«Բարսելոնայի» գլխավոր մարզիչ Չավին բացատրել է 2023/24 մրցաշրջանի ավարտին ակումբից հեռանալու իր որոշումը և ասել, որ կատալոնական թիմը երբեք չի ունենա սըր Ալեքս Ֆերգյուսոնի նման մարզիչ։
«Բարսելոնայի» գլխավոր մարզիչ լինելը շատ դաժան, անշնորհակալ աշխատանք է։ Դուք անընդհատ զգում եք, որ ձեզ չեն հարգում։ Սա սարսափելի է ազդում ձեր հոգեբանական վիճակի և տրամադրության վրա։ Ինչ-որ պահի դուք դադարում եք տեսնել աշխատանքը շարունակելու իմաստը: Իմ ամենամոտ ընկերները դա շատ լավ գիտեն։ Այդպես է եղել բոլորի դեպքում, ովքեր աշխատել են այս թիմում: Ինձ բազմիցս հարցրել են՝ կլինե՞մ «Բարսայի» համար այն, ինչ Ֆերգյուսոնն էր «Մանչեսթեր Յունայթեդի» համար։ Դա անիրատեսական է այս ակումբում։ Դուք՝ լրագրողներդ, թույլ չեք տա, որ դա տեղի ունենա։ Անընդհատ քննադատում եք, դա ուժեղ ազդեցություն է ունենում։
Կասկած չկա, որ ես «Բարսելոնայի» ներկայացուցիչ եմ։ Ես միշտ ինձնից վեր եմ դասում ակումբը։ Կարծում եմ՝ խաղացողներն իրենց հիանալի էին զգում մեզ հետ, մենք հիանալի թիմ ստեղծեցինք։ Հիմա ես հեռանում եմ, բայց հույսեր ունեմ Չեմպիոնների լիգայի հետ։ Առաջիկա չորս ամիսների ընթացքում ամեն ինչ կանեմ, բայց որոշումս չեմ փոխի, եթե նույնիսկ հաղթենք Չեմպիոնների լիգայում։
Ի՞նչ կլինի ինձ հետ հետո: Ես դեռ չգիտեմ։ Մեր օրերում աշխատանքի բերումով քիչ ժամանակ եմ անցկացնում ընտանիքիս հետ։ Ուզում եմ տանը մնալ ու հանգստանալ երեխաների հետ»,- Չավիի խոսքերն է մեջբերում Marca-ն։
«Մենք պետք է փոխենք ակումբի զարգացման դինամիկան: Մենք պետք է փոխենք թիմի զարգացման ուղղությունը և փոխենք միջավայրը, և դա անելու ճիշտ ժամանակն է: Անարդարացի՞ է իմ հանդեպ: Չգիտեմ, ես սրտիս ձայնը լսեցի, երբ այս որոշումը կայացրեցի։ Երբ ոչինչ արդեն իմաստ չունի, ժամանակն է գործելու և որոշումներ կայացնելու», — Չավիի խոսքերն է մեջբերում Mundo Deportivo-ն:
