Մայիսի 5-ից 6-ը Երևանի Օլիմպիական հերթափոխի մարզական քոլեջում կայացել է ՀՀ վաստակավոր մարզիչ Սամվել Հակոբյանին նվիրված ծանրամարտի` ավանդական դարձած հուշամրցաշարը, որն անցկացվել է արդեն 31-րդ անգամ:
Մրցաշարին մասնակցել է շուրջ 200 պատանի ծանրորդ` ՀՀ բոլոր մարզերից, Երևանից և Արցախի Հանրապետությունից: 13-17 տարեկան ծանրորդներն իրենց ուժերն են փորձել 10 քաշային կարգերում:
Մրցաշարի հաղթողներ են դարձել Սպանդար Վարդանյանը (49 կգ քաշային կարգ, երկամարտ` 158 կգ), Դավիթ Առաքելյանը (55 կգ, երկամարտ` 171 կգ), Վալերիկ Մովսիսյանը (61 կգ, երկամարտ`221 կգ), Տիգրան Կարապետյանը (67 կգ, երկամարտ`245 կգ), Մկրտիչ Մխոյանը (73 կգ, երկամարտ`243 կգ), Հովհաննես Ղահրամանյանը (81 կգ, երկամարտ`260 կգ), Ռոմիկ Պողոսյանը (89 կգ, երկամարտ`283 կգ), Աբել Սարգսյանը (96 կգ, երկամարտ`239 կգ), Վարուժան Կարապետյանը (102 կգ, երկամարտ`253 կգ) և Էդգար Գալստյանը (+102 կգ, երկամարտ`252 կգ):
Սամվել Հակոբյանի որդու` Սամվել Հակոբյան կրտսերի խոսքով տարեցտարի մրցաշարի հանդեպ հետաքրքրությունն ավելանում է. «Այս 31 տարիների ընթացքում, ինչ մրցաշարն անցկացվում է, մեր գրեթե բոլոր չեմպիոններն իրենց մասնակցությունն են ունեցել, կարելի է ասել` անցել են այս ճանապարհով: Մրցաշարի հանդեպ իսկապես մեծ հետաքրքրություն և ոգևորություն կա: Բոլոր մարզիչները` անկախ նրանից անձամբ ճանաչել են Սամվել Հակոբյանին, թե ոչ, մշտապես ձգտում են մասնակիցներ ունենալ նրան նվիրված հուշամրցաշարում ու բարձր պահել Սամվել Հակոբյանի անունը:
Սա արդեն իսկ խոսում է այն մասին, թե որքան մեծ հեղինակություն էր վայելում Սամվել Հակոբյանը` ինչպես Հայաստանում, այնպես էլ դրա սահմաններից դուրս: Բոլորը միշտ պատրաստակամ են ինչպես մրցաշարի կազմակերպման, այնպես էլ մասնակցության առումով»:
Հուշամրցաշարի բացման հանդիսավոր արարողությունն իրականացրել է հայկական ֆուտբոլի լեգենդ, Սամվել Հակոբյանի մտերիմ ընկեր Խորեն Հովհաննիսյանը: Հաղթողներին էլ պարգևատրել են աշխարհի ու Եվրոպայի չեմպիոն Տիգրան Մարտիրոսյանը, ինչպես նաև վաստակավոր մարզչի որդիները` Սամվել և Զավեն Հակոբյանները:
Կազմակերպիչների խոսքով, մրցաշարը միջազգային դարձնելու ցանկություն ունեն, թեև ժամանակը ցույց կտա` որքանով կստացվի:
Սամվել Հակոբյանը Հայաստանի բազմակի չեմպիոն և ռեկորդակիր է: 1976 թվականից աշխատել է Երևանի Օլիմպիական հերթափոխի մարզական քոլեջում`որպես մարզիչ: 1980 թվականից հանդիսացել է ծանրամարտի Հայաստանի հավաքականի գլխավոր մարզիչը, իսկ 1985 թվականից`ծանրամարտի մասնագիտացված դպրոցի տնօրենը: 1984-1987 թվականներին էլ Սամվել Հակոբյանը եղել է ԽՍՀՄ հավաքականի գլխավոր մարզիչը: 1986 թվականին արժանացել է Հայաստանի վաստակավոր մարզչի կոչման: Հավաքականի գլխավոր մարզիչ աշխատելու տարիներին տվել է Եվրոպայի, աշխարհի և Օլիմպիական չեմպիոններ` Իսրայել Միլիտոսյան, Հոկսեն Միրզոյան, Յուրի Վարդանյան, Յուրի Սարգսյան:
