ՊՍԺ-ի չորս ֆուտբոլիստներ վարակվել են կորոնավիրուսով, հայտնում է ֆրանսիական ակումբի մամուլի ծառայությունը։ Բացի այդ, հայտնի են նաև եվրոպական թոփ-5 առաջնությունների այլ ակումբներում նմանատիպ դեպքեր։
Նշենք, որ ՊՍԺ-ի վարակված ֆուտբոլիստների անունները չեն բացահայտվում։ Հայտնի է միայն, որ թեստերն անցկացվել են ձմեռային դադարի ժամանակ՝ մինչ մարզումները վերսկսելը։ ՊՍԺ-ն գլխավորում է Ֆրանսիայի առաջնության մրցաշարային աղյուսակը։ Փարիզցիները վաստակել են 46 միավոր։ Հաջորդ հանդիպումը նրանք կանցկացնեն հունվարի 3-ին «Վանի» հետ։ Պայքարը կկայանա Ֆրանսիայի գավաթի 1/16 եզրափակչի շրջանակներում։
Թուրինի «Յուվենտուսը» տեղեկություն է տարածել պաշտպան Ջորջիո Կյելինիի վարակման մասին։ Նշվում է, որ իտալական ակումբի վետերանը մեկուսացվել է գործող COVID-19 արձանագրության համաձայն։
Հայտնի է դարձել նաև Մյունխենի «Բավարիայի» ֆուտբոլիստների մոտ կորոնավիրուսի թեստերի դրական լինելու մասին։ Այդ ցուցակում են Մանուել Նոյերը, Օմար Ռիչարդսը, Քինգսլի Կոմանը և Քորենտին Տոլիսսոն: Այս մասին հաղորդում է գերմանական ակումբի կայքը։ Կորոնավիրուս է հայտնաբերվել նաև մարզիչ Դինո Տոփլլերի մոտ։ Նրանք բոլորը տնային մեկուսացման մեջ են։ Վարակումների բռնկման պատճառով մյունխենցիները մարզումները հետաձգել են հունվարի 2-ից 3-ը։ Հունվարի 7-ին Մյունխենի «Բավարիան» Բունդեսլիգայի 18-րդ տուրի շրջանակներում կհյուրընկալվի Մյոնխենգլադբախի «Բորուսիային»։ Մյունխենցիները 43 միավորով գլխավորում են աղյուսակը։ Նրանք 9 միավորով գերազանցում են Դորտմունդի «Բորուսիային»:
«Լիվերպուլի» գլխավոր մարզիչ Յուրգեն Կլոպը վարակվել է կորոնավիրուսով։ Գերմանացին չի կարողանա գլխավորել թիմը հունվարի 2-ին «Չելսիի» դեմ խաղում, որը կանցկացվի Պրեմիեր լիգայի 21-րդ տուրի շրջանակներում։
