«Շերիֆի» գլխավոր մարզիչ Յուրի Վերնիդուբը խոսել է Չեմպիոնների լիգայի որակավորման երկրորդ փուլի՝ «Ալաշկերտի» հետ այսօր կայանալիք պատասխան խաղի մասին․
Մասնագետի խոսքերը փոխանցում է մոլդովական ակումբի պաշտոնական կայքը․
-Ի՞նչ վիճակով է թիմը մոտենում Հայաստանի չեմպիոնի հետ պատասխան խաղին։ Կա՞ն կորուստներ, որոնց վրա չեք կարող հույս դնել։
-Թիմի տրամդրվածությունը հիանալի է։ Մեկշաբաթյա նախապատրաստական փուլ ենք անցել՝ «Զիմբրուի» հետ խաղի հետաձգման շնորհիվ։ Տղաները մարզումային գործընթացին շատ լուրջ են վերաբերվել։ Հասկանում ենք, որ այն հաշիվը, որ հիմա ունենք՝ Հայաստանում գրանցված 1-0-ն, հանգստանալու առիթ չէ։ Պետք է պատրաստ լինեն։ Կարծում եմ՝ հայկական թիմը ևս ապացուցելու բաներ ունի։ Պատրաստ ենք։ Սպասում ենք այսօրվա խաղին, որպեսզի դաշտ դուրս գանք ու պայքարենք։
-Այս խաղի մարտավարությունն ընտրելիս մտքեր չե՞ք ունեցել պաշտպանվել՝ հաշիվը պահելու համար։
-Երբ սկսում ես պաշտպանվել, ամենից վատն է։Ցանկացած սխալ կարող է հանգեցնել նրան, որ հետո չես կարողանա վերակառուցվել։ Պետք է խաղալ այն խաղը, որը մարզում ենք, որը կարողանում ենք խաղալ։ Չենք հեռանա մեր սկզբունքներից։
-Երևանում խաղացինք 4-4-2 մարտավարությամբ։
-Մենք այդ կերպ պարզապես դիրքային գրոհ էինք կազմակերպում։ Հասկանում էինք, որ «Ալաշկերտը» ևս կկիրառի 4-4-2 սխեման, երբ երկու հարձակվող մշտապես պրեսինգի է դիմում, գրոհում են կենտրոնական պաշտպանները։
-Այսօրվա խաղում փոփոխություններ կլինե՞ն։
-Մենք ևս մեկ անգամ դիտել ենք առաջին խաղը, վերլուծել են մեր սխալները, որոնք քիչ չէին։ Ընտրել ենք լավագույն դրվագները, ցույց ենք տվել ֆուտբոլիստներին, թե ինչպես է պետք գործել։ Սկզբունքորեն, լրջորեն ենք պատրաստվել։ Տղաներն ամեն ինչ հասկանում են ու պատրաստ են առաջիկա խաղին։
-Ունիկալ խաղ է լինելու․ փոխվել է եվրագավաթների ձևաչափը։ Չեղարկվել է արտագնա գոլի կանոնը, բայց ամենակարևորն այն է, որ ավելացել է երրորդ մրցաշարն ու հիմա, եթե դուրս գա Չեմպիոնների լիգայի երրորդ փուլ, թիմն, ըստ երևույթին, աշնանը կմասնակցի եվրագավաթային մրցաշարի։ Այս մասին թիմը տեղյա՞կ է, ու արդյոք սա ավելորդ լարվածություն չի հաղորդի։
-Այս առումով պարզ պատասխան կտամ։ Եկեք մտածենք խաղի ու հաղթանակի մասին։ Չպետք է մտածենք, թե ուր ենք արդեն հայտնվել կամ ուր չենք հայտնվել։ Պետք է առաջ շարժվենք, խաղանք բարձրակարգ ֆուտբոլ։ Քայլ առ քայլ պետք է առաջ շարժվենք։ Այլ բանի մասին մտածելը վատ է։ Մենք մտածում ենք միայն մեր խաղի մասին, որ պետք է լավ հանդես գանք ու հաղթենք։
