Աղվան Դավոյան․ Բարդ հանդիպում է սպասվում․ ամեն ինչ կանենք, որ պատվով դուրս գանք Ստյաուայի հետ մրցավեճից

Հայկական թիմերն այսօր իմացան Եվրոպա Լիգայում իրենց մրցակիցների անունները։ Գյումրիի «Շիրակը», մասնավորապես, մրցելու է Բուխարեստի «Ստյաուայի» հետ։

ArmSport-ը թիմի առաջիկա մրցակցի, կազմում կատարված մեծ փոփոխությունների և ԲԽ նոր մրցաշրջանի մասին զրուցել է «Շիրակի» ավագ Աղվան Դավոոյանի հետ։

-«Շիրակում» անակնկալ փոփոխություններ եղան առաջնությունից հետո. ձեզ համար է՞լ էր դա անակնկալ:

-Այո՛, իմացել եմ,երբ վերջին խաղից հետո մի շաբաթ հանգիստ էին տվել,ու եթե անկեղծ՝ անակնկալի եկա։

-Իսկ ինչպե՞ս իմացար այդ մասին: «Արարատին» միանալու առաջարկ եղա՞վ

-Հանդիպել եմ ղեկավարության հետ, մնալու կամ Երևան տեղափոխվելու կապակցությամբ քննարկում ենք ունեցել, և ավելի նպատակահարմար գտանք, որ մնամ «Շիրակում»։

-Այսինքն՝ մնալու որոշումը երկկողմանի՞ է եղել։

-Այո՛։

-Հիմա ի՞նչ թիմ է հավաքվել «Շիրակում»։

-Հիմա գյումրեցիմերի հիման վրա է կառուցվում թիմը, ու բաց դիրքերը լրացվում են հայ երիտասարդ ֆուտբոլիստներով, այդ թվում՝ երիտասարդական հավաքականի մի քանի ֆուտբոլիստներով։

-Երկար տարիներ Վարդան Բիչախչյանի գլխավորությամբ եք հանդես եկել. նոր մարզչի հետ աշխատանքն ինչպե՞ս է ստացվում։

-Նոր մարզիչը միայն գլխավոր մարզչի դերում է նոր։ Դավթյանը «Շիրակում» նոր մարդ չէ, իրար ճանաչելու խնդիր չկա նաև համագործակցության առումով։ Իսկ ովքեր նոր են ծանոթանում Դավթյանի հետ, նրա մոտեցումների հետ,կարծում եմ, շատ շուտ կընկալեն, թե ինչ են իրենցից պահանջում մարզիչները։

-Իսկ որպես մարզիչ նրա մոտեցումները շա՞տ են տարբերվում Բիչախչյանի մոտեցումներից ու պահանջներից։

-Այսպես ասեմ՝ և՛ նմանություններ կան, և՛ տարբերություններ։

-Այս կազմով «Շիրակը» ինչի՞ կարող է հասնել Եվրոպա լիգայում։

-Դե, հնարավոր տարբերակներից ամենաբարդը մեզ բաժին հասավ։ Միշտ էլ fortunan մեր ամենաուժեղ կողմը չի եղել։ Իհարկե, մեզ շատ դժվար հանդիպում է սպասվում, ամեն ինչ կանենք,որ պատվով դուրս գանք այդ մրցավեճից։

-«Արարատի» հետ ընկերական խաղ անցկացրեցիք.ի՞նչ զգացողություններ ունեիր, երբ մրցակցի կազմի խաղացողներից շատերը դեռ վերջերս թիմակիցներդ էին։

-Իհարկե, անսովոր էր։ Մի պահ հիշեցի մարզումների ընթացքում անցկացրած երկկողմանի խաղերը, իսկ հետո սովորական էր արդեն։

-Դու ինչպիսի՞ մարզավիճակում ես հիմա։

-Աստիճանաբար լավ մարզավիճակ եմ ձեռք բերում, համենայն դեպս երկու ընկերական խաղերում կարող եմ ասել, որ վատ չէի զգում ինձ։

-Ի՞նչ սպասեն այս թիմից «Շիրակի» երկրպագուները նոր առաջնությանը ու, մասնավորապես, 1-ին տուրի՝ «Նոայի» դեմ խաղում։

-Ուզում եմ ևս մեկ անգամ դիմել մեր երկրպագուներին, որ մեզանից ամեն խաղի սպասեն անմնացորդ նվիրում, պայքար մինչև վերջ ցանկացած մրցակցի դեմ և, իհարկե, հաղթանակներ։ «Շիրակից» ուրիշ բան սպասել պետք չէ։

Ստելլա Բաբլոյան