Այսօր, Երևանի ժամանակով 23։00-ին, Գդանսկի մարզադաշտում կհնչի ֆրանսիացի մրցավար Տյուրպինի առաջին սուլիչը, որը կարձանագրի Եվրոպա Լիգայի եզրափակչի՝ «Վիլյառեալ»-«Մանչեսթեր Յունայթեդ» հանդիպման մեկնարկը։
Դեղին սուզանավը՝ ՉԼ-ի ճանապարհին
Եվրոպա լիգայի կիսաեզրափակչում «Վիլյառեալը» հաղթեց «Արսենալին»: Իսպանական թիմը տնային հաղթանակ տարավ մրցակցի նկատմամբ (2: 1), իսկ Անգլիայում կայացած պատասխան խաղն ավարտվեց ոչ-ոքի (0: 0): Եվ ահա, եզրափակչում, «Միստր Եվրոպա Լիգայի» (Էմերի) թիմը կրկին կհանդիպի անգլիական թիմի հետ։
Սակայն «Մանչեսթեր Յունայթեդին» պետք չէ համեմատել լոնդոնյան ակումբի հետ․ ներկա պահին, թող ինձ ներեն «Արսենալի» երկրպագուները, բայց ՄՅՈւ-ն ավելի ահեղ մրցակից է, քան Արտետայի թիմը։ Բայց իսպանական ակումբն ունի շատ կարևոր մի թալիսման․ դա թիմի մարզիչն է։ էմերին 3 տարի անընդմեջ՝ 2014-ից 2016 թվականներին, «Սևիլիային» դուրս է բերել եվրոպական ակումբի ֆուտբոլի կարևորությամբ երկրորդ մրցաշարի եզրափակիչ։ Բոլոր երեք դեպքում էլ «Սևիլիան» նվաճել է ԵԼ-ի Գավաթը։ Իսկ 2019 թվականին Էմերին եզրափակիչ է դուրս բերել «Արսենալին», բայց նրա թիմը տիտղոսը զիջել է Լոնդոնի «Չելսիին»։ Ավելի վաղ Էմերին մրցաշարի ռեկորդ էր սահմանել մարզիչների շրջանում՝ կարիերայի ընթացքում 6-րդ անգամ թիմին դուրս բերելով Եվրոպա լիգայի կիսաեզրափակիչ։ Բացի «Վիլյառեալից» և «Սևիլիայից», Էմերին մեկական անգամ էլ կիսաեզրափակիչ էր դուրս բերել «Վալենսիային» և «Արսենալին»։
Բացի գլխավոր մարզչից, թիմի ֆուտբոլիստներից կարելի է առանձնացել նաև փորձառու պաշտպան Ռաուլ Ալբիոլին, երիտասարդ տաղանդ Պաու Տորեսին, Նիգերիացի կիսապաշտապան Չուկվուեզեին, ում մասնակցությունն այսօրվա խաղում հարցականի տակ է, 18-ամյա կիսապաշտպան Պինյոյին, հարձակվողներ Ալկասերին, Բակային և թիմի ռմբարկու, Իսպանիայի հավաքականի հարձակվող Ժերարդ Մորենոյին։
«Մանչեսթեր Յունայթեդը» կարող է հաղթել ցանկացածին, բայց մենք ունենք մեր հաղթաթուղթը: Մենք մանրակրկիտ ուսումնասիրել ենք «Յունայթեդին»: Պետք է օգտվենք այն հնարավորություններից, որոնք մեզ կընձեռնվեն»,— Էմերիի խոսքերն է փոխանցում ՈւԵՖԱ-ի պաշտոնական կայքը:
Չմոռանանք նաև, որ նժարին դրված է ոչ միայն Եվրոպա Լիգայի մետաղյա գավաթը, այլ նաև ՉԼ հաջորդ մրցաշրջանի ուղեգիրը, որն, ի դեպ, «դեղին սուզանավը» չկարողացավ ձեռք բերել ներքին առաջնությունում, իսկ ՄՅՈւ-ն այդ ուղեգիրն արդեն ունի՝ ներքին առաջնությունում գրավելով երկրորդ տեղը։
Ֆերգյուսոնի աջակցությամբ
«Մանչեսթեր Յունայթեդը» դուրս եկավ Եվրոպա լիգայի եզրափակիչ «Ռոմայի» հետ դիմակայությունից հետո: Անգլիական ակումբը տանը հաղթեց մրցակիցներին (6:2), իսկ Իտալիայում կայացած պատասխան խաղն ավարտվեց հօգուտ «գայլերի» (3: 2): Եթե այսօրվա հանդիպումը «Վիլյառեալի» համար սա առաջին եվրագավաթային եզրափակիչն է, ապա 2017թ անգլիական ակումբն արդեն տիրել է ԵԼ գավաթին․ «Մանչեսթեր Յունայթեդը» հաղթեց «Այաքսին» (2-0), իսկ հանդիպման երկրորդ գնդակը խփեց Մխիթարյանը՝ Սմոլինգի փոխանցումից հետո։
«Մանչեսթեր Յունայթեդը» հրապարակել է Եվրոպա լիգայի եզրափակչի համար թիմի հայտացուցակը։ Օլե Գունար Սուլշերը, չնայած վնասվածքին, հայտացուցակում է ընդգրկել նաև Հարի Մագուայերին, ինչպես նաև մի քանի երիտասարդ ֆուտբոլիստների:
Դարպասապահներ՝ Դավիդ Դե Խեա, Դին Հենդերսոն, Լի Գրանտ, Նաթան Բիշոփ
Պաշտպաններ. Էրիկ Բեյլի, Վիկտոր Լինդելոֆ, Հարի Մագուայր, Լյուկ Շոու, Ալեքս Տելես, Ակսել Տուանզեբե, Աարոն Ուան-Բիսակա, Բրենդոն Ուիլյամս
Կիսապաշտպաններ՝ Ամադ Դիալո, Բրունո Ֆերնանդեշ, Ֆրեդ, Դանիել Ջեյմս, Խուան Մատա, Նեմանյա Մատիչ, Սքոթ Մակտոմինեյ, Պոլ Պոգբա, Դոնի վան դե Բեկ
Հարձակվողներ՝ Էդինսոն Կավանի, Էնթոնի Էլանգա, Մեյսոն Գրինվուդ, Մարկուս Ռեշֆորդ, Շոլա Շորտիր
Իհարկե, հիմնական կազմը, գրեթե տեղում է, և ամենակարևորը՝ հանդիպմանը պատրաստ է ուրուգվայցի մատադորը՝ Կավանին, ով պարզապես գերարդյունավետ շրջան է անցկացնում վերջին ամիսներին։ Ի դեպ, Կավանին դարձել է երրորդ ֆուտբոլիստը, ով կարողացել է չորս և ավելի գոլ խփել Եվրոպա լիգայի կիսաեզրափակչի երկու խաղերում։ Ավելի վաղ այս նվաճմանը հասել էին Ռադամել Ֆալկաոն (2011 թ․, «Պորտու») և Պյեր-Էմերիկ Օբամեյանգը (2019թ․, «Արսենալ»)։ Ինչ-ինչ, բայց անգլիական թիմի կազմն ավելի տպավորիչ է, համենայն դեպս՝ թղթի վրա։ Իսկ թե ին՞չ կլինի խաղադաշտում․․․
«Մանչեսթեր Յունայթեդի» նախկին գլխավոր մարզիչ Ալեքս Ֆերգյուսոնը մանկունիանցիների հիմնական կազմի հետ միասին մեկնել է Լեհաստան, որտեղ կկայանա Եվրոպա լիգայի եզրափակիչը, տեղեկացնում է Goal-ը: Աղբյուրի համաձայն, «Մանչեսթեր Յունայթեդի» ներկայիս մարզիչ Օլե Գունար Սուլշերը ցանկանում է վերստեղծել այն մթնոլորտը, որը տիրում էր 1999 թվականի Չեմպիոնների լիգայի եզրափակչում: Այն ժամանակ «կարմիր սատանաները» հաղթեցին «Բավարիային» (2:1):
Եվրոպա լիգայի եզրափակիչը «Վիլյառեալի» ու «Մանչեսթեր Յունայթեդի» միջև կսպասարկի ֆրանսիացի Կլեմենտ Տյուրպինին: Նրան կօգնեն հայրենակիցներ Նիկոլաս Դանոն և Սիրիլ Գրենգորը, իսկ չորրորդ մրցավարը կլինի սլովենացի Սլավկո Վինչիչը: Ֆրանսիացի Ֆրանսուա Լետեզիեն պատասխանատու կլինի VAR- ի համար, իսկ օգնականներն են Ժերոմ Բրիսարդը, Բենյամին Փեյջզը և նիդերլանդացի Պոլ վան Բաքելը:
