Ինձ միշտ ասել են, որ մրցակցի դարպասի մոտ հատկապես վտանգավոր եմ․ Հայկ Մուսախանյան

«Նոայի» նորեկ, կիսապաշտպան Հայկ Մուսախանյանը ակումբի մամուլի ծառայության հետ զրույցում խոսել է Հայաստանում հայտնվելու, թիմում մթնոլորտի, իր նախընտրած դիրքի, առաջնության ու ծրագրերի մասին:

— Բարի գալուստ «Նոա», Հա՛յկ։ Ինչպիսի՞ն են առաջին տպավորություններդ ակումբից, մարզումներից։

— Հայաստան վերադառնալուց հետո հանդիպեցի «Նոայի» ներկայացուցչի՝ սպորտային տնօրենի հետ։ Ինձ ասացին, որ փնտրում են ֆուտբոլիստի՝ հենակետային գոտում հանդես գալու, այդպես էլ հայտնվեցի այս թիմում։ Առաջին տպավորություններս դրական են, ամեն ինչ դուր է գալիս, շատ լուրջ թիմ է «Նոան», ֆուտբոլիստների միջև լավ հարաբերություններ են։

— Ուսումնամարզական հավաքի ընթացքում «Նոայի» կազմում մասնակցել ես արդեն մի քանի ընկերական խաղերի։ Ինքդ ինչպե՞ս կգնահատես քո խաղը։

— Այդ ընկերականներում իմ խաղը կգնահատեմ 5-ի, չէ, երևի միջին՝ 3-ի, քանի որ դեռևս լավագույն մարզավիճակում չեմ, բայց ժամանակ կա ու կհասցնեմ մինչև առաջնության վերսկսումը լրացնել։

— Քո նախորդ՝ բելառուսական «Էներգետիկ-ԲԳՈՒ»-ի կազմում անցկացրել ես 75 խաղ, դարձել է 5 գոլի և 3 գոլային փոխանցման հեղինակ: Քեզ համարում ես արդյունավետ ֆուտբոլիստ, կա ինչ-որ ռմբարկուական նշաձող, որին կձգտես հասնել։

— Այո, ինձ միշտ ասել են, որ ես հարձակողական ոճի՝ տուգանայինի ֆուտբոլիստ եմ, որ մրցակցի դարպասների մոտ հատկապես վտանգավոր եմ, բայց, անկեղծ ասած, ինձ դուր է գալիս մասնակցել պաշտպանողական գործողություններին, օրինակ՝ հենակետայինի գոտում։ Վերջին մի քանի խաղերում մարզիչը ինձ փորձեց նաև կենտրոնական պաշտպանի դիրքում, խնդիր չունեմ նաև այդ դիրքում խաղալու հետ։

— Մինչ Հայաստան գալը, հետևե՞լ ես Պրեմիեր լիգային, քո տպավորությունները չեմպիոնատի մասին, մրցակցության մասին․․․

— Հետևել եմ, բայց ցավոք, ոչ այնքան հաճախ, որքան կուզենայի։ Հայաստանի Պրեմիեր լիգայում կա 3-4 թիմ, որոնք մշտապես առաջնության վերին հորիզոնականներում են, մրցանակակիրների շարքում։ Շատ լուրջ թմեր են՝ համալրված ուժեղ և փորձառու ֆուտբոլիստներով։

— Իսկ «Նոայի» շանսերը ինչպե՞ս կգնահատես։

— Մրցաշրջանի երկրորդ հատվածի համար «Նոայի» առջև խնդիրը, կարծում եմ, եվրագավաթների գոտում հայտնվելն է, մեդալակիր դառնալը, համոզված եմ՝ ի զորու ենք դա անել։ Դա է հիմնական խնդիրը՝ ամենաբարձր տեղերի համար պայքարելը, և նման ակումբի համար այդպես էլ պետք է լինի։

— Հայկ, դու սոցցանցերում բավականին ակտիվ ես, դատելով պոստերից՝ ոչ միայն ֆուտբոլն է քեզ հետաքրքրում։ Ժամանակ գտնու՞մ ես ակտիվ լինելու այդ հարթակներում, ի՞նչն է գրավում։

— Սոցցանցերում ակտիվությունս պայմանավորված է նրանով, որ մեծ թվով ընկերներ ունեմ՝ Ֆրանսիայում, այլուր, ինձ հետևողները շատ են, ուրեմն պետք է ակտիվ լինեմ շփվեմ՝ ընկերներ, ընտանիք, ինձ ամեն կերպ աջակցում են, ես էլ աշխատում եմ հետ չմնամ․․․

— Դու Ֆրանսիայի և Բելառուսի քաղաքացի ես։ Եթե ընտրելու հնարավորություն ունենայիր՝ որ ազգային ընտրանու կազմում կուզենայիր հանդես գալ։

— Ես մշտապես և անկեղծ պատասխանել եմ այս հարցին, որ ինձ համար առաջնահերթությունը Հայաստանի հավաքանն է, եթե լինի հրավերը՝ շատ ուրախ կլինեմ։ Իսկ դրա համար անհրաժեշտ է ցույց դաշտում ցույց տալ այն ամենը, ինչ կարող եմ, և առաջին հերթին արդյունավետ լինել իմ ներկայիս թիմի՝ «Նոայի» համար․․․

— Եվ վերջում, ի՞նչ նպատակներ ես դնում քո առջև՝ կարճաժամկետ ու երկարաժամկետ:

— Իմ առջև խնդիր եմ դրել մինչև այս մրցաշրջանի ավարտը «Նոայի» կազմում պայքարել բարձր տեղերի համար, իսկ հետո, կարծում եմ, պիտի աշխատեմ հավաքական հրավիրվելու ուղղությամբ։