«Դաբլ Թրի բայ Հիլթոն» հյուրանոցում այսօր տեղի է ունենում «Տարվա լավագույն 10 մարզիկներ» մրցույթի քվեարկությունը։
Քվեարկությանը մասնակցում են ՀՀ հավաքականների գլխավոր մարզիչները, ԿԳՄՍ նախարարությունում հավատարմագրված մարազական լրագրողները։ ArmSport-ը, ինչպես նախորդ տարիներին, այս անգամ ևս իր մասնակցությունն ունեցավ քվեարկությունում։
Մինչ քվեարկությանը մասնակցելը մեր խմբագրությունը նախ անցկացնում է ներքին քվեարկություն։ Մեր խմբագրության կողմից քվեարկության վերջնական պատկերն ունի հետևյալ տեսքը․
1․ Արթուր Դավթյան (Սպորտային մարմնամարզություն)
Թիմային քննարկումների արդյունքում առաջին տեղի գլխավոր հավակնորդներն էին մարմնամարզիկ Արթուր Դավթյանը և հունահռոմեական ոճի ըմբիշ Մալխաս Ամոյանը։ Ի Վերջո, ձայների չնչին առավելությամբ առաջին հորիզոնականը զբաղեցրեց Դավթյանը։
2021 թվականին Արթուր Դավթյանը նախ շվեյցարական Բազելում նվաճեց Եվրոպայի չեմպիոնի տիտղոսը, ապա Տոկիոյի Օլիմպիական Խաղերում դարձավ բրոնզե մեդալակիր։
2․ Մալխաս Ամոյան (Հունահռոմեական ոճի ըմբշամարտ)
22-ամյա ըմբիշն ապրիլին դարձավ Վարշավայում կայացած Եվրոպայի առաջնության արծաթե մեդալակիր, ապա Նորվեգիայի մայրաքաղաք Օսլոյում նվաճեց աշխարհի չեմպիոնի տիտղոսը։
3․ Հովհաննես Բաչկով (Բռնցքամարտ)
Բաչկովը նույնպես 2021 թվականին երկու անգամ կանգնեց պատվո հարթակին։ Նախ Տոկիո 2020-ում Հովհաննեսը նվաճեց բրոնզե մեդալ, ապա նույն հարկի մեդալակիր դարձավ Բելգրադում կայացած աշխարհի առաջնությունում։
4․ Էլինա Դանիելյան (Շախմատ)
Չնայած այն հանգամանքին՝ որ Էլինան մեկ տիտղոս է նվաճել, սակայն այդ տիտղոսն իսկապես պատմական նշանակություն ունի։ Դանիելյանը Ռումինիայի Յասի քաղաքում հռչակվեց Եվրոպայի անհատական առաջնության չեմպիոն։ Նա Հայաստանի ներկայացուցիչներից առաջինն էր, որը կարողացավ կանանց պայքարում նման հաջողություն գրանցել։
5․ Դավիթ Չալոյան (Բռնցքամարտ)
24-ամյա Չոլոյանը դարձավ 2021 թվականի գլխավոր բացահայտումը։ Բռնցքամարտիկը հրաշալի հանդես եկավ Բելգրադում տեղի ունեցած աշխարհի առաջնությունում՝ դառնալով արծաթե մեդալակիր։ Եզրափակչում Չալոյանն արժանի դիմադրություն ցույց տվեց Ռուսաստանի ներկայացուցիչ Մարկ Պետրովսկուն, սակայն մեկ մրցավարի որոշման պատճառով նվաճեց միայն արծաթ։
6․ Արթուր Ալեքսանյան (Հունահռոմեական ոճի ըմբշամարտ)
Ալեքսանյանը տարիներ շարունակ իր հիանալի ելույթներով բոլորիս սովորեցրել է, որ միայն ոսկե մեդալակիր է դառնալու, այդ պատճառով վերջինիս նվաճած արծաթը կամ բրոնզը ինչ-որ տեղ անհաջողություն է համարվում։
30-ամյա ըմբիշը Տոկիո 2020-ում դարձավ արծաթե մեդալակիր, որն Արթուրի միակ մարզական նվաճումն էր ընթացիկ տարում։
7․ Սիմոն Մարտիրոսյան (Ծանրամարտ)
Սիմոնի պարագայում ևս կարելի նույն միտքը կրկնել։ 24-ամյա ծանրորդը Տոկիո 2020-ում դարձավ արծաթե մեդալակիր, իսկ օրերս Տաշքենդում կայացած աշխարհի առաջնությունում բավարարվեց միայն բրոնզով, ինչը Մարտիրոսյանի պարագայում կարելի է ձախողում համարել՝ հաշվի առնելով վերջինիս պոտենցիալը և նախկինում գրանցած հիանալի հաջողությունները։
8․ Վարազդատ Լալայան (Ծանրամարտ)
Չալոյանի հետ միասին մյուս բացահայտումը Լալայանն էր։ 22-ամյա ծանրորդը նախ բրոնզե մեդալակիր դարձավ Մոսկվայում տեղի ունեցած Եվրոպայի առաջնությունում, ապա արծաթե մեդալ նվաճեց Տաշքենդում կայացած աշխարհի առաջնությունում՝ շրջանցելով Գոռ Մինասյանին։ Հարկ է նշել, որ Վարազդատն առաջին անգամ էր մասնակցում մեծահասակների աշխարհի առաջնությանը։
9․ Գոռ Մինասյան (Ծանրամարտ)
Գոռին կարելի է համարել «ամենաանբախտ» մարզիկներից մեկը։ Մինասյանը գրեթե բոլոր խոշոր մրցաշարերում իրեն հիանալի է դրսևորում՝ ցուցադրելով իր լավագույն որակները։ Այստեղ խնդիրը կայանում է նրանում, որ գերծանր քաշային կարգում է հանդես գալիս աշխարհի՝ «գերհսկան»՝ վրացի Լաշա Տալախաձեն, որը հնարավորություն չի տալիս ոչ մի մրցակցի՝ թեկուզ որոշ չափով մոտենալ իրեն։ Բայց պետք է ընդգծել նաև, որ Տալախաձեի անձնական քաշը մոտավորապես 30 կիլոգրամով ավելի է, քան Գոռինը։ Հետևաբար, վերջինս լուրջ հաղթաթուղթ ունի, որից հրաշալիորեն կարողանում է օգտվել։
2021 թվականին Մինասյանն արծաթե մեդալակիր դարձավ Մոսկվայում կայացած Եվրոպայի առաջնությունում՝ առջևում թողնելով միայն Տալախաձեին։ Օրերս էլ մեր ծանրորդը բրոնզ նվաճեց Ուզբեկստանի մայրաքաղաքում տեղի ունեցած Աշխարհի առաջնությունում։
10․ Լիանա Գյուրջյան (Ծանրամարտ)
19-ամյա Գյուրջյանը բրոնզե մեդալակիր դարձավ Մոսկվայում տեղի ունեցած Եվրոպայի առաջնությունում։ Անխոս, Գյուրջյանի կարիերան դեռևս առջևում է, և տաղանդավոր մարզուհին կհասցնի գրանցել ավելի լուրջ և խոսուն հաջողություններ։
Սա մեր ընտրությունն է քվեարկության առաջադրած պայմանների շրջանակներում, իսկ իրականում մեզ համար անգնահատելի են ցանկացած մարզիկի նվաճումները՝ անկախ սպորտաձևից, մեդալի հարկից և մրցաշարի հեղինակությունից։ Անգնահատելի է մարզիկների կատարած աշխատանքը, նվիրումը, կամքն ու ներդրած ավանդը հայկական սպորտի զարգացման գործում՝ մեր երկրի համար այս դժվարին ժամանակներում։
Հիշեցնենք, որ քվեարկության վերջնական արդյունքները կամփոփվեն այսօր երեկոյան։
Սուրեն Մելիքսեթյան
