YouGov-ը կազմել է տարվա ամենահարգված մարդկանց ցանկը, որում ընդգրկվել են նաև ֆուտբոլիստներ Կրիշտիանու Ռոնալդուն և Լիոնել Մեսսին։
Ամենահարգված տղամարդկանց և կանանց վարկանիշը, ինչպես և նախորդ տարի, գլխավորել են ԱՄՆ նախկին նախագահ Բարաք Օբաման և նրա կինը՝ Միշելը:
Աշխարհի ամենահարգված տղամարդկանց տասնյակում են նաև Microsoft-ի հիմնադիր Բիլ Գեյթսը, Չինաստանի նախագահ Սի Ցզինփինը, ֆուտբոլիստներ Կրիշտիանու Ռոնալդուն և Լիոնել Մեսսին, դերասան Ջեքի Չանը, միլիարդատեր և SpaceX-ի հիմնադիր Իլոն Մասկը, Հնդկաստանի վարչապետ Նարենդրա Մոդին և Alibaba-ի հիմնադիր Ջեք Ման:
Ամենահարգված կանանց ցանկում են դերասանուհի, ՄԱԿ-ի հատուկ բանագնաց Անջելինա Ջոլին, Մեծ Բրիտանիայի թագուհի Էլիզաբեթ Երկրորդը, հեռուստահաղորդավարուհի Օփրա Ուինֆրին, դերասանուհիներ Սքարլեթ Յոհանսոնը, Էմմա Ուոթսոնը, Պրիյանկա Չոպրան, երգչուհի Թեյլոր Սվիֆթը, Գերմանիայի նախկին կանցլեր Անգելա Մերկելը և իրավապաշտպան Մալալա Յուսուֆզայը:
Հարցումն անցկացվել է այս տարվա գարնանից: Դրան մասնակցել է ավելի քան 42 հազար մարդ աշխարհի 38 երկրից և տարածքներից:
