Նախորդ անգամ մենք անդրադարձանք Լիգա 1-ի և Բունդեսլիգայի մրցաշրջանի առաջին հատվածին՝ ամփոփելով իրավիճակն այս լիգաներում տվյալ պահի դրությամբ (նյութն՝ այստեղ)։ Այսօր մեր դիտակետում իսպանական Լա լիգան է։
Մենք արդեն վաղուց սովոր ենք, որ իսպանական ֆուտբոլի գահի համար հիմնականում պայքարում են մադրիդյան և կատալոնական գրանդները՝ «Ռեալն» ու «Բարսելոնան»։ Եվ այս մրցաշրջանը բացառություն չէ։ Իհարկե, մերթընդմեջ լինում են անակնկալներ, երբ մեկ այլ ակումբ խառնվում է այս մրցակցությանը, բայց վերջին տարիներին դա ավելի շատ բացառություն է, քան օրինաչափություն։
Ինչ վերաբերում է երկու հեգեմոնների դիմակայությանը, ապա լինում են մրցաշրջաններ, երբ նկատելի է դառնում այս դուետից որևէ մեկի զգալի առավելությունը մրցաշրջանի 2/3-ից հետո։ Լինում է, որ թիմերը չեմպիոնության համար պայքարում են մինչև վերջին տուրերը։ Կարծում եմ՝ այս մրցաշրջանում ականատես կլինենք վերջին տարբերակին։
Այս պահի դրությամբ էլ Չավիի ու Անչելոտիի թիմերը մրցաշարային աղյուսակի գագաթում են․ կատալոնական ակումբը երեք միավորի առավելությամբ առաջինն է։ Նրանց հետևում է «Ռեալ Սոսյեդադը», բայց բասկերը մեկ խաղ ավել են անցկացրել մրցակիցներից։
Մրցաշարային աղյուսակն այս պահի դրությամբ․
1․ «Բարսելոնա» – 41 միավոր
2․ «Ռեալ» – 38
3․ «Ռեալ Սոսյեդադ» – 35
4․ «Ատլետիկո» – 28
5․ «Վիլյառեալ» – 28
6․ «Բետիս» – 28
7․ «Օսասունա» – 27
․․․
19․ «Սևիլյա» – 15
20․ «Էլչե» – 5
Ինչ վերաբերում է չեմպիոնական մրցավազքին, այստեղ թիմերի հնարավորությունը կգնահատեմ հավասար։ Անկեղծ, գուշակություններ անելն այս պահի դրությամբ զուտ ժամանակի կորուստ է։ Միայն կնշեմ մեկ հանգամանք, որը կարող է ազդել այս մրցակցության վրա։ Դա եվրագավաթներն են․․․
«Ռեալը» շարունակում է պայքարը ՉԼ-ում, նրա մրցակիցը «Լիվերպուլն» է։ «Բարսելոնան» եվրագավաթային գարնանային հատվածը կշարունակի Եվրոպա լիգայում, որտեղ կատալոնացիների մրցակիցը լավ մարզավիճակում գտնվող ՄՅՈՒ-ն է։ Երկու թիմերի համար ներքին առաջնությունում արդյունքները բավականին կախված կլինեն հենց այս մրցաշարերում հետագա պայքարից։ Մի փոքր ավելի դժվար կլինի «Ռեալի» համար, ՉԼ-ում մրցակցությունն ավելի ծանր է, դժվար է լինելու պայքարել երկու մրցաշարերում միաժամանակ. մրցաշարեր, որոնք, կարելի է ասել, հավասարապես կարևոր են մադրիդցիների համար։ Բոլորովին չեմ թերագնահատում Եվրոպա լիգայի մակարդակը, պարզապես այստեղ կա մեկ նրբություն․ Չավիի թիմի համար կարևոր է հաղթանակը առաջնությունում, թե՞ ԵԼ-ում։ Այո, վերջինում հաղթանակը ևս տիտղոս է, կարևոր տիտղոս, որը նաև հաջորդ մրցաշրջանում ՉԼ-ի ուղիղ ուղեգիր է տալիս։ Բայց չէ՞ որ առանց դրա էլ «Բարսելոնան» հաջորդ մրցաշրջանում կխաղա ՉԼ-ում․ գրեթե անհնար է պատկերացնել, որ կատալոնացիները չեն լինի Լա Լիգայի լավագույն քառյակում, էլ չեմ ասում, որ ընդհանրապես՝ կարող են չեմպիոն դառնալ։ Այսինքն՝ ՉԼ-ի ուղեգիր ստանալու մոտիվացիա կատալոնացիները չունեն ԵԼ-ում։ Միակ մոտիվացիան՝ եվրոպական ակումբային ֆուտբոլի կարևորությամբ երկրորդ տիտղոսն է։ Ավելի հակված եմ կարծելու, որ «Բարսելոնան» կկենտրոնանա ներքին առաջնության վրա, չեմպիոնությունն այս տարի ապահովելը կլինի Չավիի կոլեկտիվի առաջնային նպատակը: Այդուհանդերձ, հաջողությունը ԵԼ-ում հնարավոր չէ ստորադասել․ վերջին անգամ թիմը միջազգային մրցաշարերում հաղթել է 8 տարի առաջ՝ դառնալով ՉԼ-ի գավաթակիր և ակումբային ԱԱ-ի հաղթող։
Չբացառենք մեկ տարբերակ ևս․ պատկերացնենք, որ «Բարսելոնան» և «Ռեալը» դուրս են մնում եվրագավաթային մրցավազքից։ Այս դեպքում Լա լիգայում պայքարը շա՜տ թեժ է լինելու, երկու թիմերի համար էլ լինելու է միևնույն կարևորագույն նպատակը՝ տիրանալ Լա լիգայի գահին։ Ապրիլին էլ կկայանա Էլ Կլասիկոն, և չի բացառվում, որ այդ հանդիպման արդյունքը ևս որոշիչ կլինի մրցավազքում։ Իսկ այն դեպքում, երբ երկու թիմերն էլ բավականին առաջ կգնան եվրագավթներում․․․ առաջնությունում արդյունքներն արդեն կախված կլինեն մի քանի իրավիճակներից՝ ֆուտբոլիստների մարզավիճակ, վնասվածքներ և այլն․․․
«Ռեալ Սոսյեդադն» այս մրցաշրջանում պարզապես հիանալի է։ Եվ խոսքը ոչ միայն թիմի արդյունքների մասին է և այս պահին զբաղեցրած տեղի, այլ հենց բասկերի ցուցադրած խաղի։ Այս մրցաշրջանում շատ հաճելի է հետևել Իմանոլ Ալգուասիլի թիմի խաղին։ «Ռեալ Սոսյեդադն» այժմ ֆանտաստիկ մարզավիճակում է, 6 հանդիպում անընդմեջ հաղթանակ է տարել՝ հաշվի առնելով բոլոր մրցաշարերը, թիմն արժանիորեն զբաղեցնում է այն տեղն առաջնությունում, որում այժմ հանգրվանել է։
Հրաշալի մրցաշրջան է անցկացնում կիսապաշտպան Միկել Մերինոն, ով այս պահի դրությամբ առաջնությունում լավագույնն է գոլային փոխանցումների քանակով։ Կառանձնացնեմ նաև Զուբիմենդիին, Զուբելդիային, Բրաիս Մենդեսին և, իհարկե, Դավիդ Սիլվային, որն իր փորձով նշանակալիորեն ազդում է թիմի խաղի որակի վրա։ Հիանալի են նաև նորեկները՝ Տակեֆուսա Կուբոն ու նորվեգացի հարձակվող Սորլոտը, որն այժմ թիմի լավագույն գոլահարն է` 7 գոլով, Մենդեսի հետ միասին։ Ակումբը, որը տարիներ առաջ կանգնած էր ֆինանսական խնդիրների առջև, այժմ արդեն լուծել է բոլոր այդ հարցերը, վերջին տարիներին գրագետ սելեկցիոն աշխատանք է կատարում, իսկ Ալգուասիլի բազմամյա աշխատանքը (նա թիմը մարզում է արդեն 5-րդ տարին) սկսել է տալ իր արդյունքները։
Ամենայն հավանականությամբ, թիմն այս մրցաշրջանը կավարտի լավագույն քառյակում, իսկ իրադարձությունների որոշակի զարգացման դեպքում, հնարավոր է մինչև մրցաշրջանի ավարտը կշարունակի «շնչել» երկու գրանդների թիկունքին՝ փորձելով օգտվել մրցակիցներից որևէ մեկի «սայթաքումից»։
Իսկ ահա չորրորդ հորիզոնականի համար շա՜տ թեժ պայքար է ընթանում։ Թե որ թիմը կտիրանա ՉԼ-ի բաղձալի 4-րդ ուղեգրին, նույնքան դժվար է կանխատեսել, որքան չեմպիոնության համար պայքարը։ Կառանձնացնեմ 4+1 ակումբ այս տեղի համար պայքարում՝ «Ատլետիկո», «Բետիս», «Վիլյառեալ» և «Ատլետիկ» Բիլբաո։ Հենց այս ակումբներն էլ, ամենայն հավանականությամբ, առաջնության վերջնամասում կխաղարկեն այդ ՉԼ-ի 4-րդ և մյուս եվրագավաթների՝ Եվրոպա Լիգայի ու Կոնֆերենցիաների լիգայի ուղեգրերը (5-6-րդ տեղ)։ Իսկ +1-ը կլինի «Վալենսիան»․ Գատուզոյի թիմը փոփոխական տպավորություն է թողնում այս մրցաշրջանում, չի բացառվում, որ նա միանա վերը նշված քառյակի մրցավազքին, մյուս կողմից էլ, բացառված չէ, որ «չղջիկներն» արդյունքում կպայքարեն տեղն առաջնությունում պահպանելու համար։ Այս թիմից ամեն ինչ սպասելի է։
Ըստ իս 4-րդ տեղի գլխավոր հավակնորդները «Բետիսն» ու «Վիլյառեալն» են․ երկու թիմերի ցուցադրած ֆուտբոլն ինձ մոտ ավելի շատ հաճելի տպավորություն են թողնում, քան հակառակը։ Բայց, այստեղ կա մի մեծ բայց․․․ «Ատլետիկոն», որը սարսափելի եվրագավաթային մրցաշրջան անցկացրեց՝ ոչ միայն դուրս մնալով ՉԼ-ում հետագա պայքարից, այլ, ընդհանրապես, ավարտեց միջազգային մրցաշրջանը՝ զբաղեցնելով վերջին տեղն իր խմբում, արդեն ուրիշ խնդիրներ չունի լուծելու։ Սիմեոնիի թիմին մնացել է միայն մեկ նպատակ՝ որքան հնարավոր է բարձր տեղ զբաղեցնել ներքին առաջնությունում։ Դա լուծելի խնդիր է՝ հաշվի առնելով թիմի կազմն ու առաջատարների ներկայիս մարզավիճակը, մասնավորապես՝ Գրիզմանի ու Մորատայի։ Մնում է՝ Սիմեոնեն ինչ-որ նոր բան չմոգոնի․․․
Բոլորիս հետ էլ հավանաբար պատահել է այսպիսի դրվագ․ քնելուց առաջ մոռացել ենք մեզ անհրաժեշտ ժամին ֆիքսել զարթուցիչը, առավոտյան արթնացել ենք մեր ուժերով, ոչ այդ «զզվելի բուդելնիկի» մեղեդիից՝ ուշանալով դասից կամ աշխատանքից․․․ Կարծես այդպիսի իրավիճակում է հայտնվել «Սևիլյան»․․․ Այս թիմը, որին սովոր ենք տեսնել ՉԼ-ում, Եվրոպա Լիգայի եզրափակիչներում, այժմ գտնվում է․․․ 19-րդ տեղում։ Սամպաոլիի թիմը ներկա պահին պայքարում է ոչ թե մրցանակային տեղերի, այլ Լա լիգայում տեղը պահպանելու համար։ Մրցաշրջանի սկզբում այն տպավորությունն էր, որ թիմը դեռ արձակուրդում է, պատրաստ չէ նոր մրցաշրջանի մեկնարկին, դեռ ննջում է իր տաքուկ անկողնում, իսկ մինչև զարթնում, մի հատ սուրճ է խմում, արդեն մրցաշրջանի մոտ կեսը մնացել է հետևում։
Արդարության համար նշենք, որ Սամպաոլին այս ամենում մեղավոր չէ, նա միայն վերջերս է ստանձնել «քնած գեղեցկուհուն» արթնացնելու առաքելությունը՝ փոխարինելով «զարթուցիչը չմիացրած» Լոպետեգիին։ Զարմանալի է նաև թիմի վարած տրանսֆերային քաղաքականությունը։ Զարմանալի է, որովհետև այդ մասով պատասխանատու է Մոնչին, որը Եվրոպայի լավագույն սելեկցիոներներից մեկն է (էր)։ Երկար տարիներ հենց նրա գլխավորությամբ «Սևիլյան» ձեռք էր բերում ֆուտբոլիստների, որոնց հետո վերավաճառում էր բարձր արժեքով, հետո նորից բարեհաջող լրացնում նրանց տեղը նոր տաղանդներով։ Մոնչին առանձնանում էր հենց այդ «հոտառությամբ»՝ գտնել նոր տաղանդներ։
Թիմի անհաջողություններում մեծ դեր է խաղում հենց այս մրցաշրջանից առաջ վարած տրանսֆերային քաղաքականությունը։ «Սևիլյան» ամռանը կորցրեց միանգամից երկու կենտրոնական պաշտպանի, որոնք թիմի պաշտպանական գծի հենասյունն էին՝ Կունդեն ու Կարլոսը։ Նորմալ է, երբ հեռանում է հիմնական պաշտպաններից մեկը, նրան կարելի է արժանի փոխարինող գտնել, բայց կորցնել միանգամից երկուսի՞ն, և հետո էլ չգտնե՞լ նրանց խաղամակարդակին մոտ նորեկների։ Դրա փոխարեն ձեռք են բերում Իսկոյին, որն օրեր առաջ հեռացավ՝ այդպես էլ չհարմարվելով անդալուսական թիմին։ Այս մրցաշրջանի մնացած ժամանակահատվածում, կարծում եմ` «Սևիլյան» պետք է կենտրոնանա թիմային խաղը կարգավորելու վրա․ թիմին ժամանակ է պետք հարմարվելու Սամպաոլիի խաղաոճին, որը շատ է տարբերվում Լոպետեգիի փիլիսոփայությունից: Թիմն, անկասկած, դուրս կգա մրցաշարային աղյուսակի նկուղից, բայց ավելիին հավակնել դժվար թե ստացվի։ Այնպես որ, առաջիկա մի քանի ամիսը հարթակ է Սամպաոլիի համար` իր փիլիսոփայությունն ու մտահղացումները թիմում ներդնելու։
Իսկ ահա առաջնության մյուս անհաջողակը՝ «Էլչեն», դեռ քնած է, հավանաբար նրանց զարթուցիչը «էլ չ(ե)ի» էլ աշխատի այս տարի և նրանք կարթնանան արդեն հաջորդ մրցաշրջանում, բայց արդեն` Սեգունդայում (Իսպանիայի երկրորդ դիվիզիոն)։ Թիմն այս ընթացքում վաստակել է ընդամենը 5 միավոր, ինչը վատագույն ցուցանիշն է թոփ-5 լիգաներում։ Դե ինչ՝ ադիո՜ս, «Էլչե»։
⚽ Լա լիգան՝ թվերով
Առաջնության ամենաարդյունավետ թիմն այս պահի դրությամբ «Ռեալն» է՝ 36 գոլով։ Մադրիդցիներից մեկ գոլ պակաս են խփել «Բարսելոնայի» ֆուտբոլիստները։ Կատալոնացիների հարձակվող Ռոբերտ Լևանդովսկին ամենաարդյունավետ ֆուտբոլիստն է՝ 13 գոլով։ Նա ավելի շատ գոլ է խփել այս մրցաշրջանում, քան օրինակ՝ «Էլչեն» (11 գոլ) կամ «Կադիսը» (12 գոլ)։ Ամենահուսալի պաշտպանությունն ունի «Բարսելոնան»․ Չավիի թիմը բաց է թողել ընդամենը 6 գոլ․ դա լավագույն ցուցանիշն է թոփ-5 լիգաներում։ Առաջնությունում այդ ցուցանիշով երկրորդ տեղը կիսում են «Վիլյառեալն» ու «Բետիսը»՝ բաց թողած 13-ական գոլով։
⚽ Լավագույն ռմբարկուները Լա Լիգայում
1․ Լևանդովսկի․ Բարսելոնա – 13 գոլ
2․ Խոսելու․ Էսպանյոլ – 10 գոլ
3․ Ասպաս, Բենզեմա, Իգլեսիաս, Մուրիքի — 8-ական գոլ
⚽ Լավագույնները գոլային փոխանցումների քանակով
1․ Միկել Մորինո․ Ռեալ Սոսյեդադ – 7
2․ Դեմբելե․ Բարսելոնա – 5
3․ Գրիզման․ Ատլետիկո – 5
Վար Բաբայան
