Սպորտային մարմնամարզության Հայաստանի հավաքականի գլխավոր մարզիչ Հակոբ Սերոբյանը, որը Լիվերպուլում անցկացված աշխարհի առաջնությունում աշխատում էր մրցավարների շարքում, ArmSport-ի հետ զրույցում ամփոփել է մեր թիմի մրցելույթները, խոսել անկախ Հայաստանի պամության Աշխարհի առաջին չեմպիոն, մարմնամարզիկ Արթուր Դավթյանի նվաճման, 38-ամյա Հարություն Մերդինյանի՝ աշխարհի առաջնությունում կրկնակի բրոնզե մեդալակիր դառնալու և այլնի մասին:
«Մեր սպասելիքները գերազանցվեցին: Շատ ուրախ ենք: Արթուրից սպասում էինք մեդալ, բայց Հարությունից՝ ոչ, քանի որ գիտեինք, թե ինչ ուժեղ մրցակիցների հետ էր պայքարելու: Եթե նրանք առավելագույնս հանդես գային, մեդալ նվաճելը բարդ կլիներ:
Տղաները գերազանց ելույթ ունեցան: Արեցին իրենց լավագույն կատարումները: Այնպես որ, շատ բան չկա ասելու: Շատ գոհ եմ նրանց ելույթներից: Աշխատանքը ճիշտ գնաց: Հաշվարկները ճիշտ էին»,- ասում է Հակոբ Սերոբյանը:
Գլխավոր մարզիչն ասում է՝ Արթուր Դավթյանը նախքան մրցումները կայացած գլխավոր փորձի ժամանակ նույն կերպ է ցատկել՝ քայլ չանելով, այնպես ինչպես որակավորման փուլում և եզրափակչում. «Սա շատ բարդ է: Իդեալական կատարեց ցատկերը:
Արձագանքները շատ բարձր էին: Բոլորը տպավորված էին ու զարմացած: Շատ երկրներ հիմա նայում են, թե մենք որտեղ ենք ուսումնամարզական հավաք անցկացնելու, որ գան մեզ հետ մարզվեն: Զարմանում են, թե ինչպես ենք այսպիսի արդյունքներ գրանցում՝ չունենալով բավարար պայմաններ»:
Մարզչի խոսքով՝ իրենք էլ դեռ ամբողջովին չեն գիտակցում, թե ինչ բացառիկ ու պատմական արդյունք են գրանցել.
«Այնքան լարված էի, որ երբ առաջնությունը վերաջացավ, չեմպիոն ունեցանք ու կարող էի գոնե այդ ժամանակ հանգիստ քնել, չկարողացա քնել. ուզում էի հասկանալ, թե ինչ կատարվեց: Մենք մեզնից պահանջելով ու մեր առջև նպատակ դնելով՝ հասանք այս արդյունքին: Թե՛ Արթուրը, թե՛ մենք դեռ լիովին չենք գիտակցում, թե ինչ եղավ: Ով ուզում է լիներ մրցակիցը, Արթուրը չեմպիոն էր դառնալու: Այն գնահատականը, որ Արթուրը ստացավ եզրափակիչում, Օլիմպիական չեմպիոնի գնահատական էր»,- ընդգծում է Հակոբ Սերոբյանը:
Մարզչի խոսքով, օղակների վարժության եզրափակչում հանդես եկած Արթուր Ավետիսյանն ու Վահագն Դավթյանը ևս իրենց հնարավորությունների սահմանում լավագույնս հանդես եկան. «Կար ժամանակ, երբ եզրափակչում մեկ մասնակից էինք ունենում, և դա մեծ ուրախություն էր: Հիմա, երբ 5 ներկայացուցչից 4-ը եզրափակիչ են դուրս եկել, արդեն իսկ բարձր արդյունք է: Դա խոսում է այն մասին, որ նրանք ուժեղագույնների ցանկում են, արել են իրենց լավագույնը: Ավետիսյանն առաջին անգամ էր մասնակցում մեծահասակների աշխարհի առաջնությանը և 4-րդ տեղը զբաղեցրեց՝ լավագույնս ելույթ ունենալով: Պարզապես վարժության բարդությունը չհերիքեց: Կշարունակենք աշխատել և առաջ գնալ՝ ձգտելով առավելագույնին»:
Սերոբյանն ասում է՝ փոխվել են պահանջներն ինքներս մեր հանդեպ. «Ոչ ոք մեր առջև պահանջ չի ներկայացնում: Մենք ենք բարդացնում մեր առջև դրված խնդիրները, բարձրացնում պահանջները: Մտածում ենք՝ եթե 3-րդ կամ 4-րդ տեղն է զբաղեցրել, ուրեմն ինչ-որ թերություն կա, պետք է բարդացնել բարդությունը: Ամեն դեպքում մեր տղաներն արեցին այն, ինչին տիրապետում են»:
Ինչ վերաբերում է մեր թիմի ամենաերիտասարդ մասնակցին՝ Գագիկ Խաչիկյանին, Հակոբ Սերոբյանն ասում է՝ դեռ իրեն դրսևորելու շանս կունենա. «Երևի հոգեբանական վիճակն է խանգարում, կամ վախն ու հույզերը, որ չի կարողանում ցույց տալ այն, ինչին ունակ է: Երիտասարդ է, պետք է նրան շանս տալ, փորձել ու հասկանալ, թե ինչն է մեր բացթողումը, ինչո՞ւ չի կարողանում մրցման ժամանակ կատարել այն, ինչ անում է մարզումների ընթացքում: Երևի պրոֆեսիոնալիզմն է պակասում»:
Ամփոփելով 2022 թվականը՝ Հակոբ Սերոբյանն այն գերազանց է գնահատում.
«Տարին գերազանց էր ամբողջ թիմի համար: Չմոռանանք, թե մեր երիտասարդները Եվրոպայի առաջնությունում ինչ արդյունքներ գրանցեցին: Հաջորդ տարվա երիտասարդների աշխարհի առաջնությունից մեծ ակնկալիքներ ունեմ: Չեմ ցանկանում շատ բան ասել. մենք միշտ փորձում ենք քիչ խոսել, շատ գործել:
Միայն կասեմ, որ գերազանց տարի էր մեզ համար: Այսպիսի բան չի եղել: Աշխարհի չեմպիոն ունեցանք: Դրանով ամեն ինչ ասվում է: Մարզիչների հարցում էլ է շատ ճիշտ ընտրություն կատարվել՝ ի դեմս Հայկ Նազարյանի: Արդյունքներն այդ մասին են խոսում: Ամեն ինչ շատ ճիշտ է ընթանում: Սա թիմային աշխատանքի արդյունք է, լավ մթնոլորտ է հավաքականում՝ իրար օգնել, իրար համար ուրախանալ, ինչը շատ կարևոր է»:
Հաջորդիվ արդեն՝ 2023 թվականին, Օլիմպիական վարկանիշային մրցումներն են: Հակոբ Սերոբյանի խոսքով, նախ պետք է վարկանիշ նվաճել, ապա խոսել Փարիզի 2024 թվականի Խաղերից ունեցած սպասելիքների մասին:
