ՀՖՖ նախագահ Արմեն Մելիքբեկյանն այսօր տարեվերջյան մամուլի ասուլիսի ընթացքում ամփոփել է տարին: Ասուլիսի սկզբում Մելիքբեկյանը ելույթ ունեցավ, որի ընթացքում խոսեց չորս հիմնական կետերի մասին։
Հավաքականի համալրումը նոր ֆուտբոլիստներով՝ առաջնային խնդիր
Առաջինը դա հավաքականի մրցելույթներն են տարվա ընթացքում։ Մեզ համար տարին երկու մասի բաժանվեց։ Գարնանային հատվածում եղան փայլուն հաղթանակներ և աշնանը, երբ եղան պարտություններ։ Ակնհայտ է գարնանանյաին հատվածը ակնկալիքների նշաձողը բարձրացրեց և մենք սկսեցինք ավելին սպասել; Իմ կարծիքով, եթե այդ 12 միավորը լիներ նաև երկրորդ կեսում, ապա հիասթափություն չէր լինի։ Սա պատմության մեջ երկրորդ արդյունքն է։ Մենք բազմիցս ասել ենք, որ մեր նպատակը յուրաքանչյուր խաղում միավոր վաստակելն է, որը ստացվեց խաղերից 7-ում։ Կարևոր ձեռքբերումն այն էր, որ հավաքականում ունենք մեծ թվով ֆուտբոլիստներ, և դադարել է լինել փակ, որտեղ հրավիրվում են միշտ նույն ֆուտբոլիստները։ Հիմա մենք ունենք 5 տասնյակ ֆոիտբոլիստներ, որոնց շրջանում է մարզիչն ընտրություն կատարում։ Մենք Կապառոսին հստակ խնդիր ենք առաջադրել՝ պետք է պայքարենք, ներգրավվենք նոր ֆուտբոլիստներ և հետագայում պայքարենք ԵՎՐՈ 2024-ի համար։ Մենք հիմա այդ փուլում ենք, որտեղ դեռևս մեր մշակած ծրագիրն ընթացքի մեջ է։
Առջևում ունենք Ազգերի լիգայի մրցաշար, և հավաքականի առջև խնդիր է դրված կայունացնել խաղը։ Նվազագույն խնդիրն է դուրս չմնալ Բ դիվիզիոնից։
Նոր ֆուտբոլիստների ներգրավվման մասով՝ նախորդ ընտրական փուլում ակտիվ գործընթաց է եղել, մենք օգտագործել ենք բոլոր ռեսուրսները՝ երիտարդական հավաքական, ԲԽ առաջնություն և իհարկե արտասահմանում հանդես եկող հայ ֆուտբոլիստներ։ Երեք ուղղություններով աշխատել ենք ու շարունակելու ենք։
90 խաղադաշտ՝ 7 մարզում
Երկրորդ՝ ենթակառուցվածքների զարգացումը կարևոր է մեզ համար։ Մենք հետամուտ ենք բարելավմանը և աշխատում ենք դա անել մարզելուն զուգահեռ։ Մենք ավարտին ենք հասցրել և հանձնել 90 խաղադաշտ 7 մարզում։ Եվ այս տարի շատ ակտիվ ծրագրեր իրականացրինք, դրանց թվում՝ Արմավիրի մարզադաշտի բացում, ավարտում ենք Աբովյանի և Վանաձորի մարզադաշտերի շինարարական աշխատանքները։ Գալիք տարվա առաջին կիսամյակում երկուսն էլ կհանձնենք շահագործման, և բացի դա ունենք ևս երեք ծրագիր։ Լուսավորություն կտեղադրվի Գորիսի քաղաքային մարզադաշտում, գարնանը կսկսվի տեղադրման փուլը։ Բոլոր մարզադաշտերում նախատեսում ենք անցկացնել տարբեր տարիքային հավաքականների հանդիպումներ։
ՀՖՖ-ն կարևորում է, որ հաջորդ տարվա կեսում կշահագործենք Խորեն Հովհաննիսյանի անվան մարզադպրոցը, որտեղ կմարզվի 200 երեխա։ Հետագայում կարծում եմ՝ նույնպես այսպիսի ծրագրեր կլինեն։
VAR համակարգը՝ ազգային առաջնությունն ավելի լավը դարձնելուն ընդառաջ
Երրորդը՝ Ազգային առաջնության մասին․ VBET ՀՊԼ-ն կարծում եմ նոր ընթացք է ստացել։ Մենք համատեղ ջանքերով փորձում ենք առաջնութունն ավելի դիտարժան դարձնել․ Այս առումով կարևորագույն դեր է խաղալու VAR համակարգի ստեղծումը։ Մենք արդեն մասնագետներ ենք ներգրավել, և հաջորդ մրցաշրջանում Հայաստանում հնարավոր է ունենանք VAR համակարգ; Սա միանշանակ մեր առաջնությունը դարձնելու է ավելի լավը, բարձրացնելու է վստահության մակարդակը։
Հայաստանի չեմպիոնն առաջին անգամ խմբային փուլում է հանդես եկել եվրագավաթներում։ Լավ մրցելույթյներով աչքի է ընկել Արարատը, և հույս ունենք, որ գալիք տարի կհաջողեն մեր թիմերը։
Գոհ ենք ԲԿՄԱ-ի նախագծից, ուրախալի է «Նորավանքի» փաստը, որը հաջորդ տարի ամենայն հավանականությամբ կխաղա սեփական ստադիոնում։ Օգոստոսին Կապան վերադարձավ ֆուտբոլը, այնտեղ խաղում է «Գանձասարն» Առաջին խմբում։
Եվ վերջին կետը՝ դա ֆուտբոլի մասսայականությունն է։ Առաջնայինը սիրողական առաջության մեկնարկն է։ Հաջորդ տարի մենք պետք է մեծացնենք աշխարհագրությունը։ Դպրոցական առաջնության մասին շատ կարևոր նախաձեռնություն է, բազմաթիվ երեխաներ հնարավորություն ունեն ֆուտբոլ խաղալ ու հաճույք ստանալ։
