«Սա ոչ միայն մարզադաշտ է, այլ նաև ֆուտբոլային դպրոց։ Նախատեսում ենք, որ սա դառնա բազմաֆունկցիոնալ համալիր»,-Արմավիրի «Քաղաքային» մարզադաշտի վերաբացման ընթացքում այս մասին լրագրողների հետ զրույցում ասաց ՀՖՖ նախագահ Արմեն Մելիքբեկյանը։
«Այստեղ հանդիպումներ կանցկացնեն երիտասարդական ու պատանեկան հավաքականները։ Նախատեսում ենք հաջորդ տարվա Հայաստան-Ուկրաինա երիտասարդական հավաքականների խաղը անցկացնել այս մարզադաշտում։ Նախնական համաձայնությամբ՝ այստեղ մարզվելու են «Սարդարապատ» ֆուտբոլային ակումբի մանկապատանեկան թիմերը։ Բարձրագույն խմբի ակումբներից մեկին առաջարկելու ենք տնային խաղերն անցկացնել այստեղ։ Դեռ չգիտենք, թե որ թիմը կլինի։ Դա էապես կաշխուժացնի ֆուտբոլային կյանքն Արմավիրում»,-նշեց Մելիքբեկյանը։
Մարզադաշտի վերանարոգման համար ծախսվել է 688 մլն դրամ, և հիմնական ֆինանսավորումը եղել է ՀՖՖ-ի կողմից, աջակցություն է եղել նաև ՖԻՖԱ-ից և ՈւԵՖԱ-ից։ Արմեն Մելիքբեկյանից տեղեկանում ենք, որ հաջորդ տարի ևս երկու մարզադաշտ կհանձնվի շահագործման։
«Մինչև մայիսի վերջ շահագործման կհանձնվեն նաև Վանաձորի և Աբովյանի մարզադաշտերը։ Բոլոր այս մարզադաշտերն ունեն 3 հազարից ավելի նստատեղ, և տարբեր տարիքային հավաքականները կարող են հանդիպումներ անցկացնել։ Մյուս մարզադաշտերը նույնպես կառաջարկենք Բարձրագույն խմբի թիմերին։ Բացի դրանից, հաջորդ տարի Գյումրիի քաղաքային մարզադաշտը լուսավորություն կունենա, և արդեն կկարողանանք այնտեղ երեկոյան հանդիպումներ անցկացնել, որը շատ կարևոր է։ Ավարտին ենք մոտեցնում նաև Միկայի մարզադաշտի փոխանցումը ՀՖՖ-ին և այն առաջիկայում կկարողանա ընդունել Հայաստանի առաջնության հանդիպումներ»,-նշեց Մելիքբեկյանը։
Խոսելով «Ազգային» մարզադաշտ կառուցելու գաղափարի մասին՝ ՀՖՖ նախագահը տեղեկացնում է․
«Տարբեր բանակցային փուլեր են եղել ազգային մարզադաշտի վերաբերյալ, որոնք դադարեցվել էին պատերազմի ու կորոնավիրուսի պատճառով, բայց այս տարի նորից սկսել ենք բանակցությունները։ Չեմ կարող ասել, որ շատ առաջ ենք գնացել։ Կառավարության հետ այդ մասին լրացուցիչ քննարկումներ ենք ունենալու։ Չեմ կարող խոստանալ, որ դա կլինի, բայց ֆեդերացիան շարունակում է ամեն կերպ աշխատել, որ դա իրականություն դառնա, քանի որ որոշ դեպքերում հասկանում ենք, որ դա մեզ համար շատ անհրաժեշտ է»։
Ի պատասխան ArmSport-ի հարցին, թե ինչո՞ւ ֆեդերացիայի նախագահը տևական ժամանակ հանդես չի գալիս մամուլի ասուլիսով, Մելիքբեկյանը նկատեց․
«Այս տարի մենք դեռ ունենք Ազգերի լիգայի վիճակահանություն, տարբեր միջոցառումներ և դրանից հետո հանդես եմ գալու մամուլի ասուլիսով և պատասխանելու եմ բոլոր հարցերին»,-ասաց ՀՖՖ նախագահը։
Խնդրեցինք նաև մեկնաբանել «Սևան» ակումբի շուրջ ծավալվող իրադարձությունների ու ՀՖՖ-ին ուղղված մեղադրանքների առնչությամբ, որոնց նույնպես ՀՖՖ նախագահը խոստացավ անդրադառնալ հրավիրվելիք մամուլի ասուլիսի ժամանակ։
