։ Սակայն Վրաստանը ապացուցեց, որ չի եկել ուղղակի մասնակցության համար և հարկ եղած դեպքում կարող է պայքար մղել իրենից կարգով անհամեմատ ուժեղ մրցակցի հետ։
Ֆրանսիա-Բելգիա (հուլիսի 1-ին ժամը՝ 20։00-ին)
Կասկածից վեր է, որ սա փլեյ-օֆֆի գլխավոր դիմակայությունն է։ Վատ վիճակում գտնվող Ֆրանսիան ուժերն է չափելու ոչ պակաս վատ վիճակում գտնվող Բելգիայի հետ։ Բացի խաղային խնդիրներից աշխարհի փոխչեմպիոնի ճամբարում կա անառողջ մթնոլորտ, ինչն ուղղակիորեն ազդում է թիմի վրա։ Խոսվում է, որ Դեշամը լարված հարաբերությունների մեջ է Ժիրուի հետ, իսկ Գրիզմանի հետ ընդհանրապես չի շփվում։ Դրան գումարվում է Մբապեի ոչ այնքան լավ մարզավիճակը, և Ֆրանսիան դառնում է անցանելի։ Սակայն Բելգիան էլ լավ ժամանակներ չի ապրում։ «Կարմիր սատանաների» ոսկե սերունդը հետզհետե հեռանում է ֆուտբոլային թատերաբեմից և իր հետ տանում բելգիական ֆուտբոլի փայլը։ Ընթացիկ ԵՎՐՈ-ին Տեդեսկոյի սաները ոչ միանշանակ տպավորություն են թողնում։ Գոլերը բելգիացիներին դժվարությամբ էին տրվում, իսկ Լուկակուն էլ գտնվում էր «հավերժական խաղից դուրս» իրավիճակում։ Ինչո՞ւ է Ռոմելուի սակավ արդյունավետ խաղի պայմաններում անտեսվում Լոի Օպենդան, որը բավականին լավ մրցաշրջան է անցկացրել «Լայպցիգում»։ Բարդ է պատասխանել, սա հարց է, որն արժեր տալ Տեդեսկոյին։ Ընդհանուր առմամբ 2 թիմերն էլ բավականին հեռու են իրենց լավագույն մարզավիճակից, բայց և այնպես զույգի ֆավորիտը շարունակում է մնալ Ֆրանսիան։
Պորտուգալիա-Սլովենիա (հուլիսի 1-ին ժամը՝ 23։00-ին)
Պորտուգալիան խմբային փուլում թողեց երկակի տպավորություն։ Եվրոպական բրազիլացիները դժվարությամբ հաղթեցին չեխերին, հետո վստահ հաղթանակ տարան թուրքերի նկատմամբ, իսկ վերջում սենսացիոն պարտություն կրեցին Վրաստանից։ Մարտինեսի թիմը քառորդ եզրափակիչի ուղեգիրը վիճարկելու է Սլովենիայի հետ, որը, Անգլիայի, Սերբիայի և Դանիայի հետ ընդգրկված լինելով նույն խմբում, չունի պարտություն։
Ռումինիա-Նիդերլանդներ (հուլիսի 2-ին ժամը՝ 20։00-ին)
Երկու թիմերն էլ բավականին հաճելի տպավորություն թողեցին խմբային փուլի մեկնարկում։ Այս դիմակայության գլխագիրը միգուցե ամենահնչեղներից չէ, սակայն դիտարժան պայքար է ակնկալվում։
Ավստրիա-Թուրքիա (հուլիսի 2-ին ժամը՝ 23։00-ին)
Ավստրիան առաջին տուրում հանդիպեց Ֆրանսիային ու, չնայած ցուցադրած բավականին լավ խաղին, ինքնագոլ հեղինակեց ու պարտվեց։ Ռանգնիկի սաները այս պարտության դառնությունը կարողացան արագ թոթափել և ուշքի եկան։ Հաղթեցին լեհերին և հոլանդացիներին ու առաջին տեղով դուրս եկան փլեյ-օֆֆ։ Թուրքիան իր խմբում պարտվեց միայն պորտուգալացիներին, սակայն իր տարած հաղթանակներում այնքան էլ համոզիչ չթվաց։ Վրաստանի հետ խաղում բազմաթիվ անգամներ փրկվեց վտանգավոր պահերից, իսկ Չեխիայի հետ խաղում հաղթանակը պոկեց վերջին վայրկյաններին։
Արևի տակ իրենց տեղն ապահովելու համար թիմերը պետք է ցուցադրեն իրենց առավելագույնը։ Դե ինչ, պայքարը վերսկսված է, որտեղ գործում են Սպարտայի կանոնները՝ հետագա ճանապարհը շարունակում է ավելի ուժեղը։
Սուրեն Սահակյան
