2021 թվականի լավագույն 10 մարզիկները ՀՀ վարչապետ Նիկոլ Փաշինյանի կողմից պարգևատրվեցին Բաղրամյան 26-ում: Միջոցառման ներկա են գտնվել նաև ԿԳՄՍ նախարար Վահրամ Դումանյանը և նախարարի տեղակալ Կարեն Գիլոյանը, պաշտոնատար այլ անձինք և մարզաշխարհի ներկայացուցիչներ:
Միջոցառմանը ելույթով հանդես եկավ ՀՀ վարչապետ Նիկոլ Փաշինյանը․
«Մարզական հանրության հարգելի ներկայացուցիչներ, սիրելի մարզիկներ և մարզիչներ, նախ ուզում եմ բոլորիդ շնորհակալություն հայտնել 2021 թվականի ընթացքում ունեցած մրցելույթների և առավել ևս հաղթանակների համար։ Գիտեք, որ առավել ևս 2021 թվականին մեր հանրությունը կրկնակի անգամ ավել ուներ հաղթանակների կարիք։ Այն սոցիալ-հոգեբանական վիճակում, որը հաստատվել է Հայաստանի Հանրապետությունում 44-օրյա պատերազմից հետո, մարզական ելույթներն առավել կարևորություն են ստանում։ Դրանց նշանակությունը մեծ է պետական և համազգային առումով։
Այս առումով 2021 թվականին գրանցած մրցելույթների հաջողությունները կրկնակի գնահատանքի են արժանի։ Պետք է նշեմ, որ մեր ռազմավարական ընկալումն այն է, որ սպորտը երկրի բնականոն զարգացման շարժիչ ուժն է, և այստեղ խոսքը ոչ միայն ինքնին սպորտի զարգացման մասին է, այլև ընդհանրապես՝ երկրի զարգացման մասին, որովհետև մարզական ասպարեզում գրանցած հաջողությունները բերում են տնտեսական հաջողությունների։
Այսպիսով բարձրանում են երկրի տնտեսական գրավչությունը, զբոսաշրջային գրավչությունը, և գալիս են տնտեսական էֆեկտներ։ Մարզական հաջողություններն ընդլայնում են նաև երկրի դիվանագիտական հնարավորությունները՝ բարձրացնելով պետության միջազգային վարկը»։
Հիշեցնենք՝ լավագույնների ընտրությունը կայացել է դեկտեմբերի 21-ին ԿԳՄՍ նախարարությունում հավատարմագրված մարզական լրագրողների և ՀՀ հավաքական թիմերի գլխավոր մարզիչների քվեարկության համադրությամբ:
2021 թվականի 10 լավագույն մարզիկներ էին ճանաչվել`
Ալեքսանյան Արթուր – հունահռոմեական ըմբշամարտ
Ամոյան Մալխաս – հունահռոմեական ըմբշամարտ
Բաչկով Հովհաննես – բռնցքամարտ
Դանիելյան Էլինա –շախմատ
Դավթյան Արթուր – սպորտային մարմնամարզություն
Լալայան Վարազդատ – ծանրամարտ
Հարությունյան Արսեն – ազատ ոճի ըմբշամարտ
Մարտիրոսյան Սիմոն – ծանրամարտ
Մինասյան Գոռ — ծանրամարտ
Չալոյան Դավիթ — բռնցքամարտ
2021 թվականի «Հանդիսատեսի համակրանք» անվանակարգում էլ SMS քվեարկության արդյունքում հաղթող էր ճանաչվել հունահռոմեական ոճի ըմբշամարտի Եվրոպայի Մ23 տարեկանների հաղթող, աշխարհի չեմպիոն, 72 կգ քաշային Մալխաս Ամոյանը:
«Տարվա 10 լավագույն մարզիկներ» մրցույթի մրցանակային ֆոնդը 50 մլն դրամ է:
GALLERY
