Armsport․am-ը արդեն անդրադարձել էր ամսվա առաջին երկու շաբաթների ընթացքում կայացած նշանակալից տրանսֆերներին։ Առաջարկում ենք ծանոթանալ վերջին շաբաթվա տրանսֆերային նորություններին համառոտ։
Էշլի Յանգը տեղափոխվեց Միլանի «Ինտեր»
«Մանչեսթեր Յունայթեդի» պաշտպան Էշլի Յանգը տեղափոխվեց Միլանի «Ինտեր»։ 34-ամյա անգլիացին պայմանագիր է կնքել «ներաձուրիների» հետ մինչև 2020 թվականի հունիսի 30-ը։ Տրանսֆերի արժեքը կազմել է 1,5 միլիոն եվրո։ Ավելի վաղ հայտնի էր դարձել, որ Յանգը վեց ամսվա ընթացքում վաստակելու է 6 միլիոն եվրո աշխատավարձ։
Լոբոտկան «Սելտայից» տեղափոխվեց «Նապոլի»
«Նապոլին» ձեռք է բերել«Սելտայի» կիսապաշտպան Ստանիսլավ Լոբոտկային: Գործարքի արժեքը կազմել է 20 միլիոն եվրո։ 25-ամյա սլովակ ֆուտբոլիստը պայմանագիր է կնքել մինչև 2024 թվականի հունիսը։
Ռեյնան տեղափոխվեց ԱՊԼ
«Միլանի» դարպասապահ Պեպե Ռեյնան վարձակալական հիմունքներով տեղափոխվել է «Ասթոն Վիլա»։ Ինչպես հայտնում է անգլիական ակումբի պաշտոնական կայքը, վարձակալությունը նախատեսված է կես տարով՝ մինչև մրցաշրջանի ավարտը։
Միլանի փոխարեն՝ Գելսենկիրխեն
«Բարսելոնան» իր պաշտոնական կայքում հայտարարել է թիմի պաշտպան Ժան-Կլեր Տոդիբոյի՝ վարձակալության հիմունքներով «Շալկե-04» տեղափոխվելու մասին: 20-ամյա ֆրանսիացի ֆուտբոլիստի վարձակալական համաձայնագիրը նախատեսված է մինչև 2020 թվականի հունիսի 30-ը:
Կյերը վարձավճարով տեղափոխվեց «Միլան»
«Սևիլիայի» պաշտպան Սիմոն Կյերը վարձավճարով տեղափոխվեց «Միլան»: 30-ամյա դանիացի ֆուտբոլիստի հետ պայմանագիրը նախատեսված է մինչև մրցաշրջանի ավարտը։
Ժադսոն Ֆերնանդեշը կարիերան կշարունակի «Տոտենհեմում»
«Բենֆիկայի» կիսապաշտպան Ժադսոն Ֆերնանդեշը կարիերան կշարունակի «Տոտենհեմում»: Լոնդոնյան ակումբը 21-ամյա ֆուտբոլիստի հետ 1.5 տարվա պայմանագիր է ստորագրել և նա ակումբում կխաղա վարձավճարով: «Տոտենհեմը» կունենա նաև ամբողջական տրանսֆերը գնալու իրավունք:
Պոգրանչիչը տեղափոխվեց «Վոլֆսբուրգ»
«Ռեդ Բուլ Զալցբուրգի» պաշտպան Մարին Պոգրանչիչը տեղափոխվեց գերմանական «Վոլֆսբուրգ»: Տրանսֆերի գումարը կազմել է 10 միլիոն եվրո: Գերմանական ակումբի հետ ֆուտբոլիստի պայմանագիրը ուժի մեջ կլինի մինչև 2024 թվականը:
Իսլանդիայի հավաքականի կիսապաշտպանը տեղափոխվեց Իտալիա
«Բրեշիան» պայմանագիր է ստորագրել Իսլանդիայի հավաքականի կիսապաշտպան Բիրկիր Բյարնասոնի հետ: Պայմանագիրը նախատեսված է մեկուկես տարով: 31-ամյա ֆուտբոլիստը միացել է իտալական ակումբին որպես ազատ գործակալ: Մինչ Ա Սերիա տեղափոխվելը նա խաղացել է Քաթարի «Ալ Արաբիում»:
«Ֆեյենորդի» դարպասապահը տեղափոխվեց MLS
«Ֆեյենորդի» դարպասապահ Քենեթ Վերմերը կշարունակի կարիերան Միացյալ Նահանգներում: 34-ամյա դարպասապահը պայմագիր է ստորագրել «Լոս Անջելեսի» հետ։
Լունինը հանդես կգա Սեգունդայի «Օվյեդո» թիմում
«Ռեալի» դարպասապահ Անդրեյ Լունինը հանդես կգա Սեգունդայի «Օվյեդո» թիմում: Ակումբը ուկրաինացու հետ վարձակալական հիմունքներով պայմանագիր է ստորագրել։
«Բարսելոնայի» կիսապաշտպանը կարիերան կշարունակի MLS-ում
«Բարսելոնայի» կիսապաշտպան Բալու Թաբլան կարիերան կշարունակի կանադական «Մոնրեալում», որը գլխավորում է Թիերի Անրին։ 20-ամյա կանադացի ֆուտբոլիստը նախորդ մրցաշրջանը ևս անցկացրել էր այդ ակումբում՝ վարձավճարով։
Վար Բաբայան
Շարքի նախորդ մասերը
Shopping week. Շաբաթվա նշանակալից տրանսֆերները
