Հունգարիայում շարունակվում է ազատ ոճի ըմբշամարտի Եվրոպայի առաջնությունը:
Մ23 տարեկանների աշխարհի առաջնության բրոնզե մեդալակիր, 79 կգ քաշային Արման Ավագյանը սփոփիչ գոտեմարտ է անցկացրել բուլղարացի Միրոսլավ Ստեպանով-Կիրովի հետ և հաղթանակ տարել մրցակցի նկատմամբ՝ հնարավորություն ստանալով պայքարելու բրոնզե մեդալի համար:
Բրոնզե մեդալի համար Ավագյանը կպայքարի Վրաստանի ներկայացուցիչ Վլադիմերի Գամկրելիձեի հետ:
Այսօր ԵԱ-ում պայքարը սկսում է Հայաստանի ևս 3 ներկայացուցիչ:
74 կգ քաշային Հրայր Ալիխանյանը 1/8 եզրափակչում 4։0 հաշվով հաղթելիս է եղել Սերբիայի ներկայացուցիչ Հետիկ Ցաբոլովին, երբ վերջինս խնդրել է բժիշկների միջամտություն։ Զննումից հետո պարզ է դարձել, որ Ցաբոլովը չի կարող շարունակել գոտեմարտել։ Ալիխանյանն առաջ է շարժվում։ Քառորդ եզրափակչում Ալիխանյանը կգոտեմարտի հունգարացի Մուրադ Կուրամագոմեդովի հետ:
Եվրոպայի չեմպիոն Արսեն Հարությունյանը (61 կգ) քառորդ եզրափակչում կգոտեմարտի Մակեդոնիայի ներկայացուցիչ Բեսիր Ալիլիի հետ, իսկ 92 կգ քաշային Հովհաննես Մխիթարյանը մեկնարկային գոտեմարտում ուժերը կչափի Վրաստանի ներկայացուցիչ Միրիանի Մայսուրադձեի հետ:
Այսօր երեկոյան էլ 70 կգ քաշային Արման Անդրեասյանը Հունգարիայի մայրաքաղաք Բուդապեշտում ընթացող Եվրոպայի առաջնությունում դուրս է եկել եզրափակիչ: Ոսկե մեդալի համար նա կգոտեմարտի 2017 թվականի աշխարհի չեմպիոն, աշխարհի և Եվրոպայի կրկնակի բրոնզե մեդալակիր, Վրաստանի ներկայացուցիչ Զուրաբ Յակոբիշվիլիի հետ:
Կիսաեզրափակչում Հայաստանի ներկայացուցիչը մրցել է մոլդովացի Նիկոլայ Գրամեզի հետ և 6:2 հաշվով վստահ հաղթանակ տարել:
Եվրոպայի առաջնության բրոնզե մեդալակիրը պայքարը սկսել է 1/8 եզրափակչից, որտեղ 3:1 հաշվով հաղթել է Թուրքիայի ներկայացուցիչ Սելահաթին Կիլիչսալայանին, ապա քառորդ եզրափակչում 5:1 հաշվով առավելության է հասել Գերմանիայի ներկայացուցիչ Քեվին Քրիստոֆեր Հենկելի նկատմամբ:
Հայաստանի մյուս ներկայացուցիչը՝ 57 կգ քաշային Մանվել Խնձրցյանը, Եվրոպայի առաջնությունում կպայքարի բրոնզե մեդալի համար: Վճռորոշ գոտեմարտում նա ուժերը կչափի գերմանացի Նիկլաս Ստեչելի հետ:
Երեկ պայքարի դուրս եկած Գևորգ Թադևոսյանը (65 կգ) լքել է պայքարը:
