Դժվար էր պատկերացնել, որ կգա մի օր, երբ ավտոմեքենաներն այլևս չեն ունենա մեր կարիքը: Այժմ, մենք ավելի քան մոտ ենք այդ իրադարձությանը: 2020 թվականի ամռանը անցկացվելու է անօդաչու բոլիդների առաջին կանոնավոր առաջնությունը: Սակայն, ինչպե՞ս այդ անշունչ անվասայլակները կարողացան ազատվել մարդու գերությունից:
Ընդունված է մտածել, որ մարդը ամենախելացի և կատարյալ էակն է:
Էվուլուցիայի այս սկզբունքը գործում է մինչև օրս և գալիս է ապացուցելու, որ մենք կանգնած ենք կենդանական բուրգի առաջին հորիզոնականում: Սակայն, այժմ ունենք նոր մրցակից, ով շատ ավելի վտանգավոր է, քան նախկինները:
Հին հունական դիցաբանությունը ասում էր՝ «Արեսը կարողացավ հաղթել իր բոլոր մրցակիցներին՝ պարտվելով իր իսկ կողմից ստեղծված հրեշին»:
18-րդ դարի արդյունաբերական հեղաշրջումը փոխեց մարդու ապրելակերպը, իր հետ բերեց նոր հնարավորություններ և խնդիրներ: Շատ մասնագիտություններ, որոնք նախկինում տարածված էին կորցրին իրենց արդիականությունը:
Առաջին կիսաավտոմատ հաստոցները.19- րդ դար
Մեքենաները փոխարինելու եկան մարդուն.
Սա մի ճկուն «տանգո» է, որտեղ հաղթանակն ու պարտությունը ապրում են կողք կողքի: Մեքանայաշինությունը հեշտացնում է մեր կյանքը, հնարավորություն է տալիս բարձրացնել արտադրողականությունն ու կյանքի որակը: Միաժամանակ, այն մեզնից վերցնում է գործառույթների ու ազատությունների մի մասը:
Կառլ Բենցի ստեղծած ինքնաշարժը (ավտոմեքենան) փոխեց մարդկության պատմության ընթացքը: Այն հնարավորություն տվեց մեզ հայտնվել այնպիսի վայրերում, որտեղ մենք չէինք էլ կարող երազել:
Հայտնի գերմանացին ասում էր՝ «Այս անիվավոր սայլակը պետք կատարի ձեր բոլոր կարգադրությունները: Այն լսող և ուշիմ նժույգ է, որը չունի սիրտ և որը երբեք չի հոգնի և տրտնջա»:
Կառլ Բենց. Առաջին մեքենան
Եվ ահա, մարդկության զարգացումը մեզ բերում է նախկին կարծրատիպերի հերքման հերթական կանգառին: Ախ, որքան կզարմանար ծերունի Կառլը, եթե լսեր ինքնակառավարվող ավտոմեքենաների մասին:
Դեռ 60-ականներից հոլիվուդյան ֆիլմերը ողողված էին ֆուտուրիստական պատկերներով և գաղափարներով. Ռոբոտներ, որոնք գրավում են աշխարհը, այլմոլորակայիններ, ովքեր հեռվից ծիծաղում են մեր բթության վրա: Այն ժամանակ սա թվում էր մանկական զվարճանք, որը երբեք իրականություն չի դառնա:
Իսկ այժմ, ես այս նյութը գրում եմ մի սարքով, որը թթվածնի միլիարդավոր մոլեկուլների միջով այս տեքստը հասցնում է ձեզ: Հրաշք չէ՞:
Իհարկե, հիմա կասեք դա ունի իր գիտական բացատրությունը….չեմ վիճում, քանի որ մենք ապրում ենք մի դարաշրջանում, որտեղ շատերը կորցրել են զարմանալու, հրճվելու ունակությունը: Ամեն ինչ դարձել է առօրեական և սովորական:
Կադր՝ Հետ դեպի ապագա ֆիլմից
Լավ է, որ դեռ կան երազողներ, ովքեր շարժվում են առաջ և ստեղծում են նորանոր հրաշքներ:
Արհեստական ինտելեկտ. Այս բառն արդեն հուշում է, որ այն չունի բնական սկիզբ: Մարդը ստեղծել է համակարգչային մի համակարգ, որը կարողանում է մտածել, կշռադատել ու անել ամենակարևորը՝ ինքնուրույն գործել:
Սա բազում ալգորիթմերի համակցություն է, որով չեմ ծանրաբեռնի ձեր ուշադրությունը: Եթե խոսենք պարզ լեզվով, այսօր թեյնիկը կարող է ավելի խելացի լինել, քան ձեր շքամուտքում ապրող հարևանը:
Արհեստական ինտելեկտի անսահման հնարավորությունների լավագույն ցուցադրումն է ՝ 2013 թվականին նկարահանված «Her» ֆիլմը, որտեղ գլխավոր հերոսը սիրահարվում է արհեստական ինտելեկտին:
Մարդու և գոյություն չունեցողի, աներևույթի միջև ռոմանտիկ կապը ցնդաբանության նոտաներ է իր մեջ պարունակում, բայց հիշենք ՝ տարիներ առաջ այս նույնն ասում էին առցանց հաղորդագրությունների մասին:
Այսպիսով, ինչպե՞ս է արհեստական ինտելեկտը ներխուժում մեքենաների և մասնավորապես ավտոսպորտի աշխարհ:
Ծանոթացեք՝ «ՌոբոՌեյս». սա մեծ սպորտում նոր մարզաձև է , որտեղ պատմության մեջ առաջին անգամ մարդը չի կառավարում մեքենային: «Արեսը ստեղծեց հրեշին» և այն այլևս չունի նրա կարիքը:
Այն իր ստեղծման սկզբից շատ հակասությունների տեղիք է տվել ավտոսպորտի երկրպագուների շրջանում. Ոմանք համարում են, որ այն սպորտի համար անօգուտ և վնասակար գաղափար է, իսկ մյուսները դրանում տեսնում են խոստումնալից և հետաքրքիր մի բան:
Անմիջապես պետք է նշել, որ «ՌոբոՌեյսի» ստեղծողները իրենց առջև նպատակ չեն դնում փոխարինել դասական ավտոսպորտը անօդաչու մեքենայով: Այս երկու ցեղատեսակները գոյություն կունենան միմյանց զուգահեռ և կկատարեն իրենց հատուկ գործառույթները:
ՌոբոՌեյսի բոլիդ
Այս ունիկալ առաջնությունը դեռևս չի անցկացրել ոչ մի լիարժեք մրցավազք (մի քանի փորձնական), բայց կազմակերպիչները ծրագրում են այս ամռանը մեկնարկ տալ անօդաչու բոլիդների պաշտոնական մրցավազքին:
Ահա թե ինչու, մենք որոշեցինք սերտորեն ծանոթանալ այս ծայրաստիճան անսովոր և բավական հեռանկարային սպորտաձևին:
Ամեն ինչ լուրջ է
Անօդաչու մեքենաների համար առաջնություն ստեղծելու գաղափարը հայտարարվեց 2015-ի նոյեմբերին: Դրա կազմակերպիչները `«Formula E» և «Kinetic» ընկերություններն են: Ի սկզբանե նախատեսվում էր 2016/2017 թվականներին անցկացնել մրցավազքեր, սակայն ինժեներներին չհաջողվեց այդքան արագ պատրաստել մեքենաները:
Առաջին մեքենաները հանրությանը ներկայացվեցին 2017-ի փետրվարին, իսկ առաջին փորձնական մրցաշարը անցկացվեց 2019-ի գարնանը:
Բոլիդները հագեցած են 300 կՎտ էլեկտրական շարժիչով և 540 կՎտ մարտկոցով: Դրանք կարող են զարգացնել մինչև 320 կմ / ժամ արագություն: Անվադողերի արտադրությամբ զբաղվում է հանրահայտ Michelin ընկերությունը:
Կարծում եմ՝ ուշադրություն դարձրիք էլեկտրական շարժիչ բառակապակցությանը: Նոր սերնդի մրցարշավը չի կարող անցկացվել ներքին այրման շարժիչներով. 100% Electric.
Էլ ինչ տարբերակ կարող էր լինել, եթե գործին խառնված է Իլոն Մասկը: Նրան պատկանող «Tesla»-ն համարվում է էլեկտրական մեքենաներ արտադրող գլխավոր ընկերությունը:
Պարզ է, որ ապագան էլեկտրական մեքենաներինն է, և այս սպորտաձևը ոչ միայն ժամանցի, այլև տեխնոլոգիաները փորձարկելու հրաշալի միջոց է: Որոշ ժամանակ անց, անօդաչու բոլիդները իրար հետ կմրցեն ոչ միայն փակ երթուղում, այլև կհայտնվեն մեր փողոցներում:
Պատկերացրեք՝ սմարթֆոնով նամակ եք գրում մեքենային և նա գալիս է ձեր նշած վայրը և տեղափոխում նշված հասցեով: Այսպիսի անօդաչու տաքսիներ փորձարկվում են աշխարհի շատ երկրներում: Այս տեխնոլոգիան ակտիվորեն փորձարկում են գրեթե բոլոր հայտնի ավտոարտադրողները:
Սակայն, հենց «ՌոբոՌեյսն» է համարվում այն քարշակ ուժը, որը մեզ հնարավորություն կտա հասկանալու «անշունչ ինտելեկտի» բոլոր հնարավորությունները:
Եթե նրանք կարողանան 320 կմ /ժամ արագությամբ մրցել միմյանց հետ և չբախվել առաջին իսկ շրջադարձում, ուրեմն մարդկությունը կարող է հրաժեշտ տալ վարորդ կոչվող մասնագիտությանը:
Բացի այդ, մեծապես կբարելավվի երկրագնդի կլիմայական վիճակը: Մեր փողոցներում կտեսնենք Էլեկտրական մեքենաներ (որոշներն այժմ էլ կան Երևանում), որոնք օգտագործում են վերականգնվող էներգիա՝ արև , ջուր, քամի…
Այս նյութը գրելու հիմնական շարժառիթը՝ ձեր մեջ զարմանքի կամ հրճվանքի մի փոքրիկ կայծ արթնացնելն էր: Չէ որ, սա միայն սպորտաձև չէ. սա մարդկության նոր ճանապարհի սկիզբն է, որի ծնունդին պարտավոր ենք ներկա լինել յուրաքանչյուրս:
Հիշեք այս անունը՝ «ՌոբոՌեյս». դրանք մեքենաներ են, ովքեր մտածում են:
Նարեկ Գրիգորյան
