ՄՕԿ-ը շարունակում է օլիմպիական խաղերի ծրագրում մարզաձևերի փոփոխություններ կատարելու փորձերը:
Օրինակ, Տոկիոյի խաղերում ընդգրկվել էին սքեյթբորդինգը և սոֆթբոլը, Փարիզում սպասվում է բրեյք-դանսի նորամուտը և այլն: Քննարկվում է Լոս Անջելեսում 2028թ. կայանալիք խաղերի մարզաձևերի ցանկը: Այս մասին հայտնում է ՀԱՕԿ-ի պաշտոնական կայքը:
Բանակցություններ են ընթանում ավտոսպորտի միջազգային ֆեդերացիայի հետ: Էլեկտրակարտինգի ընդգրկումը խաղերում իսկական հեղափոխություն կլինի, քանի որ օլիմպիզմի հիմնական սկզբունքը մարդու ֆիզիկական ուժի ու տոկունության դրսևորումն է եղել: Այնպես որ, վեց տարի հետո, ԱՄՆ- ի օլիմպիական խաղերում, մրցակցությունը սպասվում է ոչ թե մարդկանց, այլ նաև . . . շարժիչների միջև։
Դեռ վաղ է ասել, թե ավտոսպորտի որ ենթատեսակը կներառվի ցանկում:
Ակնկալվում է, որ այդ մարզաձևի միջազգային ֆեդերացիան կներկայացնի օլիմպիական չափանիշներին հարմարվելու իր նկատառումները:
Ի դեպ, ավտոսպորտը ավելի քան մեկ դար պայքարում է օլիմպիական ընտանիքում տեղ ունենալու համար: 1900թ. կայացած Փարիզի խաղերում ավտոսպորտի մրցումներ անցկացվել են, սակայն այն ներառված չի եղել պաշտոնական ցանկում, ուստի խաղարկված մեդալների օրինականությունը դեռ քննարկվում է։
Շարժիչային մարզաձևերի զարգացմանը դեմ է եղել ժամանակակից խաղերի հիմնադիր, բարոն Պիեռ դե Կուբերտենը։ Արժե նշել, որ Էլեկտրական կարտինգն արդեն փորձարկվել է «երեխաների վրա >> ՝ 2018թ. Բուենոս Այրեսի պատանեկան օլիմպիական խաղերում:
Պատանեկան սպորտի մարզահանդեսը, ինչ որ տեղ, փորձարարական հարթակ է: Կարատեն, բրեյք –դանսը, սքեյթբորդինգը, 3 × 3 բասկետբոլը օլիմպիական արտոնագրի են արժանացել երիտասարդներին թեստավորելուց հետո:
Այնպես որ, ավտոսպորտի հնարավորությունները բավականին մեծ են, քանզի այն ժամանակ մեծ հետաքրքրություն է առաջացրել արգենտինացիների շրջանում:
Արդյոք արժե օլիմպիական խաղերի ընտանիք ընդգրկել տեխնիկական մարզաձև, այն դեպքում, երբ դասական մարզաձևերից բռնցքամարտը, ծանրամարտը և ժամանակակից հնգամարտը համաշխարհային մարզահանդեսի ծրագրից դուրս մնալու վտանգի տակ են . . .
